冇幾耐,我已經可以活動自如。
仲因為冇考DSE既關係,而又要重讀中六。

遠觀呀強同呀怡,已經好順利升上大學。
佢地一齊既原因我冇過問,我只係知道,
一個男人肯為一個女人捱一槍,但係個女人仲係唔鍾意你,
證明感情哩一樣野冇得勉強,係你既就係你,唔係你既就永遠得不到手。

只不過允行就慘左啲...
佢因為患上創傷後壓力症候群,導致精神分裂,




而家仲要係小欖精神病院渡過。
我仲記得上次去探佢果時,
佢拎住包媽咪麵塞入自己個屎眼到,之後話
”哩一種係新口味!屎味媽咪麵!”
到底佢係比毛毛嚇到傻定係分手攪到傻,
我唔知道。

咁揚惠呢?
佢因為用盡時間而減肥所以冇咩點溫書,
考出黎既結果當然唔太理想,所以佢又要重讀中六,又係同我同一班。





今日正好係第一日番學,當大家見到揚惠登場既時候,都好含情默默咁望住佢,
但係我每當見到揚惠,就會諗返起佢之前果一個樣,所以仍然有些抗拒。
如果要比喻既話就好似見到Angelababy就會諗起「你的樣子如何」...
不過「你的樣子如何」真係好勁,到左2014年仲追擊緊baby。

由於老師仲未到,我呆呆地望住窗邊,而窗外有一把好眼熟既金色頭髮。
老師同佢同時間行入黎,並且同大家介紹,

”同學,哩一位係新黎既同學。”





”大家好,我叫做黃霧霧。”

同學既注意力轉移至黃霧霧身上,大家都比佢一把金色頭髮同混血面孔吸引。
但係有邊個估到佢之前個樣係黃毛毛...

直至小息時,黃毛毛突然相約我係操場觀眾席見面。
佢一早已經到左,而附近有好多狂蜂浪蝶係附近偷望佢。
我慢慢經過操場,坐係佢身邊,突然感到四周充滿好強既怨念,
果一份怨念係黎自大家既妒忌心。

佢同我打招呼,

”Hi,好耐冇見,自從醫院之後就冇見過。”





”黃毛毛,果時我仲有好多事要問清楚你。”

”有咩問題即管問啦。”

”點解你要冒認係德仔?”

”其實我曾經同德仔分配埋同一間房。
你同大叔所見到果一張相係德仔既遺物。”

”咁點解你第一次見大叔要同佢講「Daddy」?你係有心玩佢?”

”說來話長...你都知道食完毛毛藥會有失去記憶既附作用,
但係德仔就係一個成功的例子。
佢成功保留番所有記憶,佢對一個陌生既環境充滿住恐懼同討厭,
縱然係大嬸供我地書,教我地學,比野我地食...





當時既我冇任何既記憶,就如一個出生冇耐既嬰兒,對所有事物都感到好奇。
而我晚晚就聽德仔所講既事,就覺得相當之吸引。
最令我感到好奇就係佢所講既「Daddy」,
究竟德仔點解咁鍾意講佢同大叔既事?
我好想體會咩叫親情。好想再聽德仔講落去。

但係有一日佢再忍受唔到果一個鬼地方,
於是佢就下定決心走出去...
只不過佢因為要長期依賴毛毛藥,已經成為不可或缺既東西黎維持生命,
當佢走左一日後,佢自動返黎,
結果大嬸同呀仁就為懲罰佢而逼佢食毒藥,
但係藥性就出乎意料強勁,就係咁德仔就離我而去。

不過果一日既演奏會,我見到一個男人好似德仔既相中人,




果一個就係大叔,所以我就無意咁叫佢做「Daddy」。”

”點解你唔否認你係德仔?”

”果時德仔已經唔存在,
如果我同大叔講佢所搵既德仔一早死左,
佢會幾咁失望同難受?
我相信德仔都唔想我咁樣做。”

黃毛毛所講既野實在有幾分道理,我諗唔到咩理由要駁佢。
只不過大叔就係為左救黃毛毛而死,實在係有少少唔抵...
話時話大叔果日中槍,到而家仲未搵到佢條屍,實在令人費解。
我問,

”後黎藍毛毛佢地棟大廈點算?搵唔搵到大叔?”





”大叔仲係搵唔番...而大廈就已經封鎖左,
政府唔比新聞佈道哩一件事,以防造成恐慌。”

”咁大嬸同呀仁呢仲有其他毛毛呢?”

”大嬸同呀仁被拘捕時,藍毛毛突然衝出黎打低幾個警察,
之後仲搶埋警車一齊逃走,大嬸就成功走得甩,但係藍毛毛就唔記得帶走呀仁...”

大嬸同藍毛毛居然逃走左?啲警察到底點做野?
佢地兩個犯埋咁多罪都走得甩,仲成世界?

黃毛毛又繼續講,

”之後我同其他毛毛都被人送左去一個地方到住,
後黎就聽講研發出解藥,我地變返做人。
當然,社會上無端端多左一班無身份既人,會好麻煩。
所以政府就安排一個身份比我地,而我就係叫黃霧霧。”

”你個名改得咁求其既?你既真名同屋企人呢?”

黃毛毛舉頭望住藍天與白雲,陽光落係佢既面孔上,
我見到好白晢既肌膚,但係當佢講

”唔記得...”

我就覺得「到處縱是太灰沉」。

為免氣氛變得彊硬,我提議左一個英文名比佢,我話,

”不如你改個英文名叫Lauren”

可能我提及啲敏感話題,佢仲未平服到。
之後我地兩個突然變得好沉默,但過左一陣之後,
黃毛毛係褲袋到拎出一部手機,佢講,

”當我醫緊病期間,有人拓護士比左部手機我,你望下。”

我將手機拎上手睇...輕輕地撫摸住佢堅硬既外殼,殼上有一個子彈卡住左。
我莫名其妙地笑左一下,講左句

”果然...”

之後黃毛毛同我一齊企起身,走去小食部,而揚惠見到我同黃毛毛一齊,
心有不甘地走過黎,當我地三個人去到小食部面前,我地同時都講

























”媽咪麵呀唔該。”