《我老婆教我追女仔》: 第十一章
數天之後的早上。
「小惠......」我躺在床上呆望天花板。
「嗯?」
「有無方法可以令我對藝術品有興趣呀?」這幾天我都在找維基大神和google大神，只不過看著那些畫作資料，感覺比考試溫書更難受。
小惠轉個頭來﹕「做咩呀?想學人做偽文青呀?」
於是我將看畫展的事告訴了她。
小惠轉過頭去，繼續看她的書﹕「算吧啦，文化修養呢啲嘢，無就係無，勉強唔到㗎。」
我嘆了一口氣﹕「咁我都係想同Fiona有共同興趣啫......」
「呢樣無興趣咪搵過第二樣囉，無可能會有兩個人鐘意嘅嘢係一模一樣㗎?」
我想了想﹕「咁又係......」
小惠又轉個頭來看著我﹕「不如你諗下Fiona生日點算仲好啦！」
我大驚﹕「Fiona生日?幾時呀?」
小惠沒好氣﹕「你唔係追緊人咩?連人哋幾時生日都唔知?」
我搔搔頭，有點難為情﹕「咁佢facebook又無寫，我又唔好意思問喎......」
小惠白了我一眼﹕「都知你㗎啦，三月二日呀。」
我算了算，不是只剩下不夠兩個星期嗎?怎麼辦?怎麼辦?
我腦海一片混亂﹕「點...點算......點算......」
小惠懶洋洋道﹕「都知你㗎啦，我一早已經幫你問咗，佢嗰晚會同屋企人慶祝，所以你唔駛諗啦。」
「吓?......」我一臉失望。
小惠看了我一眼﹕「唔駛咁嘅樣，我橋都幫你度埋啦。嗰日晏晝我哋會同佢慶祝食蛋糕，不過你唔好出現喎......」
我馬上打岔﹕「等等！點解我唔好出現呀?」
「唔好咁心急聽我講埋先啦！你嗰日扮有事，成日都唔好出現，就算Fiona搵你都剩係話有急事，遲啲先搵佢。等到佢同屋企人夜晚慶祝完喇，你先至單獨約佢出嚟，同佢食蛋糕又好，送禮物又好，咁咪夠哂驚喜囉。」
我想了想，問道﹕「Fiona會唔會以為我唔知佢生日嬲咗我㗎?」
小惠解釋道﹕「就係要佢以為你唔知佢生日，咁最後你出現同佢慶祝先叫反高潮嘛！至於會唔會嬲咗你，我諗Fiona都唔會嘅，至多係開頭失望啲啫。」頓一頓又道﹕「當然佢都有可能會嬲你啦！咁你搏唔搏呀?」
我想了想﹕『搏一搏，可能真係會單車變摩托喎，總好過剩係大圍慶祝生日咁行貨啦！』
於是我道﹕「緊係搏啦！」
「咁你聽清楚啦。」然後小惠就將她的計劃告訴我。
三月一日中午十二時，宿舍飯堂。
「係呢，你聽日有咩做呀?」Fiona漫不經意的道。
「嗯?有咩做?咪要上堂囉。」她是想問我會和她慶祝生日嗎?
「唔...唔係呀，我係話落堂之後。」她的語氣有點急。
我決定逗一逗她﹕「落堂之後?......呀！我有齣戲想睇呀，聽晚AMC又一城 7點幾有一場，不如一齊去睇囉！」
「唔得呀，我聽晚要同屋企人食飯呀......」Fiona的表情好像有點失望。
我心裏暗笑﹕「咁呀，咁下次先囉。」
Fiona偷瞄了我一下﹕「咁其實我食飯之前都得嘅......」
我搖了搖頭﹕「我唔得呀，我聽日下晝落咗堂要去同人補習，補到7點。」
「哦......」Fiona無語。
我看了看手錶﹕「我要上堂啦，晏啲再傾啦，拜~」
「拜拜......」Fiona默默的看著我離開。
********************************************************************************************************************
「Fiona，Mandy，一陣上完堂嚟Hall同我哋食飯呀。」小惠上課時悄悄跟我們說。
「哦，好呀。」我們?那麼Sam會一起吧。
呀Sam應該知道我今天生日吧?雖然我沒跟他說過，但小惠會告訴他吧?那麼待會他會在宿舍跟我慶祝嗎?
想到這裏，昨天鬱悶的心情又好了起來。
下課後，我們三人一起到了宿舍六樓。
「嗨！Fiona！Mandy！」樂言，呀君和Michael跟我們打招呼。
我左望右望，疑惑的道﹕「呀Sam呢?」
樂言道﹕「成朝都唔見佢，打比佢話有急事喎。」
急事?還是待會突然走出來給我驚喜?
吃過飯後，小惠突然走了出去。一會後，她拿著一個大蛋糕進來。
Happy birthday to you,
Happy birthday to you,
Happy birthday to Fiona,
Happy birthday to you！
他們齊聲唱道。
呀Sam呢?不是應該由他拿著蛋糕進來嗎?
「Fiona生日快樂！」他們齊聲道。
我收拾心情，衷心道﹕「多謝你哋呀！」
「壽星女快啲許願吹蠟燭！」
我閉上眼，腦裏只是想著呀Sam為何沒有出現，根本沒有許願。然後我睜開眼，吹熄了蠟燭。
一陣鼓掌聲後，Michael和呀君在分蛋糕。
只聽得Mandy在一邊悄悄問樂言﹕「喂！呀Sam去咗邊呀?佢唔知...................」後面說些甚麼?聲音太小聽不清楚。
樂言瞄了我一眼，我馬上裝作跟Michael和呀君聊天，他壓低聲音道﹕「我今朝打比..........有急事，之後小惠同我講下晝同.............生日，我即刻再打..........已經搵唔到佢啦......」然後他又悄悄問小惠﹕「小惠你無同呀Sam講今日係..............」
小惠小聲道﹕「我無講..............點會唔知呀?」
Mandy小聲問﹕「佢唔係真係唔知呀?」
樂言小聲道﹕「咪估啦，我而家whatsapp......................」頓了一頓，又道﹕「佢連我頭先比佢個message都無睇喎..................無開電話呀?」
我心情跌入谷底，有點聽不下去，於是拿著蛋糕向他們走去。
我強顏歡笑﹕「你哋喺度傾咩呀，快啲食蛋糕啦~」
他們馬上停止了對話，笑著吃蛋糕。
我背著他們，默默的吃著蛋糕。
********************************************************************************************************************
樂言、Mandy和小惠看著背對著他們的Fiona，互相交換了一個勝利的眼神。
********************************************************************************************************************
「女呀，做咩好似無咩心機嘅?」
我回過神來，微笑道﹕「無嘢呀媽咪。」
呀妹調侃﹕「家姐肯定係因為生日都無男仔約出街所以唔開心啦！」
我滿臉通紅﹕「邊...邊係喎......今日上咗好耐堂有啲攰咋嘛。」
「嗱，送比你㗎。」爹地將一隻盒子推給我。
我打開一看，見是一隻我想要很久的手錶，愉快的親了爹地一下﹕「多謝爹地！」
呀妹馬上纏著爹地﹕「啊！爹地你偏心呀！送比家姐嘅就咁靚！我又要！」
爹地給她纏得抖不過氣來，敷衍道﹕「下次...下次......」
「家姐比隻錶我睇下！」說罷就搶了來看。
我看了看鐘，已經十時了，呀Sam會找我嗎?還是...他根本不知道今天是我的生日......
我拿著書本呆呆的坐在床上，腦裏一直胡思亂想，書上說些甚麼的，根本就看不入腦。突然之間，電話響起來了。
呀Sam?他是終於知道我的生日，還是好像平時一樣跟我聊聊天?
我忐忑不安的拿起電話，語氣盡量裝作平靜﹕「喂?」
「喂Fiona?你而家喺屋企?」他的語氣很急促。
「係呀，咩事?」
「你而家即刻出一出嚟！快啲！我喺平時送你返屋企分手嗰度等你！記住快啲呀！」他十萬火急的道。
「喂喂?係咪有咩事呀！」我有點擔心，語氣不自覺也變得急促起來。
「總之快啲啦！我等...」這個時候，電話終斷了。
我馬上再打給他，發現已經不能接通。
發生甚麼事?呀Sam好像很緊急的樣子?到底發生了甚麼事?
我沒有想太多，匆匆換過衣服，跟爸媽交代一聲，就出去了。
********************************************************************************************************************
「總之快啲啦！我等...」我說到「等」，馬上掛斷了電話，然後再關了機。
這是小惠教的，她怕因為我下午沒有出現，Fiona會惱了我，所以教我營造一個緊急的情況，讓Fiona不得不應約。
沒多久，就看到一個嬌小的身影從斜路上跑了上來，我悄悄躲到暗處，不讓她看到。
Fiona走到離我幾步的地方，停下來喘著氣，焦急的東張西望。
我見時機成熟，從暗處走了出來，一把牽著Fiona的手就走﹕「Fiona，跟我嚟。」
「Sam...Sam?......你帶我去邊呀?究竟發生咩事?」
「唔好問住，你跟我嚟就知道。」我語氣凝重的道。
Fiona果然乖乖的閉嘴，默默的讓我牽著。
我將她帶到附近的一個小公園。
「到啦。」我看了一下四周，一個人也沒有，心想運氣真好。
Fiona看了一下四周，疑惑的道﹕「你帶我嚟呢度做咩呀?仲有呀，你頭先做咩講講下cut咗線呀?搞到我幾擔心呀！」
我神色凝重的看著Fiona﹕「你想知咩事呀嘛，你合埋眼先，我就話你知。」
Fiona疑惑的看著我，還是慢慢合上了眼。
我從紙袋裏拿出準備好的小蛋糕，再將上面的蠟燭點著了。
準備完畢，我道﹕「可以打開眼啦。」
就在Fiona打開眼的同時，我輕輕的唱起生日歌。
Happy birthday to you
Happy birthday to you
[i]Happy birthday to Fiona
[/i]
Happy birthday to you！
Fiona驚訝的看著我，又看看我手上的蛋糕，一時之間好像反應不過來。
我提醒她﹕「吹蠟燭啦，壽星女。」
Fiona有點結巴﹕「你...你......唔係唔知...唔知我生日咩?......點...點解?......同...同埋......頭先你咁急搵我......」
我笑道﹕「我點會唔知你生日呀?我今日真係有事先嚟唔到，朝早我又唔小心熄咗個電話喎，頭先開番先知比佢哋call爆機，咁我咪即刻趕嚟囉。」我頓了頓，又道﹕「至於頭先搵得你咁急呢.....係因為而家差唔多十二點啦，再唔急啲就過咗時辰啦。」
Fiona鼓起腮，俏臉通紅，笑駡﹕「你呀！......你呢個人呀！......等我頭先仲以為你有咩事添呀！」
我笑道﹕「sorrysorry，唔好閙住啦，你睇下枝蠟燭就嚟燒完啦！你快啲許願吹熄佢啦！」
Fiona瞪了我一眼，還是乖乖的閉上眼許願，然後吹熄了蠟燭。
我鼓掌道﹕「好嘢，生日快樂！食蛋糕！」
Fiona看著我手上的蛋糕，「格」的一聲笑了出來﹕「邊有人買雪芳蛋糕比人做生日蛋糕㗎?」
我有點尷尬的笑道﹕「而家太夜，啲面包舖閂哂啦，唯有去些粉買住呢個頂住先啦......」
Fiona嗔道﹕「我唔會收貨㗎，你仲差我一個生日蛋糕！」
我狡猾的笑道﹕「好呀好呀！有拖無欠！」
Fiona「哼」一聲，望了我一眼，就吃起蛋糕來。
我拿出準備好的禮物，遞給Fiona﹕「送比你㗎。」
Fiona喜悅的道﹕「多謝！咩嚟㗎?」
我微笑道﹕「你打開睇下咪知囉。」
「手鍊?好靚呀！」Fiona愉快道。
「鐘唔鐘意呀?」
「嗯！」Fiona點一點頭。
我終於放下心頭大石，幸好有小惠幫我挑選。
「我幫你戴起佢呀。」我拿起了手鍊。
Fiona俏臉微紅，將右手遞給我。
我溫柔的幫Fiona戴上手鍊，Fiona拿起一看，喜道﹕「多謝你呀！好靚呀！」
我笑道﹕「你鐘意就得啦。」
Fiona點一點頭﹕「我鐘意呀！」
我看一看手錶﹕「都好夜啦，我送你返去啦~」
我們靜靜的走著，不知不覺又到了分手的地方。
Fiona看了看我，又低下了頭﹕「今日...多謝你呀......」
我笑道﹕「你開心就得啦。」
Fiona微笑道﹕「我好開心呀！......咁...聽日見啦，拜拜~」
我揮揮手﹕「聽日見，拜~」
看著她慢慢離去，我亦轉身離開。
還沒走出多遠，已經收到了Fiona的訊息。
「我返到屋企啦！?」
「咁你早啲瞓啦?」
「呀！我突然間諗起，小惠過幾日就生日囉喎~」甚麼?Fiona的剛完，小惠的又來了?
「呀...好...好似係喎，其...其實係幾號呀?」我真的不知道，唯有硬著頭皮問Fiona。
「你唔係人哋表哥咩?你咁都唔知?」『其實我一直都唔知囉！』我真想這樣回答Fiona。
「咁我都幾年無見佢，唔記得都好正常啫」
「3月7呀」
那不是只剩下幾天了嗎?