(三十三)戲院

唔知大家睇戲買飛有無咩特別癖好,
有人鍾意買最後排、有
人鍾意自私中間隔個位、有人鍾意第一行岳高頭咁睇。

我好簡單,一定唔買左右最側邊果兩行。

有次去旺角百老匯睇戲,印象中係泰國鬼片黎。

果場都好full,我地四條寡仔坐响最右邊果d雙人位到。


前邊兩個,我同我個friend Alan 則坐後邊。

我知我知,四條寡仔去睇鬼片係毒d架喇,望住雙人位上面攬攬錫錫嘅愛人一對對,
唉,願望有伴侶,但在你身邊是誰…

嗚呀。

心諗快d熄燈無謂眼寃。

開場。



套戲d氣氛做得係幾好,由其係果d靜止完一輪然後失驚無神彈出黎嘅音效,真係俾佢嚇左幾嘢。

無意間我見到前排對情侶(sorry,我前邊兩個friend不是hehe…),
係再前排對情侶痴到實一實連體嬰咁,女仔個頭埃曬落條仔個膊頭到,
條仔又掃下佢膊頭仔攬下腰咁,畫面好鬼浪漫。
係最衰右手面有個女仔friend成個電燈膽咁,唔係應該可以攬得更放。

我咬咬爆谷,無理人地咁多,繼續睇戲。



突然,我個腦好似load到d野。

喂,電燈膽?三個人?

前面…

乜唔係都係兩人位黎嘅咩?

我申一申直條腰,慢慢向前排望過去。

一,二,三。

係真嘅。

我清楚見到三個頭嘅輪廓响雙人位上面。



從左數起,係女,男,女。

最右邊多左個長頭髮女仔,好貼好貼咁埃係幅牆到。
我搞唔清佢係咪坐住係到,事關我睇唔到佢下半身,現場又好黑,
正當我打算擰過去叫我個friend Alan 睇下嘅時候,
套戲岩岩去到有個驚嚇位,以至全場都「嘩」一聲好齊咁大嗌左一下。

除左我。

呢一下,我真係嗌唔出聲。

只係可以口都窒曬咁呆呆望住Alan果邊。

我清楚見到,係Alan 嘅右手面,出現左一張女人臉孔,


正正就好似坐左係佢隔離咁樣。

呃...嚴格黎講,係半邊臉孔。

從戲院裡面時光時暗嘅微弱光線當中,
我見到有半個女人嘅輪廓就坐左係Alan 隔離,
而有一半係好似藏左係幅牆到咁樣。

又或者可以形容為「响幅牆到突出黎」。 

任你點去形容,但果下,我真係乜聲都出唔到,目瞪口呆,成個身震曬,好凍,
只識乖乖咁擰返去睇住個大銀幕,個頭唔敢亂郁,唔敢再望過去牆身果邊... 

一直維持到散場。



電影完結,各人都鬆一口氣。
全院開燈,我再度望望牆側邊,
無嘢,唔理咁多,快手閃人。

一路行,兩個friend 係咁講頭先幾驚幾驚,邊個位嗌到痴線等等。
佢仲話我好嘢,好似無乜聽到我嗌出黎咁,問我係咪死忍。

我真係好想話俾佢知,當你真係好驚好驚果陣,係連嗌…

都無力嗌得出聲。

手腳冰冷,成身震曬,成身緊曬軚咁,個腦空洞一片... 

祝大家都無機會試到。



印象之中,呢次之後,都無再買過左右最側邊嘅座位。

因為…

原來,

果味嘢最鍾意... 

沿住牆移動。

PS. 話時話,如果你睇戲,見到坐最埋邊個friend隔離多左個「人」,你會點同佢講?

Tag 黎緊一齊睇戲嘅朋友,鍾意坐最埋邊,鍾意坐雙人位,鐘意睇鬼片嘅佢入。


戲院    參考圖片


IG : donotsayhello
http://www.facebook.com/donotsayhello

已有 0 人追稿