【精神異常短篇】(1)(2)(3)(4)(5)(6)(7)(8): 【精神異常短篇7】細個讀緊小學個陣屋企好窮
【精神異常短篇7】
細個讀緊小學個陣屋企好窮
我記得成日都要搬屋
又要睇包租婆面色
後尾好彩抽到公屋
一家四口終於都唔駛搬嚟搬去
由於冇咩得揀
最後揀咗一個四人細單位
二百零呎左右
周圍環境算係雜個種
周不時有啲醉酒佬呀、傻佬呀、道友咁
個時啲公屋樓下仲未裝大閘
無掩雞籠咁任人自出自入
所以真係咩人都有
不過一來個時仲細
根本唔識得驚
二來見得多之後就開始習慣咗
只係有時半夜走廊外面
忽然間有啲傻佬係到大叫
阿媽就會變得特別緊張
成晚囉囉攣瞓唔著
我屋企係舊式L型公屋
一出lift就係一條好長嘅走廊
一路通到去後樓梯
走廊天花嘅燈長期都係壞嘅
所以成日都黑沉沉
阿爸話係有人特登整壞晒啲燈膽
想借機入屋爆格
個個年代呢啲事成日都會發生
仲提我地返屋企嘅時候小心後樓梯有人匿埋
唔知係咪因為咁
每次放學返屋企嘅時候
總係形住有人匿咗係樓梯轉角
跟住落嚟講嘅嘢
本來我都唔係記得咁清楚
不過有次無啦啦同細佬講返起
一人一句咁然後先還原返成件事
事發當晚應該係星期六
因為我地全家人留咗係屋企睇明珠台
時間係夜晚十一點幾
930電影播到差唔多完嘅時間
阿媽通常就趁住廣告時間催我同細佬去刷牙
咁正當我刷緊牙嘅時候
出面走廊突然之間好嘈
有個女人發咗癲咁係到嗌
我阿爸即刻開鐵閘出去睇
隔離屋啲人都出晒嚟
跟住就見到走廊近lift口個邊
有個著住睡袍嘅阿嬸
逐家逐戶咁拍門
佢拍得好大力
拍到道鐵閘嘭嘭嘭咁響
屋裡面嘅人就梗係唔理佢
因為都唔知發生咩事
阿媽一直拉住我同細佬唔畀我地出去睇
然後個阿嬸見到我地走廊尾呢邊有人
就發狂咁衝過嚟
對面屋家人反應快
一早閃返晒入屋企
於是個阿嬸就拉住我阿爸嗌救命
係咁話佢個仔要殺佢
阿爸唔知咩事想揈甩佢
個阿嬸當時成身濕晒仲滴緊水
塊面拉到鬼咁長
又哀又篩叫我地畀佢入屋
阿爸叫佢報警
個阿嬸就只係一味擰頭
話唔報得警
話如果報咗警佢個仔一定唔會放過佢
當時我同細佬攝咗係幾個大人下面
伸個頭出走廊兩頭望
我係好肯定細佬都見到同一樣嘢
因為我地兩個差唔多同一時間縮返入屋
當時走廊壞咗幾盞燈
其實都好暗
但係我肯定見到走廊頭
lift口個到有一個人影企咗係到
然後當佢發現到我地嘅時候
就好快咁轉咗入另一邊走廊唔見咗
我阿媽抆開咗個阿嬸話叫佢去報警
之後就快手閂埋門
個阿嬸一路唔肯走係出面拍門
然後過咗一陣就突然靜晒
之後轉咗入後樓梯唔見咗
我地之後報咗警
阿媽成晚話阿爸好多事理人啲嘢
警察係我地個層逐家咁問
搞到點幾兩點
我同細佬就一路趴係上格床
係氣窗到睇住啲人係走廊行嚟行去
開頭以為件事就咁告一段落
點知原來仲有下文
個晚瞓到半夜我扎醒咗
就聽見走廊外面有人行嚟行去
個種腳步聲係好似有人拖住鞋底一路磨個地下咁嘅聲
由於我瞓係上格床
個頭就對正個氣窗
於是我就趴起身打開氣窗一條隙
睇下出面係咩聲
我見到有個男人一路係走廊尾到兜圈
就正正係我屋企隔離後樓梯個個空位
由於冇燈根本睇唔到佢個樣
淨係知道佢一路口噏噏
一路好慢咁轉圈
鞋底就一路「嚓嚓」咁磨落個地下到
我嚇到縮返入被竇唔敢出聲
裝個頭落下格床
見到細佬瞓到死豬咁
外面個男人成晚係到兜圈
一路都冇走過
之後聽班師奶講
話個晚警察係樓下公園搵返個阿嬸
攤咗係長櫈到成身都係血
佢神智仲清醒
同警察講話自己同個仔互捅咗幾刀
佢話自己殺咗人
叫警察快啲拉咗佢
之後警察係隔離邨垃圾房搵到把有血嘅刀
但係就一路搵唔到佢個仔
聽講個阿嬸同個仔精神都係有啲問題
佢住個層啲人都怕咗佢地
之後仲話個阿嬸係差館裡面自殺
留低咗枝染血嘅原子筆
最後佢地個單位就空置咗
一路都冇人住
我同細佬之後去過佢個層探險
佢個單位畀警察攞膠帶封住
但係到咗第二日
啲膠帶就已經畀人抆走晒
細佬話佢之後試過一個人去過
話裡面有人係大門信箱個窿到裝出嚟
係個黑麻麻嘅男人嚟
我即時就諗起個晚係後樓梯轉圈個個男人
之後時不時半夜都聽到
有人係走廊出面拖住鞋底行嘅聲
但係我已經唔敢再睇
有一次放學一出lift就見到走廊尾有個人企咗係我屋企門口
個身型就同個個男人一樣
嚇到我屋企都唔敢返
走咗落文具鋪搵個friend打機
打到夜晚六點幾等埋阿爸先敢返上樓
一返到上去就見到阿媽係到洗鐵閘
佢話有人係我地門口痾尿
我知道肯定係個男人做嘅
但係就一路唔敢同阿媽講
然後有一日
我地走廊嘅燈全部爛晒
一地都係玻璃碎
一睇就知係有人特登整爛
然後個晚個男人第一次走嚟撳我地門鐘
首先又係個種鞋底磨地嘅聲
然後就開始撳鐘
隔得好長咁一次一次咁慢慢撳
半夜三更成屋人畀佢嘈醒晒
我係氣窗到裝出去
就見到佢擰轉頭對住我笑
佢棚牙唔知點解好似識發光咁
阿爸一路鬧一路想開門
阿媽拉住佢叫佢唔好
我都駁命擰頭話唔好
於是阿爸就隔住道門係到鬧
嘈到隔離屋都開咗條門隙睇下咩事
直至到阿爸大嗌話報警
個男人先慢慢轉身入後樓梯走咗
但係隔咗唔知幾耐
全屋人都瞓晒之後
我聽到個男人嘅磨鞋聲又由走廊頭傳緊過嚟
佢應該又係另一邊樓梯走返上嚟
個啲聲一路去到我屋企門口就停咗
我一路都唔敢睇
唔敢係氣窗到裝出去
但係隔咗好耐之後都係一粒聲都冇
我終於都忍唔住裝出去睇下咩事
結果就見到個男人
塊面差唔多貼住我道鐵閘咁企咗係我門口
好似畀人面壁罰企咁企到好直
啲手指好似抽筋咁一路係到震
佢聽到我開氣窗嘅聲
好硬咁擰個頭過嚟
然後又係唔出聲望住我係到笑
佢對眼望住你嘅時候
你係感覺到佢全副精神都集中係你身上咁樣
我匿返入被竇
連叫阿爸起身都唔敢
個男人一路無出聲企係我地屋企門口
一路企到差唔多天光
第二朝我偷偷地同阿媽講
佢話我亂噏
直至細佬爆出嚟
話個男人試過跟住佢放學
一路跟到返屋企門口
阿媽先開始覺得驚
房署嘅人話
果兩母子個單位一早封咗
應該冇人住係到
細佬講話見過有人係裡面
佢地就猛咁話冇可能
報警就更加嘥氣
問你有冇即時危險
就算有都係幫你備案
有咩事最後都係叫你打999
試過瞓醒係門口執到斷咗嘅刀片
仲有條啡色好長乾咗嘅繩
阿爸後來話係曬乾咗嘅麻雀腸嚟
最後我地一家人都係頂唔順
申請調遷搬咗去第二區住
。
。
。
This is a work of fiction.