時日如飛。

巧妍就是有這種魔力,能令每一天都變得容易過。

那次看樓盤後已經過了兩個月,我看中一個心儀的單位,很快便和業主簽了約。

業主是已經舉家移民加拿大的退休公務員,基本上不會回來香港,所以很乾脆和我簽了長約。

在業主眼中根本懶得考慮樓市升跌,故不需要在訂一張短期租約待期滿後再考慮調整租金等事宜。



這種爽快和我很合得來,他更同意我替他的單位裝修一番。

反正長住,即使約滿他要收回單位,我也賺了這段時間的舒適度。

我計劃把實用面積六百多呎的單位劃分為兩部分,把原本兩房的設計打通,變為一個用來畫畫的開放式空間,擺放顏料、畫架、畫框等物品。

而另一部份則是睡房和大廳半合體的設計,擺放大電視、音響等等設備。

當然這只是我的意念,雖然擅長畫畫,但卻不擅長設計。



我把這種意念告訴成為了設計師的兆健,其後他向我展示草圖,用料等等……我都一概懶理,讓他全權負責。

最後果然不負我的期望,出來的效果使我嘆為觀止。

「滿唔滿意先?」兆健問我。

「美源髮彩。」

「哈哈哈!雖然唔好笑,不過多謝喎!你執兩件衫就可以搬入嚟架喇!」他假笑三聲並說。



「簡直完美!過一排再請你哋上嚟開檯打牌!」我說。

「擇日不如撞日喇!晉傑off duty呀今日!」他提議。

「世昌條肥鳩呢?」

「佢返埋啲炒散之嘛,射波用乜易!」

「好心佢啦,畢咗業咁耐都唔好地地搵返工,搞咩呀佢。」對於這個老死的前途,我著實有點擔心。

「佢話還掂都買唔到樓架啦,不如自由啲仲好喎。」

「唉。是但佢。」

「咁我call馬上嚟架喇喎!」



「……咪……咪住!」我突然驚醒。

「又點呀渢生?」

「我應承咗一個人,要俾佢第一個作客。」我說的當然是巧妍。

「挑!踢波咩!」

「哈哈哈!唔好笑。」我假笑三聲回敬他。

「囡囡呀?」兆健問。沒錯,我並沒有和他們說我和巧妍交往的事。

「關你q事咩!」



「芷若呀?佢中學好嗒你糖喎!」

「唔好亂講啦,我同佢好耐無聯絡。」

「咁可惜呀!食得唔好嘥呀嘛!你唔食不如彈俾我!」

「聽講你就嚟結婚架喇喎!想我話俾阿嫂聽?」兆健的對象是職場上大他三歲的前輩,以女性的年紀來說,已經到了結婚黃金期。

當初兆健畢業後一入職便對她一見鍾情,並常常在whatsapp群組中請教我們追她的攻略。

在苦苦追求半年後,他們終於開花結果,想不到的是一年半後,更加修成正果。

「你千祈咪呀!絕交呀!我好難先追到個咁高質嘅姐姐架!」

「得喇得喇!快啲返去投入姐姐嘅懷抱啦。」



「佢同咗屋企人去旅行呀!」

「其實……拍得嗰一陣拖就決定結婚,唔會太急咩?」我問出心中的疑惑。

「其實兩個人啱唔啱,夾唔夾,相處一陣就知啦!我同佢返工由朝見到晚,但到咗星期六、日都仲想見到對方,雖然我細佢三年,但大家相處落一啲問題都無,你唔好以為姐姐一定好tough呀,佢對住我不知幾小鳥依人……我覺得無論我同佢一齊幾耐都唔會悶唔會厭,結婚只係一個形式啫,反正佢年紀一早到咗適婚年齡,早啲結婚早啲生仔都係一件好事。有時候,時間並唔係用嚟衡量愛情嘅單位。」兆健罕有地說出自己心聲。

時間並不是用來衡量愛情的單位……

這句說話一直縈繞在我心頭,久久沒法釋懷。

兆健走後沒多久,我向巧妍發送了一個訊息。