【精神異常短篇】(1)(2)(3)(4)(5)(6)(7)(8): 【精神異常短篇5】星期六晚約咗上個friend屋企打邊爐
【精神異常短篇5】
星期六晚約咗上個friend屋企打邊爐
我因為要係公司搞埋啲手尾所以遲咗上去
班友就一路催命符咁send message過嚟
又話唔等我，又話已經食晒啲肥牛
一間又駛我去買啤酒
我都費事理佢地
十點幾搭的士去到樓下
兩手揈揈準備搭lift上去
看更阿姐同我打咗聲招呼
嚟咗咁多次佢都開始認得我
我隨口問咗句︰阿姐，食咗飯未？
然後見有lift咗就入咗去
臨入lift之前收到佢地message
話已經食晒啲嘢
叫我準備上去洗碗
我望一望時間係22︰31分
平時係lift入面你會做啲乜？
咪多數哼半句歌
上到網嘅咪繼續上網囉
因為唔駛一陣lift就會到
我friend住十六樓
畀盡分零鐘就到
但係當我抬頭望住個顯示牌個陣
就覺得有啲嘢唔對路
部lift一直停咗係十樓冇郁過
唔怪得覺得好似搭咗好耐咁
一留心就發現部lift完全停咗係到
我撳晒開閂門同咁多層樓
仍然係一啲反應都冇
心諗竟然會黑仔到困lift
今次係成世人第一次困lift
一時之間都唔知應該點做
有諗過即刻打畀班friend
但心諗咁做轉頭實畀佢地笑到面黃
咁唯有死死地氣撳警鐘call看更阿姐嚟救我
過咗一陣對講機就傳嚟一把聲問咩事
「我諗係困Lift掛，停咗係十樓好耐喇，唔上唔落……」
「哦……咁你係幾多號lift呀？」
我心諗鬼知幾多號lift咩
轉頭見到標版上面有個2字
咪同佢講話係2號lift
「你等一陣，我call控制中心嚟處理……」
「喂！要搞幾耐架？我趕時間喎……」
佢冇答我快手已經收咗線
我望一望個電話
原來唔經唔覺已經22︰45
我個肚已經餓到打晒鼓
呢個時候就收到個friend電話
「喂！到未呀？成棚人等你一個呀大佬！」
「我想嘅咩？你部仆街lift呀！我而家困咗係出面呀！」
「吓？咩話？」
「困lift呀！一味淨係識得催！催你老母咩！」
條友係完全冇聽過我講嘢
一知道我困lift已經即時唱通街
我係電話裡面都聽到佢地係後面勁嘈
我都費事理佢即時收線
呢個時候我聽到部lift「轟」一聲
同時擢咗一擢
我個心嚇到離一離
當時以為部lift有咩事要跌落去
然後過咗一陣部lift門突然開咗
我諗都冇諗就即刻衝出去
然後先發現成條走廊都冇燈
好似係停晒電
咁我冇理由返入lift架
咪轉個彎走去樓梯口
心諗上幾層直接去個friend到
其實而家諗返轉頭
我真係應該繼續留係部lift到
邊到都唔好去
但係就算我繼續留係lift裡面又可以改變到啲咩？
我真係唔知道……
我由樓梯一路上去
沿路一直都係冇燈
我開著個電話做電筒
一層一層咁向上行
中途係防火門嘅窗口望出去
每一層都係黑麻麻冇晒燈
我當時以為成層樓都停晒電
心諗冇一路困係部lift到都算好彩
然後就終於嚟到十六樓
亦即係我個friend個層
奇怪係佢呢一層又冇停電
正當我諗住拉開防火門出去嘅時候
我聽見走廊出面有人係到講緊嘢
其中一把聲係我個friend嘅
而當我拉開防火門轉身出去嘅時候
我嚇到成個人呆咗係到
我見到「自己」而家正入緊個friend屋企門口
雖然只係見到個背脊
但係我一眼就認出個個係「我」嚟
我呆咗唔識得郁
睇住佢地入咗屋閂埋門
我一路係到諗個個人究竟係邊個嚟？
我而家應該點做好？
而就係呢個時侯
見到下層一路有光照緊上嚟
有人係樓梯上緊嚟
我唔知點算好
急急腳走上十七樓轉角匿埋
同時聽見樓下個個人已經上到嚟
我裝個頭出去睇
一睇就成身毛筒戙起晒
個個人又係「我」嚟
雖然睇唔清佢個樣
但係身型、著嘅衫、一舉一動
都好肯定係我嚟
我唔敢出聲
一路匿係樓梯轉角唔敢出嚟
睇住個個人拉開防火門出咗去
然後過咗一陣就聽見撳門鐘聲
究竟發生咗乜嘢事？
點解會咁？
我唔知點樣去形容眼前發生嘅事
只係一味捉實條欄杆
我怕自己一鬆手就會企唔穩跌落去
然後突然就聲見走廊出面有尖叫聲
把聲應該係我friend條女嚟
之後就聽見好嘈，好似有人打交
再過一陣就「嘭」一聲
道防火門畀人踢開咗
有人衝咗入嚟
一路向住樓下方向跑緊落去
我見到衝咗落樓下個個人
就係另一個「我」嚟
我唔敢出去
連一粒聲都唔敢出一路匿係上面
我兩個friend跟住衝咗入嚟
一路追住個個人向下面跑
過咗一陣就聽見下面有人係到嗌
「喂！唔好追喇！黑麻麻仆死呀！」
然後另一個人就係再遠啲嘅地方嗌上嚟
「你頭先睇唔睇到呀？你睇唔睇到先？」
「我睇到！但係唔好追喇！黑麻麻危險呀！」
然後兩個人一對一答之間
開始返轉頭向上行
「喂！點呀？捉唔捉到佢？」
有人推開十六樓道防火門
向樓梯下面咁問
我聽聲就認出係我其中一個friend嚟
我唔敢出聲，更加唔敢落去
我完全唔知發生緊咩事
我怕我而家行落去出現係佢地面前
唔知佢地會點
我更加怕落到去會見到另一個自己
我諗起頭先個把女嘅尖叫聲
可以想像到面對面嘅時候會有幾恐怖
我靜靜地向上行
一路匿係樓梯口唔敢出聲
過咗唔知幾耐
我班friend已經全部返晒入屋
我唔知屋裡面發生咩事
更加唔知跑咗落樓下個個「我」去咗邊到
我而家究竟係邊到？
邊一個先係真正嘅我？
呢個時候我電話突然響起上嚟
一睇係我個friend打畀我
我唔敢接，就算接咗都唔知講咩好
電話聲就一路係後樓梯係咁響
直至佢收線
轉頭就收到佢message
問我究竟係唔係嚟？定係又放飛機？
我睇見個心一路寒出嚟
究竟而家send message畀我嘅人
係唔係屋入面個班friend？
定係佢地而家係另一個地方
仲一路等緊我上去打邊爐？
咁屋裡面嘅人又係邊個？
我而家究竟係邊到？
我班friend到底又去咗邊到？
我隻手攞住個電話一路係到震
我而家究竟應該去邊到？
。
。
。
This is a work of fiction.