薛可正作品 - 回到過去，星晴擱淺，說好的幸福呢？: 48

大家姐的話，其實我沒有太聽得懂，我心裡覺得有租約在前，如素姨總不能做什麼事吧。就算她真的要強來，也不是一時三刻可以辦得到的事。

「佢話我唔見杰寧就冇事，我諗佢應該唔會反口掛…」我猶豫的跟大家姐說。

「咁你有冇見過杰寧？你話佢走咗，你有冇用msn搵人呀？」大家姐緊張的追問我。

「冇呀，佢阿媽貼身膏藥咁跟住佢，我兩個月冇同佢傾過偈喇。」

大家姐聽到我這個答案，人才稍稍的冷靜過來：



「總之你自己點都避開，影響到屋企嘅事就唔可以想點就點。」

「我知道喇。」

「天貿過幾日有個股東大會，佢阿媽應該會返香港，到時又可能有小動作，你自己小心啲。」

「返香港？」這是我內心的想法，如素姨回港，那不就是我去英國的好時機？

「知道喇大家姐。」



電話掛上後，我坐在沙發上陪媽看電視。一邊看，我一邊留意到媽的神情，非常的憂心。就連上一次跟爸見面的時候，我也沒有看過媽有這副神態，所以我知道她對收購這件事非常的擔心。

但如果如素姨回來香港，這就好是我去英國的好機會，我應該是去，還是不去？

「媽，唔使擔心啦，妳教過我，船到橋頭嘛。」我嘗試打開話題。

「點唔擔心，你書都未讀完，如果冇咗間舖仔，我同你日子點過？」

「我中五咯，我出嚟做嘢囉。」



「宜家讀到中五有咩可以做？」媽著緊的說，我也明白每一個父母總覺得孩子讀多少書也不會夠用的道理。

「肯做，唔會餓得死嘛，都係妳教嘅。」我搬出媽從小教我的人生道理來抵擋。

「衰仔，阿媽平時講嘢你有咁上心咩？」媽拍拍我的頭，安慰的說。

「識笑就唔好擔心喇，萬大事有妳個仔我喺度。」

「咁幫我洗咗今朝啲碗先。」

「得！今晚我洗埋地，妳早啲訓。」

第二天，我一早便去找尚志商量，因為機會好像距離我愈來愈近了。

「風頭火勢喎，你點走呀？」尚志分析我所有情況後的第一個問題。



「如素姨要開股東大會，我上網睇過喇，呢啲會有時會開一兩日，計埋來回時間，我過去幾日點都得啦。」

「咁你點同屋企人學校講？」

「我諗好喇，同阿媽就講學校有啲唔知咩師生營去幾日長洲，我每日打個電話返屋企或者舖頭電話咪得囉，冇來電紀錄架嘛；學校呢，我就話屋企有事，要請一個星期假，阿媽簽名就仲易啦，中二到宜家所有名都係我自己簽嘅。」

尚志聽完我的計劃，無奈的說：

「咁你自己都諗好哂啦。」

「尚志呀，咁我都有掙扎嘅，係想你俾小小支持同動力我嘛。」

「如果穿煲點算呀？你屋企同學校穿都冇所謂，如果杰寧阿媽知道點算？佢咁有錢加上宜家真係可能收購你地舖頭個商場仔重建，好大影響喎。」



「但我應承過杰寧，我一定要去見佢一次。同埋東堯呢段時間都唔知有冇搵杰寧，我晚晚都擔心呢件事呀。」

「唉，我錢都借得俾你，我有咩唔撐你丫。」

「好兄弟，我去全力對付東堯同見杰寧，你就留喺香港約潘靜雅。」

「得喇得喇，咪講到好似為咗我咁，哈哈。」

「哈哈。」

就幾天吧，經過跟尚志的小會議後，我心裡牢牢的扣起了這個信念。跑去英國一趟，待上幾天跟杰寧好好見面，把自己承諾的事都辦好後，再回來香港作打算。

而老天爺，也為我如箭在弦的計劃狠狠的推上一把。晚上當我回到家門前，剛好收到一個不知名的電話號碼傳來訊息：

「B，媽咪剛上飛機，佢會返香港兩個星期。 杰寧」