薛可正作品 - 回到過去，星晴擱淺，說好的幸福呢？: 46

「如素姨！」外面的潘靜雅提高音量的一句，很明顯是要通知傷殘廁所內的我們。我把頭靠著門，靜靜地聽著外面的情況。

「妳唔係話會睇住杰寧咩？點解佢自己一個喺廁所入面？」如素姨帶點責備的聲線去質問潘靜雅。

「佢話要開大，咁我冇可能喺入面等佢架嘛，阿姨。」潘靜雅故作自然的說著。

「我入去搵佢啦咁。」

如素姨說完了這一句後，我便聽到一輪又快又急的腳步聲，慢慢由近到遠的消失了。



「如素姨入咗正常女廁嗰邊，呢個女廁有兩個門口，杰寧妳二十秒內要跑到去另一個出口等我地。」潘靜雅在門外輕聲的跟我們說後，人便跑到女廁內準備接應杰寧。

「我要走喇，B」杰寧不捨的再一次抱著我。

「我好快會嚟，唔使怕。」

「幫我問候你媽咪…B…我好掛住同你行荃灣同周圍去食嘢。」杰寧說著，眼淚又開始忍不住。

「唔好喊喇，俾如素姨見到就大件事，去到英國，記得搵方法報平安。」



「我知道喇，我走喇。」

杰寧的手拉著門把手，臉轉過來看著我。這時我把臉也迎上了，往她的嘴裡狠狠的親下去。這深深一吻來得很苦澀，但卻讓我有一種已經成長了的感覺。

杰寧最後也離開了，剩下我一個人坐在一個傷殘廁所內。

「杰寧，妳去咗邊？點解我入廁所見唔到妳？」未幾，我又在聽到門外傳來那討厭的聲音。

「唔係呀媽咪，個女廁所有兩個門口，我搞錯咗去咗另一邊。」杰寧七情上面的解釋，聽得一牆之隔的我會心微笑。



「唔使講喇，我地去上機先。」

如素姨說完，又是一輪的腳步聲逐漸地遠去。我確認了她們已經遠去之後，我才慢慢的拉開大門。

門拉開，我看見一個更加落寞的尚志。

「做咩事呀？」我問尚志

「冇事…只不過我同靜雅講嘢，佢連應都唔想應我。」尚志坦白的跟我說。

「可能過兩個月東堯過英國，潘靜雅會對你好啲呢。」

「東堯過咗英國，咪又係到你煩…你估佢唔即時約杰寧咩。」

「到時我就會去英國架啦，唔好講咁多喇，我想去閘口嗰邊，離遠望多杰寧兩眼呀。」



「行啦咁。」

最後我們跑到一間餐廳的二樓，離遠的看著那個登機閘口。我看著杰寧跟潘靜雅擁抱，然後杰寧左顧右盼的看著四周，我知道她在找我。

終於，杰寧跟如素姨走進那個登機閘口內，我再看不到她了。

我失落的坐在地上，不懂得形容自己的心情。我感覺到即將要發生的事會有很多，有一些甚至會超出我能力可以應付的範圍之內。

未幾，我收到了潘靜雅的電話。三分鐘後，她來到餐廳的二樓跟我和尚志會合。

「杰寧去到會打俾我，到時我叫佢諗辦法同你聯絡。」潘靜雅向著我說。

「唔該哂妳，妳而家去邊，同唔同我地兩個食飯？」我故意製造機會給尚志。



「唔使喇，我有事走先，我再聯絡你啦。」

潘靜雅頭也不回的離開了，就連一眼也沒有看過尚志。我看著尚志的表情，老實說比我還要更悲傷。

那一晚，我輾轉反側的不能入睡，一直在想著杰寧的事。

然後，我以為自己的如意算盤會打得很響，但俗語有說道高一呎魔高一丈，我的赴英計劃遲遲未能落實，因為…

如素姨足足在英國陪了杰寧兩個月。