細細個見到嘅靈異事件勿語: 前言

前言

大約係我四，五歲嘅時候吧，我就發現，我經常見到「果味嘢」。

老實講，佢地唔係好似睇戲果d咁，失驚無神，
突然在轉角位「嘭」一聲彈出黎嚇你一跳，又或者夜媽媽響邊度邊度爬出黎咁。
大部份時候，我覺得佢地都係唔覺意咁俾你見到。

有時我甚至分唔到，究竟其他人係咪都見到我眼前見到嘅嘢。





小時候，見到會喊，會同老媽講。其實，同人講，最慘都係自己，
所以人愈大就愈學識得唔同人講。
唔駛嚇親旁人之餘，又唔會俾人奇怪眼光。

而家小弟都三十有一喇，少左見到，但係感應力依然非常高企。
由我做裝修佬轉到做地產，呢個感應力都幫左我唔少。

試過有次同客睇睇下樓，舊式樓宇，十二樓，個客如常咁睇下廁所呀，房呀，
我日光白白企係大廳到， 見到有個男人敲窗。





「砰砰砰…」 就响屋嘅外面。

其實當時，我係無太大反應的，又唔係電影咁，有一下巨響提提你那是「驚嚇位」。
到霎眼閃過後，才定過神來，問自己：

「頭先有條友响出面？」

「十二樓喎。」

我個客無租到，結果都總有人租左，亦無聽到有咩唔老黎傳聞。




「佢地」嘅出現未必係要害人嘅，我相信。

唔知大家係咪鍾意聽，打出黎只係想同大家分享下，
我自己亦想記低去，亦都希望如果有同路人就當一齊吹下水。

我唔係作家，唔會用上秀麗筆，形容詞都唔識飛天，
每篇短短地，希望撮要咁記低。

我唔係要你驚，唔係要你訓唔著，
因為佢地嘅出現，大多數都唔係聲畫俱全嘅。

唔好問我見咁多，睇恐怖片驚唔驚，
我驚到hihi，因為真係兩回事。

鍾意聽鬼故、怪事、不可思議、解釋唔到嘅就入啦。







圖片參考

ig: donotsayhello