李SIR「駿,點都好,你都有責任返屋企交代一下。李SIR知你想一個人靜下,我亦唔介意你過黎住一排,但你都要同父母講聲,先再返黎丫。」
 
「李SIR,好多謝你。。。我知我今次麻煩到你,但係我真係唔知點樣去面對同埋我而家真係咩人都唔想見呀。」
 
「我好明白你而家既心情。但作為男人,有D野你應該做,你應該好清楚。你有權利獲得自由,但你亦都有責任唔好要你屋企人同朋友擔心。一係咁啦,我陪你返去好唔好,多個人多把口麻。」
 
「呼,你講得岩,始終都要面對,我地過15分鐘行啦。」
 
我同李SIR一齊落到街,打算截車返屋企既時候。一把熟悉既聲音由後方響至「沈子駿。」我下意識向後一望,係MACY。
 




MACY見到我同李SIR在街上,二話不說衝過黎將我緊緊抱住,不停揼我心口。「你知唔知人地幾咁擔心你呀,做咩成日都唔見左人,又熄左電話﹖你知唔知我係呢度等左你幾個鐘喇,伊D話我知究竟發生咩事﹖」
 
「冇事呀,你唔好諗咁多啦,你返屋企先啦,我同李SIR仲有野做。」
 
MACY「我唔返呀。你話冇事﹖冇事又會失蹤左成日,今朝仲好地地咁,究竟有咩事唔可以同我講呀﹖你仲有冇當我係你女朋友﹖」
 
李SIR「MACY,唔好咁啦,或者等阿駿休息一下再慢慢同你交代啦。」
 
我「李SIR﹗我冇野要交代呀。」
 




李SIR「駿,似番個男人啦,又唔係D咩傷天害理既野,MACY都係關心你之麻。我睇得出佢好緊張你,由今日係學校開始,同埋佢聽佢講佢都係度等左你幾個鐘呀,你點可以咁樣對人架。」「。。。」「不如咁啦,我地去個邊個公園仔慢慢講啦好冇呀。」
 
李SIR帶左我同MACY去到個公園仔坐低。李SIR「MACY,你俾阿駿講,唔好打斷佢,有咩等佢講完先問好冇﹖」「唔。」「駿,你講俾MACY知啦。」
 
「今朝我去攞報告。。。
 
=============
醫生「沈子駿,你個幾份醫學報告出左喇,我今日邀請埋黃醫生過黎同你一齊講解個報告,黃醫生係香港大學腦外科客席講師,係呢個範疇係好有經驗。。。」
 
「腦外科﹖攪咩呀。唔係攞完個報告就走得喇咩﹖」我心諗。




 
黃醫生「唔該哂張醫生。沈同學,你D報告各方面都好正常,唯獨係個MRI掃瞄呢,就係你左邊大腦入面發現左有一個1CM直徑既陰影。我地相信,個個陰影係屬於腫瘤,至於佢係良性定係惡性,我地都要同你再做一D化驗先知。」
 
「我有腫瘤﹖唔會架。。。我平時都好健康架,點會無啦啦有腫瘤架﹖一定係有D野攪錯左喇,會唔會好似電視劇咁,調轉左個報告呀﹖」
 
張醫生「沈同學,個D劇情係電視劇,仲要係個間電視台先有,要係現實生活中發生D咁既事既機會率係零。不如等黃醫生再詳細D咁講解下你個情況啦,包括個次你同我講過既類似幻覺既事。」
 
「你係指「停頓時空」﹖」
 
張醫生「冇錯。」
 
黃醫生「沈同學,簡單D講,你頭先所講既「停頓時空」,出現既原因我地估計係因為你個腦入面既陰影,亦即係我地估計係腫瘤既地方,壓住左你腦入面既神經線同感觀傳送既細胞,你個頭劇痛就係個副作用。佢會令你個腦電波係一剎間非常集中係某一個感觀,以你個情況,即係視覺,所以你係個一刻既視力同集中度會大大增強,而其他感觀,好似你咁,聽覺,就會差左好多。」
 
我聽住黃醫生個解釋,個腦一片空白。
 




黃醫生繼續講「仲有沈同學,你以後唔可以再參加高強度既運動比賽。」
已有 0 人追稿