《我炒咗車之後入廠訓咗四年覺》: 渡假屋嘅節目
實際上，我地係各自各去買料嘅，所以大家都唔知其他人買咗乜。
我都係買返自已鐘意食嘅嘢先…
都係芝心丸、芝士腸、肥牛、生蠔、鮑魚仔、蟹柳果啲啦，每樣買十三四個人嘅份量。其他料等佢地買啦。
四個字後，我地同傑傑約好咗喺碼頭等。
傑傑：咦，返嚟嗱…嘩！
我：哇！結衣你…！
生根水餃魚皮餃雲吞蝦丸蟹丸牛丸貢丸豬肉丸墨魚丸墨魚仔魚蛋蝦仔蝦滑元貝芋絲豬紅象拔蚌…
結衣：好重啊救命…
傑傑：比我，我幫你攞。
我：比埋我喇，咁鬼多…
結衣：唔該…
我：係呢，你確定我地食得哂？！
結衣：我諗住邊樣鐘意食就攞啲，結果…
我：唉，明喇…
傑傑：吖係呀，佢地揾到房喇，我帶你地去吖。
結衣：好啊，唔該哂。
傑傑帶我地去嘅房唔係好遠，就喺東灣泳灘附近。
"嘩！買咁多！食唔食得哂啊？！"
呢句係我地上到去，第一句聽到嘅對白。
我：都話你嫁啦！
結衣：咁…食得哂咪得囉！
====================
水一滾，成班人立即化身餓狼。
我都落咗幾隻鮑魚仔，之後趁佢未熟就再烚啲肥牛蟹柳…
正！
咦？鮑魚熟喇喎，夾咗先！
結衣都夾咗舊鮑魚，剝殼又剝得快過我。
之後佢竟然…成舊食咗！
我：喂結衣！你第一次打邊爐食鮑魚呀？
結衣：係啊！
結衣一路一路答。
我：鴨屎綠色果舊嘢唔食得㗎！！
結衣： 吓？點解啊？
佢停咗口。
我：果個膽嚟嫁，乜鬼污糟嘢都喺哂裏面嫁。
結衣立即吐出嚟，一舊鮑魚同鮑魚膽嘅混合物。
結衣：哇！好彩你提一提我咋！
啊wing：咁結衣咪即係爭啲食屎？哈哈哈！…
有啲同學一聽到食屎，即刻笑咗出嚟。
傑傑：乜你咁衰嫁！人地第一次食咋嘛！
wing嫂：咪係囉！咁衰嫁bb！
之後我又逐啲逐啲咁落哂啲蠔。
最後食淨一隻蠔。
我同結衣同一時間去夾佢。
結衣：喂！我夾先嫁！
我：鬼係！我夾到先嫁！
結衣：你都食夠你個份量啦！
我：咩有計份量嫁咩？我唔知嘅？
結衣：…哼！
正當我仲以為成功咗，得意洋洋咁夾起隻蠔…
結衣一下伸個頭嚟，食咗我筷子上面隻蠔！
"WOE！！！"
我：喂！！！
結衣：oi~shi~~~！！
我：好衰啊！咁樣搶嘢食嫁你！
隨住大家愈食愈多，可以碌嘅料都愈嚟愈少。
淨低一粒雲吞。喺結衣伸手想夾果陣，傑傑已經夾咗。
結衣不禁流露出失望之情，但係比傑傑發現咗。
傑傑：想要？比你囉。
結衣：多謝！
====================
當初結衣買咁多料，我都可以為大家今晚會食剩嘢。
但係估唔到，結衣佢地班女仔，原來食量都幾驚人！
唔通佢地用埋第二個，傳說中用嚟裝甜品嘅胃？
傑傑：食飽飽冇嘢做，不如揾啲嘢嚟玩囉？
啊wing︰有支可樂喎，不如玩…
wing嫂︰true or dare？
某女D︰ok喎！大家圍埋圓枱坐定定。
傑傑：true or dare，round 1！
傑傑攞起可樂樽，開始轉。
可樂樽慢慢減速。
要停喇。
"呃…呃…中…結衣！"
結衣：啊！
傑傑：true or dare？
結衣：true！
傑傑：你！同chilam…到底係咪拍緊拖？！
結衣：誒…
傑傑：yes or no！
結衣：no…
眾人：噓~~~到你轉！
可樂樽又再一次轉動，然後又慢慢減速…
"…呃…中…chilam！"
結衣：true or dare？
我：true！
結衣：ok！嗯…你有冇鐘意嘅人？！
詠琳：快啲答！
我：誒…唔肯定，但係…
我忽然間諗起我對住晴晴果陣嘅感覺。
只可以話我對住佢個陣，我會有種奇怪嘅感覺囉。
我：唔知啊，有掛？
男G︰邊個？！
我：one round one question！
眾人：噓~~~
我：next！
可樂樽又再一次轉動…
====================
玩true or dare，揀dare嘅幾癲都有。
邊個嘴邊個一啖又有…
隊半枝白蘭地又有…
淋冰水亦有…
淋啤酒…都有！
然後過咗唔知幾多round true or dare…
又再指中結衣！
Gigi︰true or dare？
(Gigi都係留宿嘅同學)
結衣：dare！
Gigi︰咁不如…隊埋半枝啤佢！
結衣：吓…
眾人：飲！飲！飲！…
大家玩到愈嚟愈high。
結衣：唉…我…唔飲得咁勁嫁…
Gigi︰咁咪咁樣練吓囉！飲喇！
結衣：唉…咁…我…
啊熹：我幫你飲！
"woe…英雄救美喎~~"
"chilam你就嚟比人搶女喇！"
我：up乜勁啊你？！
啊熹一下搶咗支酒，舉頭格硬大飲，一飲而盡，酒都喺口邊漏哂出嚟。
阿熹：我去抹身先。
喺廁所，傳嚟嘔吐聲。
結衣立即衝入廁所嚟睇啊熹，話哂都係啊熹幫佢頂咗。