《男人只係想做妳身邊的一隻小丑》: 第六章
我還在為遺忘了燈神紙巾一事自責，我拿起電話想致電子牽向他道歉，正在此時，熊貓踏進學校門口，我身旁的KIKI迅速站起來熱情地向熊貓打招呼。
「早晨，可頌SIR!」KIKI高聲地說，
「早晨KIKI。早晨銀銀。」熊貓彬彬有禮地點頭。
「今天辛苦你了！」KIKI說。
KIKI真的很適合當接待員，無論上一刻我們在聊甚麼，每當有導師或學生踏進學校門口，KIKI可以很快進入狀態，熱情地招待他們。
我懷疑今個月學校課堂的報名人數飆升，都要歸功於KIKI。
「早呀熊貓。」我拿出更表遞給他，逐說：「今天你總共有三班，第一班上堂時間是10:15-11:45am，接著是12:30-2:00pm，食完飯之後回來上第三堂，3:00-4:30pm，之後就可以放工啦！」
「唔該銀銀。」熊貓在更表上畫了一個「頌」字。
熊貓看一看錶，他見距離上第一堂還有些空閑時間，所以他想在接待處逗留多一會。
「你今日收工有無野做？」熊貓問我。
「咪又係番屋企對住四面牆同埋個電話…」我擺出一副納悶的表情。
「咁慘牙？咁我約你，你賞唔賞面先？」熊貓這麼直接地約會我，讓KIKI覺得很驚奇。
「哇，都好耐無試過有人接收工啦喎，緊係賞面啦！不過…」我看一看手上的更表，猶疑地說：「不過我本身5:30pm先放工喎，如果早走，就要留低KIKI一個睇舖同收舖喎…」
我望向KIKI，發現她很留心地聽我和可頌的對話，而眼睛瞪得很大。
KIKI接上我的眼神，突然回神過來，她托一托眼鏡，說道：「唔緊要呀！我OK呀！你地去玩啦！」
「真係OK? YEAH!」我開心得拍起手來。
「KIKI真係好，又可愛，又善解人意。」熊貓溫柔的說，而KIKI少有地露出害羞的表情。
*********
大概4：45pm，我和熊貓步出學校的門口，我抬頭望向天空，天色比平時更陰沉，而且一陣霧氣彌漫在天空中，我猜今晚一定會下一場雨…
我們走進地鐵站，
「係呢，熊貓哥哥，我地去邊呀？」我一邊問，一邊伸手進手袋中搜尋我的傘子。
弊…無帶遮tim…
「返城大。」熊貓淡然道出。
「下，無啦啦返去做乜？」
「我想回憶下以前既事，仲有…我要返去搵一樣…好重要既野…」
「咁你自己去都得啦，關我咩事喎…」
「喂，你係咪咁呀？咪當你陪下我我陪下你囉…幾大我都叫做係你半個阿哥丫！」
「哦…講呢d…」
半個阿哥…
*********
我想起，在柔柔大學一年級的萬聖節，為了增添節日氣氛，柔柔和我在宿舍入面佈置裝飾，當然還少不了四眼仔王可頌。
我是由那次開始留意到，柔柔稱呼可頌的時候，會叫他做阿哥。
「阿哥，幫我拎d糖過黎丫，我要裝滿呢個南瓜籃！」柔柔叫道，可頌隨即遞給她幾包未拆開的糖果。
「喂！王可頌，你幾時做左柔柔既阿哥架？」我的眼神帶有敵意，盯著可頌。
「拿，我我都係被逼架ja！」可頌聳聳肩，逐道：「你要問下你家姐啦！」
「柔柔解釋一下好喎！」我脹著臉，擺出一副不滿意的樣子。
「阿珍同可頌換左房丫嘛，咁阿珍同阿強係一對既，咁其他人好容易誤會我同可頌既關係架嘛…」柔柔大條道理地解釋著，「咁所以我咪同其他人講，可頌其實係我表哥，咁d同學咪唔會誤會囉。咁做戲做全套丫嘛，嗌嗌下表哥覺得煩，咪直接嗌做阿哥囉…」
「銀銀，你唔想有個阿哥咩？」柔柔問我，
其實心底裡，我也渴望擁有一個哥哥，而且可頌這麼知識廣博，我可以問他好多關於大學的事，如果我有心儀的對像，又可以跟他傾訴，請教他與男仔相處之道。
「係既話都幾好既…」我低聲說。
「係牙，咁仲唔快d叫聲阿哥。」柔柔先繞著可頌的手，高呼著：「可頌哥哥！」
接著我又跟著繞他另一隻手，喊他：「可頌哥哥！」
可頌沒好氣地對著我們笑。
「係啦阿妹！」可頌先推開柔柔的手，說道：「佈置左咁耐，阿哥要做功課啦，你地兩個自己傾下少女心事啦！」
就是那天開始，可頌成為了我和柔柔的哥哥，直至今天我還會繼續稱呼他做哥哥，只不過是變了熊貓哥哥。
*********
地鐵列車行駛觀塘線，載著我們到達九龍塘站，我們離開月台，出閘後我在7仔前停下來，我告訴熊貓我要買把傘子，我問他要不要都買一把傘，他沒有回答我，只顧望著其他商品，我猜他已經帶了傘子，所以我從貨架取了一把傘，走到收銀處。
而熊貓，仍然在凝視著貨架…
**********
柔柔大學二年級的平安夜，全個宿舍都很靜，因為大部份同學都回了家放聖誕假。
而柔柔和可頌都不約而同地留了在宿舍，皆因兩人都沒有甚麼特別節目。
可頌在上高登看小說，而柔柔則躺在床上，動也不動。
過了一會，可頌完成了一個故事章節，他伸了一個賴腰，接著閉關了視窗，他也意識到柔柔而開始移動。
可頌看見柔柔拿起了手機，撥了個電話，但對方好像沒有接聽。 柔柔一手丟掉手機，罵了一句：「衰妹，有異性無人性！」
可頌大概估到柔柔要找的人是銀銀，而且他知道銀銀正在和一個叫阿衛的男生交往中，現在，銀銀一定正在與情人歡渡這個毫不平安的平安夜。
「喂，柔柔，八點啦啵，一唔一齊落canteen食個飯呀？」可頌問。
柔柔依然一動也不動，被窩裡傳出一把沙啞的聲音。
「我唔去啦…咳…」柔柔好像很不精神，「好辛苦呀…」
可頌走到柔柔的床邊，說道：「你無事丫嘛？病左牙？」
「我…我黎M呀…」柔柔揭開被單，一雙水汪汪的眼睛望著可頌。
「陰公囉…而家見點呀？」可頌蹲下來，一手按著柔柔的額頭，另一隻手按著自己的額頭，在檢查柔柔有沒有發燒。
「我頭好d暈…成身又凍…又無力…個肚仲好痛添呀…」柔柔快要哭出來。
「我有咩幫到你？有無食藥？」可頌開始有點焦急地，
「無食藥呀…」豆大的眼淚從柔柔的眼睛跌了出來，可頌連忙拿了幾張紙巾幫柔柔抹掉眼淚。
「你唔好喊啦…我即刻去7仔幫你買藥！必理痛止痛藥，呀，好似有d係特登止M痛架！交比我！好快番！！！！！」
柔柔點點頭，可頌一個箭步就離開了宿舍，跑到7仔買止痛藥。
那一晚，他買了7仔的麵包給柔柔送藥，自己卻忘了吃晚飯。
**********
我走出7仔，回到熊貓身邊。
「我買完啦！」我呼喊了一聲，好像把熊貓從思憶中驚醒了。
「哦…咁我地行啦！」熊貓繼續領著我走。
「乜能得利個廣告真係咁吸引咩？你望左咁耐…」
熊貓沒有理會我，我一邊走著，一邊哼起「新年能得利」廣告的主題曲。
「能得利~能得利~全盒梗有能得利~哈哈~」我繼續自得其樂，但身邊的熊貓完全對我聽而不聞。
我們走到通往又一城的出口，在商場10號舖旁邊乘上電梯，連接商場和城大的時光隧道隨即映入眼簾。
我們一步步走進時光隧道，時間一秒秒在倒數。
*********
時空回到大學三年級的新生註冊日。
可頌和柔柔今年已經變成師兄師姐，他們在城大的門口位置當值，一邊為新生們指引路向，一邊為他們的宿舍招攬新生。
他們駐守的攤位只有一張檯一張凳，旁邊擺放著一個易拉架，易拉架上面「男女同層」四個字吸引了很多男生的目光，但很明顯地，他們只敢看，又不敢上前詢問。
「可頌，不如我地猜包剪dup決定邊個可以坐丫？」柔柔提議。
「好呀。」 可頌輕快地答應。
「黎啦，一、二、三！」 柔柔興奮地嚷著。
柔柔出的是包，而可頌原本也出包，但他慢慢地合上手指，他的手握成一個拳頭。
「啊！可頌你出彈弓手！」柔柔抗議道。
「邊度有呀？你出得快ja！」
「咩呀，我咪數到三既時候出囉。」 兩人繼續嚷著。
「我都係囉！」可頌說，「不過算啦，你話我慢出就慢出啦！況且我慢出都輸，係抵罰既……」 可頌有風度地拉開凳子，對柔柔說：「你坐啦！」
「好野！」柔柔擺出一副洋洋得意的樣子坐下來，逐說：「我都唔會待簿你既，我坐半個鐘之後到你坐啦！」
「我幾時都覺得柔柔係最好既。」可頌由心的說出。
柔柔一邊整理檯上面的校園地圖單張，有感而發的說：「點解year 1既時候又唔見有師兄師姐o係度當值既？有呢d地圖方便好多！」
如果當初有地圖，你就唔會需要我啦…可頌在心裡想。
「如果有咁多師兄師姐呀，我就唔洗同銀銀搵路搵得咁辛苦啦！」柔柔繼續埋怨。
「哈哈！乜你有份搵咩？ 」可頌嘲諷柔柔，「係得你個妹o係度搵之嘛。」
「咩無搵呀，我都有份搵架！」
「有，有搵呀，你搵果個唔知咩C丫嘛。」
此時一個又高大又靚仔的男同學在攤位前掠過。
「哇！係都敏俊C呀！」 柔柔呼叫。
「係囉，就係果個咩C囉。」可頌仍然沒有發現。
柔柔興奮得跳起來，伸手指向前方。
「唔係呀！真係佢呀！我見到佢呀！！！！」柔柔喊道。
「下，o係邊呀？」可頌故作冷靜。
「呢…前面果個呀！又高大又靚仔果個呀！」
可頌冷笑了一下，說：「咁巴閉！咁你仲唔豁…豁出去，去認識下佢。」
「我主動去牙？好似唔係咁好…」柔柔低聲的說，她忽然變得內斂、不敢妄動，但眼睛一直盯著「都敏俊C」不放。
柔柔看見「都敏俊C」正被一群小妹妹圍著，那些小妹妹應該是今年的新生，她們每一個都是穿吊帶、小熱褲，對比自己身上那件端莊的工作人員Tee和下身的牛仔褲，簡直是比下去。
她當刻沒有行出去，她沒有這個膽量，唯有求天賜給她勇氣。她自言自語說：「咁啦，我數五聲，如果陣間見到第一個穿過時光隧道既人係男仔，我就過去同『都敏俊C』講野！」
「仲要賭牙？人地走架啦喎。」可頌見「都敏俊C」和他的fans向圖書館的方向慢慢移動。
「我信緣份天注定丫嘛。」柔柔內心雖然焦急，但還是堅持要賭一場。她說：「我地隔左兩年都可以o係同一個地方撞番，我就知道我地一定好有緣份！」
「玩緣份天注定？好，咁我又陪你賭。」可頌說。
「你賭咩呀？」柔柔好奇問，
「如果陣間第一個穿過時時光隧道既人係女仔，我就同一個靚女表白。」 可頌向柔柔投了一個堅定的眼神。
「好，一言為定！」
柔柔怕「都敏俊C」真的離開自己的視線，她急不及待開始倒數。
「五、
四、
三、
二……
一…… 」
**********
我和熊貓走到城大的門口，我問熊貓：「咁果一次賭注，最後穿過時光隧道既人係男仔定女仔？」
………
……
...
「係男仔。」
熊貓看著城大的門口，眼神流露出淡淡的遺撼及無奈……