係哥哥中四既時侯,我屋企出現左第一部電腦 

『家民,電腦就買左比你喇,比心機考好個會考佢』哥哥埋頭苦幹咁研究緊部電腦,爸爸 
就企係哥哥身後邊搭住佢膊頭 

『爸爸我又要』見到哥哥有,我又點會忍到唔出聲 

『你未需要用住,到你需要既時侯爸爸一定會買比你』 

『喂家和,家琪快D過黎玩』大哥叫我同妹妹過去 



係我四年級既時侯,我玩左我人生既第一次小畫家 

兩年後,哥哥會考考到十六分,同年爸爸係地盤做野既時侯整到隻腳,醫生話至少要休息 
三個月 

『家民你打算原校上中六定諗住轉校讀?我托左人地幫我問架喇,你十六分要入大學都仲好危險,不如轉間好少少既讀,不過你轉左校成積可能會追唔上,你睇下要邊間補習啦』 

『老豆我地不如入一入房傾下』哥哥拉左爸爸入房,我細佬同細妹想跟埋入去 



『過黎做功課,唔好多事』我叫返兩個細佬妹坐低 
靜左一輪 

『做咩要唔讀書呀?!你好撚等錢洗呀?屋企要你養咩』爸爸怒吼 

『呀!』嚇到細妹叫左一聲 

『無事,乖,做功課』

『唔撚得!無得傾,你要唔讀書既就乜都無得傾』爸爸再次怒吼,聲浪一次比一次大聲 




媽媽聽到爸爸發嬲,即刻入房睇下咩事 

『咩事呀?』 

『個仆街仔話唔讀書呀!』爸爸真係好嬲,因為我地都未聽過爸爸會講粗口 

大約過左十分鐘到 

哥哥眼紅紅咁行出黎,坐係電腦前面粒聲都唔出 


我忍唔住入房想睇下爸爸 

爸爸背住我,但係我知道爸爸喊緊 



我第一次見到爸爸喊 

自從果日開始,爸爸同阿哥就好少講野,平時食飯爸爸總係鐘意同阿哥傾計 

宜家食飯就只有媽媽同兩個細佬妹會講野 

阿哥亦都無再返學,去左一間藥房到打工 

『你大哥有書唔讀走去做野,都唔知佢諗乜既,賤骨頭,係都要走去捱,你地唔好學佢呀』爸爸經常都對住我地咁講 

晚飯過後,今日輪到我洗碗 

洗碗既途中媽媽入左黎,企係窗口食煙 



『你哥哥係為左屋企先至唔讀書,你千其唔好諗住學你阿哥咁早早唔讀書呀』 

『哦..』 

『唉..如果你同你阿哥調轉咪..』 

『下?』 

『無事』 




其實我聽得明




哥哥早出晚歸,部電腦開始轉左做我用多,當然細佬妹都會爭電腦用啦 

爸爸腳傷好返之後轉左去間裝修公司到做 

今日爸爸好夜返,一開門我見到爸爸拎住好多野 

『老婆,公司春茗抽獎,我抽到部手提電腦呀』爸爸笑得好開心 

『手提電腦?!』我再記得爸爸之前講過話有需要就買比我,宜家細佬妹成日爭電腦用,今 
次仲唔係到我? 

『家琪過黎』我聽到爸爸叫妹妹,然後將佢手上既手提電腦比左妹妹 

『睇住用呀,唔好整爛呀』 



簡直有心如刀割既感覺 

妹妹歡天喜地咁拎部電腦入房同細佬玩 

媽媽去左沖涼,個廳就只有我同爸爸 

我忍唔住 

『爸爸你唔係話會買部新電腦我既咩』爸爸坐係到除緊鞋,而我就企係佢面前 

『下,你咪有囉』 

『果部係阿哥架喎』 

『你阿哥都唔用架啦』 

『唔係用唔用既問題,係你話係我需要既時侯就會買比我』我低頭,我唔想比爸爸見到我既眼淚 

『咁你想我點呀? 』 

『我要用部新電腦, 呀妹佢地用舊果部唔得咩』 

『阿妹入左間好既小學,名校進度教得好趕,我認為你阿妹比你需要』 

『就係因為我成績唔好所以我無新電腦?』 

『唔係,係因為你已經有』 

『偏心』

『咩話?』 

『我話你偏心呀!』我怒吼 

爸爸一巴就打落我到 

『我無偏心,我只係唔想將我既希望只投放係一個未必得到回報既人身上』 

『你要咩回報呀!!』 

『我要我個仔生生性性讀書,就下d細佬妹,咁就夠』爸爸講完就入左房鎖埋門 

原來,我係爸爸心目中,我都只係正正常常做個人就算係回報 

嚴格黎講即係對我無要求 

係果刻我知道左,係我心目中,無論我點做都好,都取代唔到哥哥係佢心入面既位置
 
已有 0 人追稿