《我可以做你的樹洞嗎?》: 8.癡

當我望過去既時候，雯凱同我四目交投。佢二話不說，就即刻掉頭奔跑。

雖然我係後知後覺，但面對呢啲情景我都知發生緊咩事。

我即刻追過去，平時跑一百米只需要六秒幾既我，瞬間已經追到雯凱。

我一手捉住佢，佢亦都順勢轉過身，面向住我。

佢成面都係眼淚。



「點解你要夾埋曉凝一齊黎玩我喎?」雯凱一邊喊一邊講:「曉凝仲鼓勵我! 原來只係一個局!」

「我冇呀......我地冇呀......」

「我真係好鐘意你架......不過算啦，我以後唔會再煩你地，祝你地幸福快樂......」雯凱再次掉頭離開。

我又再次捉住佢。佢理解錯既野，我一定要解釋清楚。

「我發誓我同曉凝真係普通朋友黎架咋，我係由細識到佢大。你真係誤會左啦!」



「真係?」雯凱慢慢擦乾眼淚:「但我明明見住你地攬到實一實......」

「朋友都可以攬到實一實架姐!」眼見距離清白只剩一步，於是我攬實雯凱。

然後，佢居然一下錫落我到。

佢柔軟濕潤既嘴唇緊貼係我乾燥既唇上，就好似缺緊水行緊沙漠既我突然發現個天終於落雨咁。

但正因為雯凱係好女仔，所以我更加唔可以沉淪係呢種轉眼即逝既美好入面。



於是我狠狠咁推開佢。

但係，雯凱似乎冇諗過放棄，又再次想熊吻我。

今次我真係忍唔住了。

我緊緊捉住佢兩隻手，再放係佢身後。

「你真係完完全全誤會唒啦！」我真係唔知點講佢先會明：「我同你既關係只係朋友，我永遠都只會係你既朋友！」

雯凱望住我，我亦都望住佢。望左好幾秒。

突然間，雯凱掩住口笑。

「我d戲得唔得呀？」雯凱一邊講一邊笑。



「下？」

「我玩下你咋！」雯凱指住我個鼻講：「邊個會鍾意你呀？」

「哦......」事情突如其來既後變化令我有啲一頭霧水。

「喂......」雯凱轉身，背住我講：「我醒起我有啲野要做呀，我走先啦你幫我同曉凝講聲啦！」

講完之後，雯凱就一個人，行返落山。

* * *

我行返去個亭到集合之後，大隊又再出發行上山上。



而我就同曉凝行係大隊既最後面。

「樹洞呀樹洞，原來雯凱係做戲玩下我架咋！佢唔係真係鍾意我架！」我鬆一口氣，同曉凝講。

「係咩？」曉凝表情好似顯得一早就知道真相咁，然後又笑左一笑：「咁咪好囉？」

「梗係好啦！」講到呢度，我好似得到解脫咁：「我仲以為愛情會令雯凱癲到變左個痴女咁......好彩一切都只係佢扮出黎咋！」

「愛情真係可以咁癲，雯凱「玩」你既呢種，算係濕碎野啦。」

行到龍脊山山頂既時候，已經係黃昏五六點。我地一群人一齊影完相留念後，都各自各同自己相熟既朋友一齊傾下計丶影下相。

曉凝算係個世界女。好受大家既歡迎，所以好多人都搵佢影相。見到佢上到大學後，比中學時更加受人愛戴，作為佢朋友既我都覺得幾開心。

反而，我就唔係世界仔，什至可以用孤僻黎形容。雯凱話有事走先之後，呢堆人就只係剩返曉凝係識同埋熟既。而我偏唔鍾意群人堆，所以只好等曉凝影完相後，再睇下有冇時間陪我坐下。



我搵左一個崖邊既位置，雙腳半天吊咁坐係地上。

微風陣陣吹過，身邊樹上既雀仔又係到吱吱咁叫，望住遠方正落下既夕陽既我，慢慢感到倦意......

* * *

「喂！」一把女聲係遠方傳黎。

四周白茫茫一片，我唔敢亂走。所以只好循住聲音傳黎既方向走過去。

「喂！」我越行越近，聲音亦都愈黎愈大聲。

原來係曉凝叫緊我。



「喂！」曉凝塊面幾乎貼實我塊面咁講：「洗唔洗等我等到訓著左呀？」

曉凝突然貼到咁埋，嚇到本來訓係草地上既我彈起。

然後一下撞左落佢個鼻到。

「次次都係咁！細膽鬼！」曉凝摸實個鼻，好似痛到眼淚水都標埋。

「哈哈......」我只好苦笑：「影完相啦？」

「影完啦......」曉凝緩緩坐係我隔離既草地上：「其實我唔係咁鍾意同人影合照......」

「我知呀！你鍾意影風景相丫嘛！」我將曉凝交俾我暫時保管既相機俾返佢：「我幫你影左好多架啦。」

「嗯。」曉凝接過相機後，將佢掛係頸上。

「有心事？」我望向曉凝。