Mr. R.J.

Mr. R.J. by Error Rush
1.10
作為一個溫文爾雅，知書識禮嘅女仔，
我發誓，我唔會俾人叫我做港女咖。
人地女仔人家嚟咖嘛，俾人咁叫法，一定會好傷心，好難受咖嘛。
所以，
如果邊個咁夠薑話我係港女，我一定會打柒佢。
呀，唔係，
作為一個溫文爾雅，知書識禮嘅女仔，
係唔能夠打人咖嘛。


所以，
如果邊個咁鳩撚柒夠薑話我係港女嘅話，我一撚定搵人打柒個仆街冚家產！

叮噹......門鐘又響喇，無錯係又響喇！
「女呀，幫手開下門啦，又有人嚟拜年喇！」我呀媽應該喺廚房好忙。
「親愛的，唔得呀，我沖緊涼呀。」
「女，你又沖緊涼呀？」
「係呀，又沖緊呀，你去開住門先啦，親愛的！」

新年假期响屋企屈咗成十日，真係幾悶下。


有時沖涼果時，我都真係認唔住，幫自己做個詳細小小嘅全身檢查，睇下一啲濕潤嘅地方有無吽到出菇仔。所以沖得耐少少係在所難免。

仲係青春期，發育緊嘅我，唔多唔少，多多少少，或多或多，都會特別注意下自己嘅身材變化，你明咖啦，女人副偈好重要咖嘛。

姨媽姑姐伯父叔父舅父表哥表妹糖兄妹地，幾乎都會嚟我屋企拜年，所以，基本上過年都係唔會出街。

「JJ真係乖喇，放假都留喺屋企陪呀媽，無人約你出去玩咩？呵呵呵......」姨媽永遠都係笑得咁假的。
「哦，推哂啦，推哂！我又點會無人約呢，專登留喺屋企，等你--姨媽到吖嘛，你喎，你姨媽到喎！哈哈哈......」同埋呀姨媽，你能唔能夠將我無人約呢個秘密做一個永久保存呢？唔該。
「JJ真乖！」姨媽嘅眼神變得凶狠起來，「我都唔轉彎抹角喇！既然你無人約...」（仆你臭街，仲講！）「你表哥Carson喺美國返嚟過年，仲帶咗個朋友仔番嚟添，我懷疑佢地......」姨媽講到呢道有啲眼濕濕。好明顯，我知呢鑊賴硬野喇！
「我懷疑佢地係花樣男子。」姨媽繼續講，而且越喊越近。


「係咪即係勞斯萊斯呀？」呀媽都忍唔住搭咀。
「好似斷背衫咁！周敖暉果啲呢！」最終姨媽都崩潰咗，嗱嗱啉攞塊巾俾呀姨媽吖唔該。

我唓，咪就係hehe囉，講到咁複雜做咩啫，
hehe，一個字咪講哂囉！而家啲長輩真係吖，無啲文化水平！

迫於無奈，我接下咗姨媽交托俾我，呢個試探表哥嘅行動，
行動代號係：「Mr. R.J.」