薛可正作品 - 回到過去，星晴擱淺，說好的幸福呢？: 19

19.

跟杰寧一起這個決定，其實我已經想了好幾天。我們在這學校的時間不多，之後的生活有可能是各奔東西。所以確認了關係之後，我知道我們就會走得更遠。

另外一個原因，我要謝謝甘成哥。這幾個月來，每次我的生活上有什麼迷思，都會跑到他的家中訴苦。他從來都歡迎我，而且每次都會給予我很多的信心。

我跟杰寧開始了快樂的一天，午飯的時候，我們擺脫了靜雅和尚志等人，跑到了離學校比較遠的一間西餐廳，慶祝我們成為戀人的第一個午餐。

那餐廳叫「溫莎」，其實很難吃，但附近只有它比較有情調。



回到學校前，我故意拐過後山的那條小路，因為這裡一向人比較小，特別是要趕回學校的時間。

「就遲到喇，我地行快啲啦。」杰寧有點焦急的說，好學生的品德就是不同，故意遲到對她們來說是件大事。

「我咪話咗今日突登遲啲返去嘅？」我不理她，悠閒的說。

「但無端端做咩要遲喎？」

「慶祝囉！今日係我地拍拖第一日，以後我地都會記住呢一日我地去邊度食飯，同埋遲到返學，易記好多。」我拖著杰寧的手在搖呀搖。



「咁你唔祼跑返學校？仲易記啦。」這女的，有時侯的幽默感不錯。

「好主意，但我唔會做，哈哈哈。」我笑得很開心，因為我很開心。

「不過最衰放學媽咪嚟接我啦，我仲想同你去食飯呀，點解你唔聽日先追我喎。」杰寧作狀的打我，她變成了女朋友的模樣原來可愛很多。

「咁我今朝講嘅唔算數，聽日先再講，得唔得？」

「你話呢？」



「嘻嘻嘻……行快啲啦葉青倫，我好怕遲到呀其實。」

「妳以後叫我阿B啦。」

「點解呀？我中意叫你咩咪咩。」

「最親嘅人都叫我阿B，益妳。」

「考慮下。」

走到學校門前，我們也鬆開了手。如我所願，我跟杰寧都遲到了。每次午飯打鐘後，都會有一位老師在門前守著，把遲到的學生一一拿下。

今天的老師，是二姐。

「對唔住呀老師，我地遲咗五分鐘。係因為我唔舒服，葉青倫陪我休息咗一陣，我地先會遲到，可唔可以唔當我地遲到呀？」我還未開心，杰寧已走到二姐前編了一個謊話。



二姐看著我，然後又看著杰寧。

「二姐，妳唔好呢個時間問我地係唔係拍拖呀？俾其他訓導聽到，好容易講俾如素姨聽架。」我心裡想著，求神拜佛二姐妳不要在這個時候把姊弟情洋溢出來。

「快啲返課室啦。」二姐向杰寧說，杰寧連忙稱謝後示意我一起走。走了十多步，我悄悄的問：「妳講大話都幾叻。」

「你夠係，上次呢個Miss捉住你件事我仲記得架，你好快啲同我講佢係你邊個喇，男朋友唔準呃女朋友架。」

「知喇，而家上堂先啦去。」

「拜拜葉青倫。」杰寧故意說

「係阿B。」



「葉B倫。」她繼續笑，在轉角那個位置，大家都不願離開。

「低能。」我也笑著玩，我終於明白Twins的歌詞到底有多厲害，這初戀的感覺到底要怎形容？

下課後，杰寧跟如素姨走了，我身旁換了個尚志來。我把和杰寧的事，第一個便告訴了他。

「你同杰寧一齊都係遲早嘅事，不過你自己都知佢阿媽管得佢好嚴。加上你又話驚俾佢阿媽知道你屋企比較複雜，驚佢以為你係邊青，所以自己小心啲呀。」尚志搭著我的肩說，兄弟關心說話，特別順心。

「其實仲有一件事，我都想同你講…」當我正想跟尚志說出，學校那個老師是我二姐的這個事實前，我又看到二姐出現在我的面前不遠處。

這次有點不同，她身旁還有一個蓄短髮的女人。