薛可正作品 - 回到過去，星晴擱淺，說好的幸福呢？: 59

59.

潘靜雅的質問，讓我有點詫異，我跟自己女朋友分開，妳犯不著那個表情吧。

「好多時發生咗，尚志冇同妳提過咩？」我問潘靜雅。

「冇，我只係知你話你會好好地咁對杰寧，唔會俾人搶走佢。」

「唔係我俾人搶走佢…係…」我嘗試解釋，但潘靜雅好像不太允許。



「咁你答我，係咪你冇再搵佢，你自己放棄段感情？」

想不到潘靜雅的問題又快又狠，最重要的是，她擊中了重心。

「係，因為佢阿媽唔會俾我地一齊。」我理直氣壯的說。

「呢啲你一早知，你而家先拎嚟做原因？」潘靜雅的聲線愈來愈大，大得連旁人也開始留意我們。我覺得奇怪，就算妳真的幫過我們，也不可以這樣子的審問，難道妳覺得我好好過嘛？

「妳咁緊張做咩？又唔聽人講，一埋嚟就審犯咁。」我忍不住，作了點零星的反駁。



「東堯而家日日同杰寧出去玩，你知唔知呀？我打電話俾你又唔聽，你到底想點呀？」

潘靜雅的一番話，勾起了我教意收起了個多月的情緒，這個多月來我每次想起杰寧時，都會看一下媽的傷勢。我要自己記住自己所犯過的錯，也要提醒自己不可以再犯錯，不可以再讓如素姨對我的家再做出什麼的事來。

這一個多月來我很矛盾，我知道不關杰寧的事，也不關我們感情的事。但這段時間我還領悟了，我們生存在這個世界，老早就被各種關係撕扯得不由自己。

我甚至，開始叫自己討厭杰寧。

「我知道，我喺英國時見到東堯，杰寧媽咪同佢好熟。佢係有錢仔，係一個幫到杰寧前途嘅男仔…最起碼，佢地門當戶對。」這一字一語，都說得我好心痛，但事實就是這樣子，我逞強什麼？我逞強過一次，但最後是落荒而逃。



「我都唔明你，親手送個女朋友俾人，你係咪男人嚟呀？愛情唔係咁！要堅守！堅守呀！」潘靜雅像傻了一般對著我咆哮，我完全不理解她的行為，直到…我慢慢想到一個重點……

「潘靜雅…妳一直有同東堯聯絡？」

潘靜雅聽到這問題，先是一頓，然後才稍稍冷靜的回答我：

「有…佢去英國咁耐，我都有打長途電話俾佢。」

「妳有打長途電話，咁點會唔知我同杰寧嘅事？」

「我冇問，我冇問東堯佢同杰寧嘅事…」

來到這一句，我終於明白了。

「我終於知點解妳咁嬲，亦都終於知點解妳之前一直咁幫我同杰寧。」



潘靜雅看著我，沒有迴避我的眼神。說到了東堯這個人，潘靜雅的感覺特別不同。

「妳唔想我同杰寧分開，係因為妳知道東堯鐘意杰寧，妳鐘意東堯，所以先幫我地。」

我字字鏗鏘的說著，想不到潘靜雅的回覆，是一個非常肯定的點頭。

「我鐘意東堯，我好鐘意佢，所以我唔打算放棄，最壞打算就係我都去英國讀書，日日都搵佢。我唔似得你，喺我屋企時講到幾鐘意幾鐘意杰究寧，最後都係一隻縮頭龜。」

「妳講咩呀？妳明咩？妳啲有錢女屋企有小小錢就可以亂嚟，妳明咩？」

「我唔明你，唔打算明你，問下你自己決定放棄前，你有冇盡過力？」潘靜雅說完，轉身便走。

我沒有吵下去，因為我知道沒有結果，我跟她們根本就是兩個世界，夏蟲又豈能語冰呢？



我拿出電話，發了一個訊息給尚志，胡亂砌了一個藉口給自己說先走了。跟著我便轉身往公共車站的方向走去。

才剛轉身，我看到一個女孩子在不遠的地方看著我。我認得她，是周藍光的妹妹，周琳光。