報攤上面放滿左各大報章,本身冇乜出奇。
出奇既係,每份既頭條,講緊既都係同一單本地新聞。
「無名英雄深夜勇救師奶」
「香港驚現『蝙蝠俠』 黑夜後巷救婦人」……
仲有好多,都係類似咁既標題。我諗其他人睇到啲咁既頭條,一定會覺得好正好好玩。
但係我唔係。
因為佢地寫緊既,就係我。
 
我入去報攤隔離既個間茶記,坐係入面等緊我既係阿福。
見到佢手渣住一份生果報,睇緊個篇報導我既新聞,真係覺得好尷尬。




其實我都唔知自己尷尬啲乜,根本冇人知主角就係我。
 
「哇屌你睇下,吹撚到蝙蝠俠喎!啲報紙佬真係識吹。」阿福攤大份報紙比我睇,一路笑得好系。
「哈……」除左笑,我都唔知答佢乜好。
後來我後悔了。因為我笑得仲系過佢,一睇就知有野。
「你笑成咁做乜鳩?」
「冇……冇呀」
「冇?十足做左衰野比人踢爆咁撚樣。」
「其實……」
阿福好似聽唔到我有野想講,打斷我既說話:




「其實呢啲都係比人吹捧出黎既都市傳聞黎姐。正因為市民生活係水深火熱之中,但係商人當道,政府無能,我地只可以靠幻想呢種象徵性既英雄出黎,從精神上去安慰弱小既自己。哈,呢個世界邊有英雄?用啲力搵多兩餐晏仔仲好啦。」
我無語。
除左驚訝阿福竟然一句粗口都冇講過之餘,仲有讚嘆佢對呢個社會既面貌睇得咁透徹。係呢一方面,佢真係成熟過我好多,抵佢好景過我。
佢既一番話,不停係我腦海徘徊。
「喂!返來囉!柒頭。」佢推左我一下。「你頭先係咪有野想講?」
「冇野喇……」
我覺得係佢面前,我冇資格講任何野。
 
係屋企入面,我望住尋晚擦傷左既雙拳,一路諗緊阿福講既說話。
冇錯,呢個世界邊有英雄。




只有一班被社會壓迫到走頭無路既廢物,好似我咁。
所以我要向呢個社會報復!
我要打劫!
 
於是,我又再以尋晚既個身打扮,落街進行我既打劫行動。
不過今晚有兩個不同。
第一,我為自己加多左新裝備──兩支短鐵通同兩個鐵蓮花。
鐵通收於兩個衣袖裡面,綁係兩隻前臂既後方,臂與鐵通中間夾左海綿。因為尋晚個下手刀,令我知道我既手臂需要有一種可攻可守既武器保護。
至於鐵蓮花,唔駛講當然用黎鋤人。
至於第二樣不同,就係今日我係冇打劫既目標。除左包租婆外,我暫時諗唔到邊個抵比我打劫。
所以我喱左係一個街角度,等候獵物送上門。
 
兩個鐘頭過去。
條街除左前面一班MK外,乜人都冇。
仆你個街等到我好炆,曾經有過衝動想走出去打劫班MK。不過諗到佢地六、七個人一齊上,我實唔夠打,所以唯有繼續等。




等!我今次一定要成功!
 
皇天不負有心人。
終於有一對男女出現!
我興奮得已經唔想諗佢地抵唔抵比我打劫。我等左咁耐,幾大都要搶過夠!
當我準備行出去個剎那,我愕然。
我永遠都唔會忘記既個張臉,再次出現係我面前。
 
女神。
個對男女,就係女神同佢老公。
中學時同女神既回憶,一下子係腦裡面走馬燈般飛閃。
我差啲腳步都企唔穩。
 
我不嬲知道個天最中意玩鳩我,但我真係估唔到會玩到咁盡。
班MK攔住左女神佢地。




「哇靚女,夜媽媽走落街,等我地保護你,好過要呢條傻仔陪你啦!」
「喂!咪搞我老婆!」女神老公推開個MK。
「屌你老母咁撚串?我係要搞佢,吹撚我脹呀!」
個幾個MK分開左女神同佢老公。
佢地極力掙扎,女神一腳踢左落其中一個MK度。
個MK一巴摑左落女神度。
「仆街丫,我就係你老公面前輪你大米!」
 
見到呢幕,好多畫面係我眼前閃過。
女神雖然唔可以話靚到天上有地下無,但係我呢一世都唔會再覺得有另一個女仔靚過佢。
佢溫柔,笑得比天使還要靚。
我以前成日都直接叫佢女神。有次佢笑住問我:
「我係女神,咁你係乜野?」
「我咪係你既騎士。」
 




根本唔係。
我垃圾都不如。
當年我睇住佢比人摑,我冇保護過佢。
MK摑佢個剎那,時空就好似重疊起黎。
 
當「輪你大米」四個字進入我對耳,我終於忍唔住。