豬籠車內的呂布: 《十五》

「九唔撘八，男人老狗叫乜也玲玲啫，痴撚線㗎！痴撚線㗎！買書都畀人呃，我就癲㗎喇！」


望住本「也玲玲羊年運程書」，都唔知好嬲定好笑，三千幾買本老翻，除咗話自己蠢同on9，都冇嘢好講，唉 ～ 呢刻我連撕爛本嘢都費事，隨便掉埋一邊，又再攤喺梳化度，一口氣隊多三罐啤酒。


氹氹轉、氹氹轉，個天花板不停咁旋轉，令我諗番起成件事，究竟自己做錯啲乜？我自視過高，目中無人？對拍擋仆街？食人妻，抽師奶水？定一切都係我唔好運、唔好彩？


我估應該係我唔好運啫，既然唔好運，諗個辦法去沖走晒啲衰氣佢 ～






「桑拿」


酒精影響下，個人開始有啲咸濕嘅念頭，一係唔諗，一諗就痕，既然心動，不如行動，我一向都係一個坐言起行嘅人，連件爛臭衫都冇換就開門行，腳步浮浮咁行去小巴站，咁啱有車，正想畀八逹通嗰陣先發現張卡冇錢，又冇散銀，連十蚊都冇張，即時鳩衝去中銀度撳錢。

插入提款卡，望住螢光幕，嘩 ～ 我好似帶咗3D眼鏡咁，啲數字立體到浮哂出嚟，我搖搖頭跟住輸入密碼，啲啲啲 ..... ，點解唔得嘅，明明係一六七六八九，點解會咁，我吸啖氣，再次輸入，點知又錯，雖然我有啲醉，但我肯定啱，唔憤氣下又再輸入，今次啱喇啩！






等咗陣，螢光冇出現我所預期嘅畫面，反而出現咗四行字，兩中兩英。


由於我患有「先天性英文抑鬱恐懼症」，所以唔知啲英文寫乜春，但當我睇完嗰兩行中文之後，我嘅乜叉恐懼症一下子消失晒。


「很抱歉，此機暫停服務」


此機暫停服務？！






「咩話？！食鳩我張卡？你冇撚嘢，呢個時候食我卡？你唔可以食我卡㗎喎，你食咗我點算啊？喂，答我啊！你以爲唔出聲我就奈你唔何呀？」


唔知你有冇類似嘅經歷，如果冇，你試幻想一下，當你一心諗住去食海南雞飯，滿腔熱血，個腦不斷幻想緊一陣點樣去食件雞 ～ 飯，正當你諗到出水嗰陣，六八九竟然戲弄你，同你講


「很抱歉，今日暫停活雞供應服務，你收皮啦！」


畀著你，你會點吖？我份人就好直接，今次真係忍唔住喇，我好似被螢光幕上嗰八個中文字落咗降頭咁，失去咗理性，發晒狂咁拍打部提款機，手腳並用，有小小似李小龍打木人樁咁，一邊打一邊屌。


「你快撚啲畀番張卡我，快啲啊！嘭嘭嘭，快啊！嘭嘭嘭 ...... 」






正常人都知食咗嘅提款卡係冇可能即時攞得番，但嗰刻嘅我係唔可以用正常方面去諗，因為我嘅腦海裏面淨係得四個字 ～


「桑拿 · 食雞」


夜闌人靜，周圍嘅人唔多，但唔多唔代表冇，啲路人甲乙丙丁戍見我發晒癲打部機，好自然報警同離遠食花生。經過佔中同佔旺之後，慈母嘅效率高咗好多，連我呢啲醉貓畸屎都唔駛五分鐘就到，兩位穿著整齊睡衣嘅慈母見我仲未停手，緊係嘗試上前阻止我啦！但好衰唔衰我又殺紅了眼，根本就不受控制，理撚你特首定特腳吖，照屌冇情講，咁嘅環境最後嘅結果係點，我都唔需要講。


兩位母親合力將我壓落地下，反抗係好自然嘅反應吖，係咪先？喂，有人㩒你落地喎，點撚知佢哋想點㗎，搞我個菊花仔點算啊，好撚難講?嘛，雙手畀人綁住，仲有咩可以做吖，緊係放飛劍啦，除此之外，仲可以做乜？妖 ～ 都話飲大咗失控咯，瀨屎瀨尿，好很正常吖，喂喂喂，講還講，咪屌人母親啊，告鳩你㗎！