好啦,終於可以入正題啦,真係等到屈原都浮上黎。

”其實個計劃就係咁,我地從黃色房間走出黎,應該仲未比人發現,
當佢地發現我地果時應該打鑼打鼓咁搵我地。要知道佢地哩一個時候會分散人手搵我地,
到時十六樓既守衛應該會少好多,到時我地趁哩一段時間入去救你班朋友。”

”但係入面好似有閉路電視之類既野喎,我就係咁比人捉咗。”

”你講得冇錯,所以搵德仔先既決定係正確。德仔,你知唔知邊到會搵到保安控制室。”





黃毛毛做咗個手勢表示唔知,而大叔死撐話

”果然不出我所料。我已經預計到哩個情況發生,所以我諗定PLAN B...”

睇大叔個樣,所謂既PLAN B只不過係嚇吓我既姐,點會預計到。
我諗佢唔會話個閉路電視係感應器,之後用硬幣攻擊閉路電視,之後同我講硬幣導致感應器的磁通量改變。
點知,大叔又真係拎出個硬幣出黎!唔通佢真係想講硬幣導致感應器的磁通量改變?
大叔將硬幣向上抛,佢話
”哩個Plan B只可以由命運決定。「公」就Plan A,「字」就Plan B”
硬幣回到大叔手中,擲出的結果係「字」。




我問
”大叔,你都要同我講Plan B係咩先得嫁。”

”Plan B就係Plan A同Plan C之間...”

”@!(*@!#(&(&@!”

”你記唔記得文件夾上面寫住今日九點大嬸會同人有交易。”

”咁所以呢?”





”所以我地要報警。”

”吓!?又報警?啲警察又要當我傻喎。”

”你同警察講你比藍毛毛佢地捉咗梗係當你傻啦,但係如果你講毒品交易個結果又會唔同。”

大叔咁樣講一講,又言之成理。如果我講毒品交易,咁就應該唔會轉介我去精神科,不過係唔係一切都咁順利呢?

”咁如果大嬸佢地知道有警察去呢?”

”哩個就係我預期既結果。如果冇估錯,警察會搭電梯上樓,但係,警察既行動就會被閉路電視發現。
當佢地知道警察會黎之後,應該會將毛毛佢地收埋。
當然,毛毛佢地唔敢大搖大擺係走廊出現。到時十六樓既走廊就會清空,我地就趁哩段時間爆房。”





當黃毛毛聽到我同大叔「爆房」兩字,簡直係目瞪口呆,而大叔望住佢咁既樣,唔好意思講咗句
”我指既係爆開困住佢朋友果間房...”

點解黃毛毛會有啲咁淫賤既思想,究竟佢啲資訊係邊到黎?
我環顧四周,睇下附近有咩可以比黃毛毛接觸外間資訊,結果,比我發現咗有部好撚大既手機。
當我行近啲睇睇,原來係Galaxy XL。
望住部手機,只好驚嘆大嬸到底有咩財力可以叫人特登訂造手機。

黃毛毛見到我拎佢部手機,就立刻向我衝埋黎,搶走部手機。我見情況不妙,就話啦
”咁走既路線呢?”

”走火通道。”

”確保冇人會追上黎?”





”為免出現逃走既情況,警察會係果度安排人手。而咁樣做都有一個好處,
當警察見到我地咁大班人逃走出黎,肯定會對公司起擬心,到時就一網打盡藍毛毛佢地!”

聽到大叔諗到咁多野,實在忍唔住要讚歎大叔
”嘩,好周詳...”

大叔望一望佢條褲,拉番佢條未拉好既褲鍊話
”咩話?”

”我指好周詳既計劃。咁而家係唔係我去報警?”

”冇錯,你去報警,而我就趁毛毛佢地仲未起身,上定去二十樓附近。”

”咁我呢?一路留返係哩到?”





”隨便你,記住千奇唔好比人發現我地。不過哩個都係遲早既事...
同埋你記得九點鐘救埋你班朋友。”

冇錯,我地從房間走出黎,當毛毛佢地巡房既時候就會發現我地逃走咗,
而家既我地要想盡辦法捱到九點鐘!等到警察既來臨!

大叔指住黃毛毛講
”德仔你跟我一齊上二十樓,因為你仲係佢地既同伴,
如果我比人捉咗,你都可以從中幫我。”
黃毛毛點了兩下頭,講咗句
”媽咪...”,表示冇問題。

大叔同黃毛毛離開房間,我拎出Nokia手機,置電九九九,又要同警察展開對話。

”九九九報案中心。”





接...接通啦,傳黎既係一把好動聽既聲音,屌,講返正題,
希望今次唔好出現任何問題啦。

”救...救...救命呀,哩到有毒品交易!”
為咗有更好更逼真既氣氛,我扮到好緊張。

”先生,冷靜少少,可唔可以講詳細少少?”

”哩到係偉興中心,陣間九點鐘會有毒品交易,地點係二十樓。”

”先生,唔好意思,而家時間係六點鐘,但係你知道九點鐘有毒品交易,仲要知道地點。”

”er...er...我從一本機密物件中得知,信不信由你啦,反正我就信了。"

"講真,如果你真係玩電話,我真係會拉你,等警察上你屋企打個轉黎判斷你有冇犯法,我係認真,唔係講緊笑。”

”你聽我講先,聽我講...”

”你有無諗過你呢種一時之快會對其他真係有緊急需要既人有幾大傷害?
佢地打唔通過黎請求幫助會點?你仲要講咁耐?你可能就講得好happy,人地分分鐘係屋企比人斬開十碌八碌。
人有時真係好危險,個受害者有乜事的話,你良心過唔過意得去?”

”你真係聽我講先啦...”

”我勸你打過黎之前三思一下,希望你可以作出獨立判斷,唔好助長玩警察電話,做埋晒D浪費警力既事。
仲有,你果度我冇聽錯係黃大仙黎,要搵你住邊計下角度就知,IP都唔洗check。”

聽到個警察講咁耐,真係火都黎埋,我終於忍唔住要爆啦,
”屌那星!講完未呀!到時係唔係有毒品流出市面你負責呀!”

為咗更逼真,我要吹大啲啦...
”果啲係白粉黎呀,唔係媽咪麵果啲調味粉呀!
食完唔係普普通通喉嚨痛呀,係真係會食到個人顛呀。
到時真係有人比人斬開十碌八碌呀!”

今次輪到個警察講
”你聽我講先,聽我講...”

”聽你講?你有冇聽我講?你咩態度呀?
你知唔知我可以投訴到一個係太古廣場既sales比人炒呀!
我問你呀,你哩到有冇負責人?點解可以比一個咁唔pro既人做哩個位?
本黎我都諗住好聲好氣同你講,以為咁就冇問題。
點知同你講落去,你就話返我轉頭,攪到我心理都開始出現問題。
你最好趕快妥善處理,否則,我向相關部門投訴。”

”知...知道...我地會九點鐘派人黎。”

”知道就最好。話時話你叫咩名,等我可以記住你,仲有你手題電話。”

”我之前曾經係太古廣場做個sales...個個叫我家姐...”

聽到警察姐姐講完哩一句說話,真係唔知點應佢好,個氣氛真係好彊...
講咗咁耐,係時候要收線啦。我話
”記得九點派...”

話都未講完,佢已經收線,希望佢真係聽清楚啦...
距離九點仲有一段幾長既時間,而家做啲咩好呢?
望見黃毛毛間房,令我諗起綠毛毛。
係喎,綠毛毛間房就係下一層,去搵佢都好喎,順便拎返部電話。

我微微打開門,從隙罅望出去,個個都醉緊仲未醒,哩個係一個好既時機。
嗯...要返去走火通道,意味住又要行返果條醉酒毛毛路,不過咁小既事點會難到我。

我左腳一跨,再轉個身,右腳企係毛毛兩腿之中,再伸出左腳跨過另一個毛毛,
我輕輕力一跳,又過多一隻,再黎過微波凌步,三兩眼功夫又過幾隻,
企係毛毛手腕附近之上,而大門就係眼前!

”啪”一種東西被擊中既聲響。我望一望胯下,發現毛毛用手腕打中雙丸。
唔叫得!絕對唔可以叫!由於太痛既關係,眼淚不禁落下。
我望一望毛毛,好彩佢未醒姐,原來係發夢。

毛毛佢打中既位置大概係袋底,之後再用無情力將雙丸向上一推,差啲推埋入個肚到。
果種痛由下腹發出,之後擴展自全身,成個人都企唔直,兩粒丸隱隱作痛。
我快速遠離毛毛身邊,伏係地下到,一路爬,一路爬。
右手就一路呵護返兩粒丸,而左手只是輔助,支撐住我爬到走火通道。

意識開始模糊,要盡快先得啦...
我推開防火門,入到去走火通道,坐係樓梯到抖一抖,希望雙丸未爆。
我摸一摸雙丸,好彩仲係平時果種感覺。而我不禁感嘆
”如果我是陳奕迅,這句話太傷感...”
跟住就企返起身行去十二樓門前。