聽我阿姨講過,佢話當年其實阿媽生完大哥之後過左幾年想追返個女 

結果就出現左我,兩年之後真係比阿媽追到個女,追到個女之後阿爸又想追返個孻仔 

結果又比佢地追到 

係喇,咁我呢? 

我只係一個意外 



『傻仔黎既,邊有分別姐,咪一樣咁錫你』阿姨笑我亂諗 

無分別? 

我阿媽想追個女,結果出現左我 

諗都諗到啦,一樣係你想要既野,一樣唔係你本身想要既野 

咁點會無分別呢? 



但我從來都唔會恨我地細路妹,我只恨我既父母 

我細佬妹真係兩個都好可愛架,我阿哥又高大有型 

所以有時都唔怪人,我又唔夠高,又唔夠靚仔,讀書又唔叻 

又真係抵人地偏心既 

我只係一個意外,一個可有可無配角 



每年過年都係我最唔想過既節日 

我好憎拜年 

『家民,嘩,咁高大靚仔既,無見一年姐, 又有型左喎,幾時帶埋個女朋友上黎見下呀?』 

『家琪,嘩,好靚女喎,靚左咁多既,上中學未呀?』 

『家宇,嘩,好靚仔喎,個樣好似家姐,大眼仔包靚仔呀』 

『家和,嘩,好耐無見喎,頭髮長左喎』 

.... 

你明啦
已有 0 人追稿