米米蓮妖怪作品 -《旅行‧如此‧難以忘‧記 》(百集長篇): 第124集 ~ 輝︰外傳咩？講主線啦，到「地魔」喇呢集！
第124集 ~ 輝︰外傳咩？講主線啦，到「地魔」喇呢集！
估唔到「大袋」個衰仔原來幾識溝女噃…
又估唔到欣家姐原來愛起人上嚟會咁傻痴痴…
更加估唔到而家「大袋」竟然變成咗「佛地魔」。
之前欣欣不恥「東歪」歪理連篇，所以破口大罵…
「唔怪得人哋都叫你「東歪」喇！就算係妖刀又點噃？唔可以改邪歸正咩？唔可以得道成仙，變成仙劍神刀咩？唔好話你自己冇心！點解要助紂為虐啊？仲要親手殺死自己師父，你連做把刀都唔配啊！做…做PAT屎你就差唔多！」
欣欣當時應該真係好嬲，佢好少講屎尿屁嫁。
(係啊，靚女唔會屙屎添啊！)
唔講污糟嘢住，講返呢度先…
「東歪」迅間閃到欣欣身邊，仲一拳將佢打暈咗…
好在，我識「鳳凰閃現」，我即刻就閃埋去救返欣欣…
而「東歪」就退返去「鬼王」身邊。
當大家都凝視住「東歪」嘅時候，突然…
「哈哈哈哈，我明喇，我明喇！」
傻佬明佢原來已經醒返，仲擺出一副冇得輸嘅姿態對住「鬼王」。
究竟佢憑咩呢？
「九陽草薙！」
之後，我哋同「鬼王」鬥咗幾吓口哩，佢唔夠我哋鬥就…
「接招啦，癲仔！靈魂鬼步。」
「鬼王」一吓閃身埋去阿明度，但係迅間又彈返開…
原來係阿明佢合埋眼嚇窒咗佢…
之後，阿明都叫埋我哋合埋眼…
但係咁精彩嘅場面，邊有人想合埋眼丫，我唯有先望住地下，唔直望佢哋…
點知第一句聽到嘅，竟然係「鬼王」佢出聲喎︰—
「哼，我睇你都癲夠喇！就送你一程啦，天狗夢魘！」
我記得呢招係會釋出鬼魂嘅…
「…九陽草薙，出鞘！」
阿明出聲喇，燦爛金光亦從此而生…
我諗呢D就係「九陽草薙」嘅力量喇！
當然，我冇辦法去直視佢哋，但係我可以去聽同去用眼尾哨吓佢哋…
「…你…要合埋眼，你點樣可以殺得到我啊？」
「…心眼！」
「心眼」？唔通同我隻「慧眼」同類嘅？
我諗到呢度，即刻就望一望「英雄」…
「咦，英雄，你冇事丫嘛？」
佢一殼眼淚咁樣對住我…
「大哥啊，救命啊，我冇眼簾嫁，好燦眼啊！」
係噃，真係難為佢，而家佢流晒馬尿咁款…
正當我想想辦法幫吓「英雄」嗰陣，突然…
「嚓」一聲…
之後…
「唔使再浪費大家時間喇，你好明顯已經輸咗…」
「大家開眼啦。」阿明講完，就收返埋把「九陽草薙」…
我亦抬起頭嚟睇吓發生咩事…
原來…
係「東歪」出手殺死咗「鬼王」…
唔通，我哋怪錯咗佢…
但係不出幾秒，答案就嚟喇…
「東歪」佢向住一個方向，好恭敬咁耷低頭…
個方向就係「大袋」被吊起嘅方向…
我轉身望過去，發覺…
「餐躝~」幾聲嘅鐵鍊聲，係「大袋」佢自己鬆開咗鐵鍊啊！
我當時又開心，又擔心，嗰種感覺真係好難形容…
我眼見佢慢慢飄埋去擒咗上去嘅欣家姐嘅面前…
淨係隱約聽到佢問︰—
「你想救我呀？」
欣家姐呆咗咁及咗一吓頭，而「大袋」佢就咁回應︰—
「好可惜，我已經唔係佢，我係佛地魔。」
「吓？」呢一吓係當時我心裡面嘅疑問。
連呢一個單字都未問完，「大袋」佢…「佛地魔」佢…唉，我都唔知點叫佢好…
Eee…算啦，叫佢「大袋魔」啦，「大袋魔」佢出手快到我肉眼都睇唔到…
欣家姐就俾佢打暈咗。
「大袋，你癲咗呀？佢係你啱啱先識嘅女朋友嚟嫁！」阿狗大嗌。
阿狗嗌完，只係「蓬」一聲，「大袋魔」就已經去到佢面前，再…
一手將佢個口噤住…
阿狗佢就連反擊嘅能力都冇…
「狐炎舞！」阿妮即刻想出手相救，但係…
「大袋魔」左手一撥…
「嘭」一聲，阿妮就彈開幾丈遠…
之後「大袋魔」一手將阿狗噤落地下…
再「嘭」一聲，阿狗完全俾佢壓咗入地下…
「大袋魔」起返身，斯斯然咁另轉身行返上大台…
「恭喜佛地魔大人重生。」「東歪」好恭敬咁向住「大袋魔」講。
「仲以為酒吞童子隻小鬼就夠料清理晒呢班人添。」
「佢咁冇用，我呢把妖刀都唔想浪費時間，隨手就殺咗佢，望大人原諒。」
「傻啦，佢死唔死同我都冇關係，佢只係幫我嚟浪費呢堆人時間嫁啫…」
「你…你將大袋佢點啊？」阿明咬牙切齒咁問。
「見你打贏「童子」，我就答吓你問題啦，你講嘅人，而家仲喺我身體裡面。」
「咁係咪真係打贏你就可以救返我哋朋友啊？」我問。
「哈哈哈，係啊，嚟啦，全部一齊上丫，我讓你哋淨係用單手又點話？」
佢個樣明明係「大袋」，但係整個格就好似變咗另一個人一樣，真係好心寒…
「咁…咁點解你要用我哋朋友嘅身體啊？」「細鬼」竟然出聲。
「大袋魔」突然好凶狠咁望住「細鬼」，再用手指指住佢…
「你講多次！」
佢嘅呢個凶狠嘅眼神，就好似威嚇住「細鬼」會節磨死佢一樣…
「細鬼」佢當場俾「大袋魔」嚇到瀨咗尿…
亦都唔敢再問…
「哎喲，我只係叫你講多次啫，做乜嚇到瀨尿咁陰公豬呀？使唔使叔叔錫返？」
「細鬼」已經俾佢嚇到呆晒咁坐咗喺地…
「地魔，點解你要咁害班細路？」「肥龍大師」咁問。
「肥仔，你又想瀨尿啊？」
「瀨屎你嘆都仲得呀！」
「嘩，乜你咁污糟嫁，好，講吓你哋聽啦，我冇諗住害你哋噃，我淨係想一樣嘢，就係毀滅人間…」
「咩意思啊？」
「困晒你哋喺度，唔好阻住晒，我就去毀滅人間囉，而家應該都七七八八嚧…」
「咩七七八八啊？」
「世界上好多個地方都已經俾我嘅瘟疫腐土佔據咗。」
「佔據咗會點嫁？」
「人類都會變成聽從我指令嘅腐肉。丫，你哋係香港人呀可？好似成個香港都已經俾我毀滅咗嚧。」
「咩話？」
「…」大家都呆咗一陣。
「唔好理佢吹水定講笑住，我哋而家係要打敗佢。」「南龍」先生出聲。
「地魔，我諗你都好戰嫁，不如俾少少時間我哋變強，再同你打。」佢再講。
「變強？你哋仲可以點變強啊？哈哈哈，不過都好，俾三分鐘你哋啦。」
「大家埋嚟…」
之後我哋郁動到嘅人都走埋去「南龍」先生度…
「「屎橋」教我哋，可以試吓呢一招，劏雞還神。」
「咩嚟嫁？究竟你呢個「噏屎」邊個寫嫁？信唔信得過嫁？」
「世外高人寫嫁，唔會有錯，不過點做佢就唔會直接教我哋囉。」
「劏雞還神即係點啊？」
「神與神…劏雞還神…我諗…我明喇，係請神啊，初仔佢嗰招啊。」
「請神！？點請啊？而家「光管陳」又唔喺度，仲有啊，我哋要請邊個神啊？」
「孫悟空丫！肯定有得贏。」
「識龜波氣功嗰個好唔好？」
「咁我想要悟飯囉。」
「癲夠未啊？得返一分鐘咋。」
「劏雞還神…我諗…我哋應該係要用雞血嚟請神。」
「邊度嚟雞血啊？」
「呢度！」突然後面有條友大嗌。
係「阿張」啊！嗰個喺故事裡面好少出現，俾孌童校長孌嗰個啊。
「你手上嘅係咩嚟嫁？」
「雞妖隻手。」
「雞妖？」
「之前脅持我嗰隻啊，我見咁大個仔都未見過妖怪，咪攞佢隻手嚟留念，諗住返去做標本囉。」
「嘩，果然最可怕嘅都係人類。」
「事不宜遲，我試吓用雞血請神啦。」
「咁請邊個啊？」
「冇得錯嫁喇，有單眼仔呢隻「慧眼」，又有三尖兩刃嘅「鳳凰火炎」，仲有隻哮天傻狗，係你喇，二郎神！」
(待續)
下集預告︰
P你個K丫，青龍劍都爛埋添…
註解︰
(1) 鬥咗幾吓口哩 — 鬥口哩，即係鬥嘴，鬥鬧咁囉。
(2) 流晒馬尿 — 流馬尿，即係流眼淚。
(3) 陰公豬 — 唔知點解要加個豬字，應該純粹懶可愛，陰公意思有D似慘啊，淒涼啊咁囉，通常唔忍心咁睇到人哋慘況就會講︰「陰公囉！」。
(4) 悟空﹑悟飯 — 本來唔想介紹，因為有《龍珠-改》，不過呢度提吓啦，日本動漫《龍珠》主角悟空係用左中國《西遊記》一D事物創作嘅，當中主角就係用咗齊天大聖孫悟空個名，至於悟飯就係佢個仔，舊版細個個陣好型好正好勁，而家唔知改成點嚧。