####################

喺我記憶之中,我好似係小二暑假果陣先至搬去貓仔對面單位。 


我出咗世之後冇耐,我爸爸好似就因為末期cancer就死咗,留低咗我地兩母女。而爸爸又係我地嘅經濟支柱,佢死咗冇耐,我地就要揾定屋搬。最後我地都算係好好彩租到間劏房,同時開始排公屋,最後就嚟咗呢度。 

初初搬到嚟冇耐,我就遇到一個好奇怪嘅男仔。話說果陣我好似睇緊電視,睇睇下阿媽咁啱去咗廁所… 
=16px====================


"叮噹!" 



我地啱啱先搬嚟,究竟係邊個會嚟揾我地呢? 

啊媽又去咗廁所… 

好喇,等我去睇睇先… 

呃咪住! 

阿媽教落要鎖好條防盗鏈,等我鎖好先! 



跟住我開門睇一睇… 

我:揾邊個呀…咦? 

個男仔我唔識嫁喎… 

男仔:咦?小白呢? 

邊個係軒仔呀?冇呢個人喎… 



咦?阿媽出嚟喇喎…都係交返比佢先… 

我:媽媽!!!! 

佢喺出面講咗幾句就返入嚟。 

我:媽媽…咩事呀? 

媽媽:冇…揾錯人啫…


====================


之後,我媽媽機緣巧合之下同佢地一齊做咗朋友,有時仲拉埋我上去一齊食飯。 




我最記得我第一次上去食飯,佢第一句竟然同我講… 

"咦軒仔?你係咪變咗身做女仔上嚟我屋企呀?" 

男仔爸爸:邊係吖!人地早就搬走咗喇!呢個女仔係啱啱搬過嚟一陣咋! 

我而家周不時都記返起呢件事…真係笑死朕! 

男仔媽媽:喂~人地仲未知道你係邊個喎… 

男仔:吖…係!我叫張紫霖,你可以叫我做霖霖。 

我:我叫…唐皓晴…你叫我做晴晴吖… 



其實嗰陣嘅我真係好怕醜嫁… 

霖霖:不如我地握個手做個朋友吖? 

霖霖伸出手向我擺咗個露齒嘅笑容。 

就係咁,我就多咗個童年玩伴。 

其實點解我會叫佢做貓仔呢?係有原因嘅。 

話說大約小三小四果陣,我喺佢身上發現咗一樣嘢。嗰陣佢夜晚周不時都會去公園餵啲流浪貓。 

有一次我問佢… 

"喂霖霖…點解你要去餵佢地嘅?" 



"佢地冇人餵嘢食,又冇屋企住,好慘嫁…" 

後尾佢好似仲捉咗三四隻返去養,佢屋企就多咗小貓三四隻。 

原來佢好鐘意貓嫁…之後佢就多咗個花名喇… 

係我先會咁叫佢。 

果陣我搬咗屋冇幾耐,我就入咗某間小學,估唔到原來咁啱入就咗佢果間!於是我地嘅關係就唔止係鄰居,仲進化成為同學。 

亦都因為咁,我同佢喺生活上開始都多咗唔少交流。一齊返學放學、一齊食飯、一齊做功課、一齊溫書、一齊玩…小學最後兩三年仲要做埋同班同學。 

嗯,講吓我對佢嘅感覺,最初我都只都當佢係個最好嘅朋友、兄弟。只不過小六果年發生咗啲事… 




====================




唔知點解喺我地嘅學習生涯,總會遇到啲不良學生。呢一年我地班就有個肥仔,成日喺度蝦蝦霸霸。咁有次小息我就去廁所,咁啱個肥仔就行入嚟…一下撞到我跌低咗! 

我:做咩無啦啦撞落人度呀?! 

肥仔:我鐘意呀!吹咩! 

我:你…你好過份呀! 

肥仔:唔妥呀?打我吖笨! 

貓仔:好喇喎你!你蝦夠人未呀?! 

肥仔:未喎! 

貓仔:未吖嘛…? 

我估唔到貓仔會咁樣出招…佢一出手就揸住肥仔…果度,揸到實一實!!  

貓仔:蝦夠未?仲駛唔駛我揸上啲? 

我睇住貓仔愈揸愈上,準備張大啲隻手揸埋…常識書見過嘅果兩粒嘢!  

肥仔:呃…大…大大佬冷靜啲!!我唔再恰佢喇ok?? 

我對佢嘅好感居然因為佢咁樣幫我出頭而產生… 


====================


之後我同佢都經歷咗好多好多事,一齊小學畢業,一齊入同一間中學。原本我地應該繼續一齊讀到畢業,點知佢form 2之後… 

我曾經問過老師,但係佢只係話貓仔炒咗車…之後我去佢屋企,點知又已經冇哂人… 

佢粒聲唔出就消失咗,嗰陣我真係好唔開心,諗過呢一世都唔拍拖嫁喇… 

估唔到,中學臨近最後一年果陣,居然比我撞返佢! 

佢比以前真係高咗成熟咗,不過都瘦咗同殘咗好多… 

而且原來呢段時間,佢嘅經歷仲痛苦過我。 

其實佢返嚟果陣,我睇貓仔個樣都知道佢有唔開心,不過… 

我都唔知原來係咁大件事。 

我話就話唔介意做一個聆聽者,但係佢同我講佢炒車嘅事果陣,我真係一時間唔知點安慰佢好… 

喺佢覺得落寞嘅同時,我都覺得個心真係那住那住… 

而家佢只係得返我一個陪佢,我真係好希望,以後我都可以一直陪住佢開心同唔開心… 

####################

已有 0 人追稿