「所以。。。MACY你諗諗佢。如果犀牛個班抽到支好籤,我真係會好開心。同埋。。。好感激你」
 
MACY冇答我,但我知佢諗緊。我地離開左STARBUCKS,行左陣我就送左佢去搭車。MACY一走,我即刻打俾高佬。
 
高佬「阿駿,你有冇蝕底到俾MACY呀﹖」
 
「你唔好講到佢咁差啦,佢其實都係個好人黎架。」
 
高佬「你好似動左真情咁喎。」
 




「你傻架。我同佢暗示左喇,我估MACY都有六七成機會幫手既,我地等星期一放學睇下點啦。」
 
星期一一放學,我同犀牛同高佬就狗衝到學生會室,睇下抽籤結果係點。唔知係我地太快定點,去到既時候張抽籤結果都未貼出黎。高佬最心急,直情拍門叫學生會D人快D俾我地睇下張走線。
 
拍左兩下,終於有人應門。學生會室對門徐徐打開,一個高高廋廋的女生行了出來「有咩事呢請問。」
 
我地三個不其然望向個位女生,佢就係我地學校既女神,現任學生會主席LUCY喇。佢尖尖既面孔加上水汪汪既大眼,一雙44吋長腿配上不及膝的校服裙,腰帶緊緊地縛住纖腰令佢上身的身形更加玲瓏浮突,擺出黎就好似一個model咁。我地同學竟然有一個咁索既中六女生,自然成為學校既風頭躉,如果要形容,佢個style就好似心穎BB咁。
 
犀牛搶先把握同女神講野既機會「我地想知度GRADE B籃球抽籤結果,唔知有得睇未呢。」
 




LUCY「哦,我岩岩整好喇你地等一陣啦。」說罷佢就轉身走入學生會室攞左張紙出黎。但係佢冇即刻俾我地睇,而係打算將佢釘係學生會室出面既一塊壁報板上面。雖然LUCY都有5呎7咁高,但要釘張紙到壁報板上面都有D難度。見佢拮起對腳伸長哂隻手先做到,我地三個咁岩又係佢後面,好自然就望到佢後面條校裙扯起左。本身已經短既校裙俾佢咁樣扯一扯高,大半截女神既後大脾都展現左係我地眼前。
 
正當我同高佬睇到目定口呆之際,犀牛卻大叫「嘩正呀,有冇咁荀呀,哈哈哈。」我地俾犀牛咁嚇一嚇,定過神依依不捨望住女神行番入學生會室先得閒理犀牛,「咩料呀犀牛」
 
犀牛「我個班抽到同3A打喎,打完之後連續兩輪都輪空,即係話贏一場就可以入決賽喇﹗」
 
我知道一定係MACY幫左我地,趁佢地唔為意send左個Whatsapp俾MACY多謝佢。佢都好快覆返我,「我都係為學校好,加油。」
 
當犀牛知道左抽籤結果後成個人變到非常積極,每日都捉住佢班怪獸同學去練波,準備兩星期後既班際比賽。我同高佬都唔敢掉以輕心,為左三個人一齊打學界,每日放學後都練到7點幾8點先走。
 




努力,為青春留下回憶。努力,趕走遺撼。
已有 0 人追稿