《我炒咗車之後入廠訓咗四年覺》: 屋企嘅常客
(貓仔小時回憶)
今日係星期日，晴晴食完飯之後又去咗揾貓仔玩喇，睇佢個樣都知佢冇嘢做悶到傻啦。
"叮噹！"
同平時一樣，晴晴首先禁一禁鐘，然後喺門口隔嚟暱埋。
貓仔就擔張矮櫈望吓個防盗眼…
咦？冇人嘅？奇怪…
貓仔就以為冇人，唔理佢。
"叮噹！叮噹！"
又嚟？？
貓仔再裝裝防盗眼…又冇人嘅？！
究竟係邊位？
今次佢決定打開一條門隙，小心翼翼伸個頭出去睇吓。
點知…
"哇！" "哇！"兩聲。
不過一個係彈出嚟嚇人嘅女仔聲。
而另一個呢，就係比人嚇親嘅男仔尖叫聲喇。
貓仔：哇你嚇死人咩！
晴晴：嘻嘻！
雖然大家都已經係小五，心智上比以前成熟唔少，不過晴晴仍然保留住細個果陣時嘅童真…
只係喺貓仔面前。
貓仔：順手幫手閂門吖…唔該！
晴晴一入嚟，貓仔養嘅貓貓阿花就走埋去晴晴道。晴晴作為貓仔屋企嘅常客，阿花已經同佢混熟咗喇。
晴晴：喵、喵~~
阿花就一直都倚住晴晴。
晴晴：貓仔~你喺度做緊咩呀？
貓仔：咪砌模型囉…
晴晴：又係巴士？
貓仔：冇嘢做嘛…咪搞埋佢囉，我想今日埋尾呀…
晴晴：我嚟幫你吖！
貓仔：好呀！你一陣幫我上色吖，我仲要買貓糧…
不過，通常晴晴上完色嘅製成品都要貓仔執執啲手尾先搞掂，晴晴佢真係呢…
OMG！佢果然有特別嘅上色技巧！
====================
"叮噹！"
或者晴晴察覺到我心情唔好啦…今次晴晴冇刻意去嚇我。
一開門，只見晴晴嘅屋企鐵閘開咗，佢喺入面好忙咁準備攞啲餸過嚟。
我：我嚟幫手吖！
晴晴：唔駛喇！你啱啱先出院…
我：我好返哂嫁喇！
晴晴：得啦唔駛！
晴晴整咗一味係蒸肉餅，佢一唔小心…
晴晴：吖！！！
我：都係我嚟幫你啦…！
晴晴：唔該哂…
之後佢係咁吹吹吹隻手指…
唔駛一陣就擺好飯餸。
我：有冇事呀？？
晴晴：仲係好痛！
我埋去，捉住佢隻手一路吹吹吹吹吹…
我：好啲未？
呢個時候我望一望佢。啊…
紅蘋果！
晴晴：好…好返好多喇…
我：咁就好…準備食飯喇…
講完我行埋去飯枱，懶有紳士風度咁幫佢拉櫈。
我：晴晴食飯。
晴晴：貓仔食飯。
我一路食食吓，不知不覺間又流咗滴眼淚。
傷感嘅係，以後都冇得再試下爸媽嘅手勢。
但感動嘅係，以後晴晴仍然會同我一齊食飯、試下佢手勢…
同埋好耐冇食佢煮嘅飯喇！
晴晴：咦？做咩呀？
我：冇嘢…
吖衰妹，你整嘅肉餅又好食咗喎！
定係我太耐冇食過醫院出面嘅嘢呢？
