簡介

Do you hear the people sing?





(永不)過時短談《孤星淚》/《悲慘世界》2012電影版

唔......我諗左好耐,究竟應該點講呢套電影呢?佢既係經典,又係新作;既係好豐富好多野可以講,又好難好好組織去講。咁我就揀少少黎講算啦。(其實係我唔夠功力,廢事講多錯多)

處於一個動盪的年代,每個人都有使命。聽落好似好老土,講既,聽既都厭啦。但我夠膽講,仲有好多好多人係忽視呢D動盪,仍然係安睡於「母親」既搖籃之中。又或者好多人係曾經醒過,然而,善忙既人性使佢地又再沉睡。

戲中既警察Javert,為「法律」、「正義」,「正直」而生,與「罪犯」Jean Valjean追逐多年,最後亦為正義而死 (對迫害正義善良既Valjean愧疚自殺)。我地身邊既警察又點?佢地既「法律」係咩?「正義」係咩?

係一個悲慘世界裡面,我地更加需要團結,需要力量去對抗所謂既命運。戲入面既一班革命青年,佢地以性命為大眾爭取自由、平等,反抗極權。當軍隊打到黎既時候,佢地無力抵擋,要逃走既時候,其他民眾係邊?佢地就係關晒窗門,唔幫佢地躲避。連幾歲既革命小孩都要死係槍火之下。軍隊,作為執法者,咁就係正義咩?連一直堅守「法律」既Javert睇到都為之痛心。





音樂、旋律一向都好容易牽動人心。而呢套電影差唔多全部既對白都配上旋律,以音樂劇咁既形式黎唱出故事。有人會覺得咁會影響左電影感。但我自己就好喜歡。所謂電影感,亦都不過係自己比自己既枷鎖啫。最緊要係你睇完之後有咩感覺,套電影能唔能夠觸動到你,或者刺唔刺激到你產生一D想法。

值得一提既仲有戲中飾演旅店夫婦既Sacha Noam Baron Cohen同Helena Bonham Carter,個角色設計又好,佢兩個亦演得好出色,有喜劇感,又能展現到呢個世界總有D人會趁火打劫,混水摸魚。佢地唔一定有立場,只要有油水,佢地就會去抽。

最後,我覺得無論係呢套電影、原著,甚或係改編成動漫,都值得我地再三欣賞,感受一下悲慘世界。多謝!

已有 0 人追稿