《我炒咗車之後入廠訓咗四年覺》: 出海去旅行
我：喂！三姨丈！
三姨丈：霖仔！好耐冇見喇！近排點啊？
我：咪又係咁！
三姨丈：有冇溝到女啊？
我：哈你講呢啲！
三姨丈：係呢，打嚟做咩啊？想約出嚟捏吓車遊吓河？
我：係遊河喇，不過唔係捏車，係遊船河。
三姨丈：遊船河？
我：我遲吓班會旅行，想借你架船去長洲旅行啫。
三姨丈：哦，所以你就想揾我幫手揸船？
我：that's it！
三姨丈：咁你地幾時啊？我睇睇我得唔得閒啊。
我：下星期五。
三姨丈：下星期五…啊唔得！我同咗你姨媽去旅行！
我：啊…咁…
三姨丈：我教你揸嘞，星期六一齊lunch，之後我教你嘞。
我：啊？我揸？得唔得㗎？萬一黃咗…
三姨丈：你估揸車咩！咁容易睇得出？
我：哈哈，又係…
=====================
晨早8點7，我就到咗灣仔遊艇會。
又要行咁遠去灣仔再兜返去愛秩序灣，麻鬼煩！
泊定喺筲箕灣避風塘咪好囉！
唉…算喇！開船！
由預備開船到入避風塘，用咗大約三四個字。入港果陣，電話響起。
我：喂？
"你到邊啊？"
哦…係班會主席。
我：水中央。
主席：水中央？你搭緊船嗎？
我：誒…
四面環海…水。
我：算係嘅…
主席：唉你盡快啦！再遲啲嘅話就要全班人等你嫁喇。
我：你地轉頭見到一架白色遊艇泊岸就上嚟啦。
我開始沿住岸邊揸。上落位置唔多，我好快就揾到佢地。
我將遊艇泊岸，同學準備魚貫行上嚟。
呢個時候電話又響起。
我：喂？
主席：我地上船喇，唔見你喺艇上面嘅？
我見到主席啱啱入嚟身後嘅室內空間，於是我就cut線。
我大叫：喂！
主席：啊…原來你喺度…開船啊？！
我：係啊！
主席：呃…好彩我老母一早幫我買咗意外保險！
我：點解咁講？
主席：驚你揸到出意外啊！
我：會唔會係咁！
主席：講笑啫…
呢個時候，又有幾個女仔同結衣入嚟。
"喂！chilam！"
我：hi…
結衣：原來你連揸船都識啊？
我：我新手嚟咋！
結衣：哎吔chilam你真好叻叻啊！
我：邊係！
結衣今日着咗一襲淺黃色連身裙。
我：by the way，你今日着得好靚。
結衣：多謝…
然後我大聲問：Hey guys！人齊未？
"人齊！"
我：ok！你地揾人幫手搬過爐出嚟上頂層先！我帶你地去搬…
第一個節目，就係開壇BBQ。
其實開壇真係唔係好難。
不過啲男同學大多都係唔係好識透爐，炭都係亂放一通…
佢地仲自備咗報紙、火機、炭精，但係好似都搞唔掂，…
我：呃！炭唔係咁疊嫁…等我嚟啦！
男C：喔…唔該。
我：我有火槍啊，我嚟啦。你地同其他女仔行開啲，我驚啲火花彈到你地。
有火槍，效率高好多。
"嘩…你好叻啊！"班女仔讚歎。
我：哈…真係咩？其實唔難嫁。
我：大家搞掂啦嘛？let's go！！
我返落去駕駛席。
"噗噗噗噗噗噗…"
之後係一段引擎嘅交響樂。