豬籠車內的呂布: 《九》

一切準備好，我懷住不成功便成仁嘅決心作出絕地反擊，但到依家我仲好記得尋日所發嘅所有嘢，歷歷在目 ....


人衰係咪真係包埋打倒褪？呢一刻我可以答你「係。」


呢幾日為咗準備對付曹阿瞞條羚羊，搞到我身心俱疲，雖然一切都準備就緒，但硬係心緒不寧咁，好似有啲唔好嘅預感，去完同樂街參觀完之後，咁啱經過書報攤就諗住買本羊年運程書睇吓。


每年我都會買阿乜玲玲本咩年運程書，你一定會問點解我買乜玲玲唔睇阿長毛蘇？原因好簡單，一個字 — 就係乜玲玲好「腫」，「腫」到冇朋友嗰種，喺廣東話入面「腫」同「準」差唔多音，我哋信風水命理嘅一句講晒，即係迷信囉，長毛蘇瘦猛猛，一啲霸氣都冇，你睇下乜玲玲就唔同，肥腫難分，旺夫益子格，霸氣完全外露，所以我信佢唔係盲目咁信，係有根有據，好「囉直高」嘅，加上咁多年嚟我一帆風順，賣豬肉的又間唔中食人隻豬，所以睇乜玲玲一定冇得輸。






點知我搵嚟搵去都搵唔到本乜玲玲，淨係得阿長毛蘇同陽具命，想買咩就冇咩好撚唔老黎，於是我行遠小小，再去第二間睇吓，挑那星，又冇喎，有冇咁輪實黑啊。我係乜玲玲嘅死忠粉絲，係唔會背叛佢嘅，我抱住不見玲玲心不死咁信念，再喺大馬路度搵，見到有間街邊檔，就上前睇下，都係冇，卒之忍唔住問阿老細。


「老細，因乜解究今年本乜玲玲運程書咁撚好賣嘅？」


「你唔知咩？今年乜玲玲本運程書隨書送玲玲冚家靈閃卡揮春一張，如果集齊十張冚家靈揮春，仲可以換玲玲親筆簽名扑街合家剷一個剷走啲小人，所以啲人咪瘋狂搶購囉。」






「嘩，咁著數？我近期身邊都有個小人，如果有阿玲玲個合家剷就好喇！」


「後生仔你好撚彩喇，我咁啱有套限量版，裏面包括個合家剷同本特別版乜玲玲羊年運程書，我同乜玲玲熟先有，其他地方冇㗎，唔 ～ 見你印堂發黑，我哋行俠仗義開嘅，就讓畀你先喇。」


「老細，你真係讓畀我？真係出街遇貴神喇！幾銀啊？」






「三千八百八十八。」


「吓！你冇撚嘢嘛？三千八？」


「錯！係三千八百八十八，呢本好嘢限定八本，呢本係最後一本，阿乜玲玲仲特別開光，我諗住私人收藏，見你污雲蓋頂，好心先讓畀你咋，嫌貴就算啦～啦～啦！」


「這個嘛 .....」要用國語發音


「仆街！三千幾蚊買本書同舊膠？三千夠我去澳門玩個打令叔叔開心樂團餐喇，不過 ..... 我近期咁黑，阿玲玲師傅又一向咁睇我，貴就貴啲，當打咗個貴啲嘅冷震，睇完可能轉運呢？死就死啦！」我考慮咗一陣，最後都喺銀包度攞咗4K出嚟。






一手交錢，一手交貨，老細笑笑口找番啲錢畀我之後，仲好鬼有禮貌咁講咗句


「多晒，得閒再幫襯喎！」


我接過本書同個親筆簽名限量合家剷，頭也不回，急不及待衝咗去附近間老麥度開嚟睇，可能當時我太過興奮，完全冇留意到本書嘅封面上面多咗啲嘢 .....