《結婚，從來都唔係兩個人嘅事》: 03

決定好去邊影相，我哋就著手安排，到臨出發前，我先同我家姐阿妹單咗聲。

「過兩日我同晴去台灣影pre-wedding呀！」

「你同老豆媽咪講咗喇﹖」

「有同媽咪講過想同阿晴結婚囉，但你知佢不嬲都唔係好鐘意阿晴㗎啦。所以嗰次講完都好似無乜結論。所以我今次剩係同佢講話去台灣旅行咋，費事佢又喺度煩住哂，又乜又物。」

「我諗你都係同媽咪講吓先好喎，費時到時佢話你先斬後奏，唔尊重佢啦。」我家姐幾年前已經結咗婚，我其實好應該聽佢意見，不過我嗰陣就係唔想比阿媽煩，你知啦，男人就真係最怕煩。





於是我話﹕「咪講咗比佢聽我會同阿晴結婚囉，係佢聽唔入耳咋嘛。」

「總之你做啲咩之前都係同佢哋講聲好啲。」

我心諗，老豆不嬲都唔多理我，阿媽我又當講咗，都係返到嚟直接比相佢哋睇算數。



 
就係咁，我同阿晴就過咗台灣幾日影婚紗相，過程好順利，最後出嚟嘅相都好靚，阿晴好滿意(好彩......)，唯一美中不足嘅就係當阿晴po啲相上facebook之後，個Jessica同Chrissie話台灣又cheap又剩呀，咁當然有其他人從質素出發，讚啲相靚。我心諗，呢啲咪良師益友囉，我就差啲忍唔住要阿晴unfriend Jessica同Chrissie。不過阿晴份人就係太善良，就咁講句﹕「各花入各眼啫。」就算數。





之後有一日返屋企食飯，我哋就攞啲相出嚟比屋企人睇啦，家姐阿妹睇完都大讚啲相好靚。老豆睇完就問咗句我哋諗住幾時結，搵人同我哋擇日，又話要同親家食餐飯傾吓禮金啲嘢。阿媽睇完就面燶燶咁，好似係怪我去影結婚相都唔同佢講咁。嘩大佬！我第一個就話你知我想結婚啦，係你當我鳩噏咋嘛！



 
家姐見老媽子臉色不善，即刻同我打咗個眼色，我亦都醒水食飯時夾多啲餸比佢，比家用又塞多啲比佢，終於佢條氣睇落都順返哂。我同阿晴亦成功mark定兩老同阿晴阿媽食飯嘅時間。