男人唔可以窮: 4
Grace一叫，Frankie即刻停哂手，好簡單，,因為Grace係佢老闆，所以我冇必要聽佢講。
我講都唔講就兜心口打多Frankie一鎚，Grace即時走埋黎，一手扯住我件衫：
「停手呀薛可正，乜你呢種人就係咁爛？」
我：「放手，我唔打女人。」
「喂，屌你老母你做乜扯住我阿哥？」突然間可勇喺旁邊走出黎，我望一望，我最唔想發生既野已經發生左。
可勇阿栽仲有Yoyo都咁啱落左黎食飯，當然都咁啱睇到呢場大龍鳳，可勇第一個衝埋黎，一手拍開左Grace隻手。
奇怪係以娜見到咁，竟然好快咁推開可勇。
「走開呀，可勇。」以娜好嬲咁望住可勇，隻手就一路撓住Grace。
可勇出番黎之後都冇見過以娜，但一年前佢仲未坐監果時，佢同可勇都成日有見面，感情都唔錯，咁樣比以娜推開，可勇即時好尷尬咁望一望我，我知道佢想我表態。
Grace：「可勇呀下，你同我行開，薛可正，你到底係唔係男人黎架？上次打凹我架車，仲去我停車場果度鬼鬼鼠鼠望我架車你想點呀？唔係個保安話我知有人好似想打我架車個主意，我唔係話要睇防盜錄影我都唔知係你。」
《你架車？》Grace鬧我成大段野，我只係有呢三個字係最入腦？架車係你既？唔係Frankie個仆街架咩，果日明明係佢泊左喺停車場架？
Grace：「Frankie你有冇事，點解你會同佢打交？」
Frankie：「我唔識佢，係佢打我先，你頭先講番停車場我而家記得，果日你去左星加玻叫我幫你拎番架車，泊左番公司果時我就係見到佢。」
Frankie我終於明白，個腦亦諗起以娜番香港之後打比我電話入面講果句
●仲有呀，你無啦啦做乜走去我公司停車場望下望下？人地問我你係咪傻架！●
架車係Grace，我打凹架車果日Grace只係行開左，我打凹左架車，所以佢要拎去整，咁啱Grace要去星加玻，所以叫左Frankie幫佢拎。
同以娜講我喺停車場果個唔係Frankie，係Grace。
醫院度Grace對我既敵意，係因為佢以為我果日見到佢錫以娜，以為我已經知道佢同以娜關係，我仲戇居居去到比佢串左一大輪都唔知自己做左傻仔。
我一路諗所有野既推論，一路望住以娜撓住Grace隻手，我輸哂。
呢個時候以娜仲有一班同事都行緊過黎，我好尷尬，因為可勇應該已經知道乜野事，我唔知點話比人知，我女朋友變左做一個Lesbian，我覺得好醜，我接受唔到。
成個畫面就係咁樣薑住左，我感覺到周圍既空氣好似停住左咁，我想喊？想大笑？定係想叫出黎？
我唔知，只係覺得心口有度氣好鬱悶想發洩出黎，但喺呢個時候我已經唔知點做。
可勇、阿栽同Yoyo望住我，我突然諗起可勇細個講既果句說話
「人唔可以認錯唔可以認輸，一認，就乜野都冇哂架喇。」
走之前，我要拎番我既面子，
我轉身，拖住Yoyo隻手，就喺一堆人既面前，頭都唔回咁帶Yoyo走左去。
我拖住Yoyo一路咁行，由匯豐總行一路行到置地，再行到去蘭桂坊，行到一個我覺得完全冇人見到我既地方，我先停落黎。
沿途，Yoyo都冇問我做乜，一路跟住我行。
停低，但我唔係好敢轉身望Yoyo，因為我好怕佢會問我頭先既事。
Yoyo：「正哥，算啦，搵自己鐘意做既野去做下，好快就唔記得。」
我：「妳知道乜事咩？」
Yoyo：「你失戀，我失過好多次，我十三歲就拍拖啦。果個女仔就係你女朋友？」
我：「係…」
Yoyo：「仲有果班人呢？我見果個女人好似好維護你女朋友咁。」
我：「係…我唔識點講。」
Yoyo：「你對眼紅哂，男人喊唔可以比人睇到，借個膊頭比你。」
突然，個天落微微雨，我就喺蘭桂坊斜路既最高果一支燈柱下面，借Yoyo既膊頭，第二次為以娜喊到呼天搶地。
之後，我送左Yoyo去坐的士，自己一個人，熄左電話，坐車番屋企。
番到屋企，見到阿爸講緊電話，但我已經冇心情理。
我行過阿爸第邊，阿手用手捉住我，叫我唔好行住。
爸：「嗯，得喇，你阿哥番左黎，你得閒都番黎食飯，好啦，再見。」
爸收左線，就拉左我埋梳化坐，
「正呀，阿細佬打番黎，話你同以娜分開左，搵極都搵你唔到，你有冇事？」
我有小小嬲可勇未問過我就同阿爸阿媽講，因為喺呢個時間，我真係唔想再同任何人傾訴又或者係報導我發生左乜野事，同埋我而家既心情係點樣。
「我冇事爸，我好眼訓，聽日仲要做野。」我輕輕帶過就行番入房，一訓就訓到第二日既下晝。
第二日，下晝四點二十五分，我人生第一次踏足華強北呢個地方。
一出關我就坐的士，一落車就已經係我既目的地 – 華強北綠茵閣。
我換左啱啱買既大陸電話咭打比Jacky，佢話佢已經到左，喺41號枱，行到上去，終於見到Jacky，佢係一個平頭裝大約三十歲既男人，拎住個斜袋，睇身材我覺得似係山東佬，因為真係好撚高。
大家一坐低，佢就叫我食呢樣食果樣，阿栽講既說話我又浮出黎，恕我戇尻，當時我既觀念仲係留喺『大陸人都係痴飲痴食』呢種咁低成份既想法度，我諗佢痴我一餐都仲好，一陣埋單話之前有朋友已經食左幾千蚊野我咪仆街，最後我堅持要一杯水就得。
Jacky：「薛生，想不到你這麼年青，怎麼喇，已經吃過飯喇嘛？」
我：「是，已經吃了。」
Jacky：「那好，我吃，你有什麼資料帶了給我，你隨便講。」
跟住我就拎左之前準備既資料出黎比佢睇，一路傾佢就一路食，條仆街食牛扒，但又好撚似幾世冇過食野咁，成面成手都係汁，有時講得興起又會搵手指指下我果d資料，搞到全部都係油。
因為我始終都係新手，加上國語唔太好，佢一路聽都好似好多野都唔明咁，我已經打定輸數，只係諗住搵個經驗。
Jacky食完，抹抹個咀，開始同我入正題。
Jacky：「唏服務員，埋單。
對了，薛生，老實說我從老家來，在這邊幾年都算總算賺了點錢，但想搞一些投資，總覺得在這邊投資有點不踏實的感覺，但香港嘛，始終又距離我太遠，所以信心來講我真係不是太大。」
我：「明白。」
「所以嘛，給我，多少錢？九十八塊吧對。」服務員拎左張單過黎，
Jacky拎佢個斜袋放上枱，一打開，入面全部都係一紮一紮人民幣，每一紮都係四五吋厚。
佢好辛苦先拎到一張出黎埋單，跟住個樣戇尻尻咁望住我講：
「信心我真的不是很大，但你一場來到我們總要意思意思一下，這裡十五萬塊，那我就拜託你幫我搞好那黃金投資喇。」
望住果十五萬既人民幣，我口都合唔埋咁望住佢，我驚奇既唔止係呢條友點會拎咁多錢出街，最驚奇既係我同你只過你上網識左一個星期多小小，你見我一次就比咁多錢我？
但另一個時間又諗，如果我拎左呢堆錢，會唔會有一班人走出黎屈我搶錢？講真唔好話一堆人，你叫我同面前呢個大陸佬打我都冇得打，果一刻我已經決定，呢個世界冇咁好彩既事，我唔可以收呢堆錢，唔好話收，我連掂都唔可以掂。
我：「Jacky，我不可以這樣收你錢，因為戶口要到公司才能開通，這是保障你的財產，你可以先在這合約上簽名，之後來一次香港到我的公司看下，順道也開通了帳戶的問題。」
Jacky：「這樣子嘛，那好了，我找一天來吧。」
我：「好，那我也先走了。」
我既第一份合同終於簽左，雖然個客未入錢，但我已經好開心。
離開左間餐廳，我就周圍行，之後我行到去一個叫賽格中心定市場之類既野就走左入去睇，入到所有野都係電子貨，電話、耳筒、喇叭、有線解碼器通通都有得賣，我上左最頂果層睇，一路睇就一路發覺好多得意野，最後我買左一個電子鐘就走左，但沿途感覺良好，我開始覺得大陸唔係阿栽佢地講到咁恐怖。
走左之後，我就打算番羅湖，問左一個路人，果個人好好咁教我坐地鐵，落到地鐵站，我去買飛，入左錢之後，部機跌左一個膠幣比我。
點解唔係飛黎既？
我拎住呢個綠色既膠幣走埋入閘果度，望一望，咦屌你點解冇得入既？我再三咁睇多次，喂真係冇得入架喎，咁我點入閘呀？
最後我決定企喺個閘邊，我要睇下其他人係點入閘，呢個時候有個頸度有條紅巾既小學生走過黎，又係好似我咁買個膠幣，行過去貼住個閘上面個膠版「Do」一聲，喂屌你原來係咁入閘架？
乜原來大陸已經咁先進？我未落大堂之前仲以為會有人收飛架頂，老實講我阿媽個鄉下仲係果種成個市鎮都係得一間濕尻超級市場一間卡拉OK果種地方黎，次次同佢一出關就係坐大巴番去，最叻都係去羅湖城度買老翻，真係完全唔知道原來深圳地鐵已經係咁先進。
就係因為咁，我對深圳呢個地方愈黎愈有興趣。
番到香港，我決定唔番屋企先番公司，我入業仔房放低份合約，果時業仔打緊牌，我諗住同佢交帶下今日既情況，點知佢叫我遲小小講。
行出門口我見到阿栽，好勞氣咁同阿栽講我明明已經叫個客簽好左合同番黎，點解業仔理都唔理只係掛住打牌，點做人阿頭。
阿栽：「正哥，你手上呢類簽左名既合約我房度有幾百份，年中都唔知有幾多人簽完唔入錢，業仔唔係想潑你冷水，只係佢做得耐，知道乜都係假，入錢作實。」
其實諗真小小都係我自己見識既問題，對我黎講係第一個倉，但對佢地黎講，我只不過係一個過客既第一個唔知開唔開得成既倉，咁睇黎，又真係扲牌緊要小小喎。
不過世事如棋就局局新，第二日既一早，Jacky帶住總共二十萬黎香港入錢。
望住Jacky行入黎公司果一刻，我感覺到一陣唔知點形容既喜悅，由jacky黎到，同佢去帳房入錢，再送佢走，我覺得自己好似一個比光環包住既特別人物，全公司人都應該將注意力放喺我度。
Jacky走之前同我握一握手，好多謝我咁講：「我這二十萬塊就要靠你這專業人士了。」
專業人士，我聽到都覺得好可笑。
同業仔送左Jacky走之後，業仔就搭住我膊頭：
「正，叻仔呀，一陣個倉搞掂今晚就可以一齊玩啦。」
玩？冇錯，業仔真係用個玩字去形容。
可勇同Yoyo都黎話一齊食飯慶祝我開到倉，但我見到可勇好似唔多開心，,因為禽晚佢個圍頭佬客走左上公司話要停左戶口買賣先，任阿栽講到口水都乾個圍頭佬都係唔改變主意。
中午食飯之後，我個倉終於可以做野，業仔叫左我入房，正正式式咁教我一次落盤。
「喇正，任平時點玩都好，落盤係一定要認真，因為電話一路有錄音，所以唔好整古做怪。
首先，你拎起個電話打8188，你會聽到一條友講『盤房』，咁呢個時候你就同佢講『Local』，之後佢又會報一個數字比你，例如而家咁佢就會話『615/615.5』，記住前面係沽貨價，後面就係渣貨價，即係話如果你想渣一手貨，咁你果個價就係跟住後面果個價去做，而想平倉走人沽番一手呢，就要用前面個價去沽番一手。」
我：「點解要咁做既？」
「食差價囉，唔食差價公司食屎呀？」章仔插咀答我
業仔：「係喇，章文講得啱，公司就係咁搵錢，你入左貨之後都記得要set個平倉價，因為有時金價會衝得好快，一估錯方向你可以一針輸好多，所以打去盤房set定價，佢一到價就會同你平左張單。」
我：「知道。」
業仔：「好，而家個市唔係點郁，晏小小先搵位比你做野啦。」
夜晚九點三十二分，我正式用Jacky呢個倉渣左三手貨，我既倫敦金之路，正式開始。