九月一日,啱啱我中六開學。
   琴日我打機打到成三點先瞓,加上開學都係做埋啲無聊嘢,基本上我成日都喺度瞓教。
  返學等放學,放學飲可樂。話咁快就放學。
 
「喂,肥鈞,放學落ione咯。」我一路執書包一路叫我老死肥鈞,心入面已經
諗緊自己點樣喺戰場上穿梭,然後一招大殺撚哂佢地,PENTA KILL!!
 
「唔啦,我去自修室。」
肥鈞一句質埋嚟,將我團火兜頭淋熄咗。



 「吓…點解呀…? 」我呆咗。

我唔敢相信喺我眼前,呢個陪我打咗兩年LOL,中四開始日日落網吧,成個暑假都無出過街陪我雙排嘅肥鈞竟然會講呢句說話。
 
呢個真係我識嘅肥鈞?
 
「你無嘢呀嘛? 」我走埋佢望清楚佢,再摸下佢個額頭,睇下佢係咪發燒,燒到傻撚咗。
 
  點知肥鈞一手撥開我,揹起個書包,粒聲都唔出就走開。
 


「中六仲落網吧,實在太幼稚,太幼稚啦。」佢臨出班房門嘅時候同我講。
 
 當佢講完,頭也不回就走咗了。
 
 雖然咁講好似有啲 GAY,但有打過機嘅兄弟就會明,當有一日一個同你一齊打咗兩年機嘅機友同你講佢唔再同你打機啦,個情況其實同條女同你講分手無咩分別。而依家佢同你講佢唔再同你打機係因為要去自修室。
 
  間自修室俾咗綠帽我戴,好似係。
 
  班房所有人走哂,剩返我一個,我仲係呆咗咁企咗喺度,我仲未接受到呢個事實。



  又話一齊打到上鑽,上箐英,嗰種熱血,嗰股豪情壯志呢? 通通都係假嘅,我愈諗愈崩潰。
 
  自修室? WHAT THE FUCK?

  九月二日,我今個學期第一次遲到,點解? 因為我琴日嬲得濟一返到屋企就同部電腦瘋狂打機,打到凌晨四點,我直頭打到瞓著咗,唔係呀媽叫我我都唔識醒。
 
  但係我琴日一場都無贏到,果然無咗肥鈞嘅我係一舊垃圾…
 
  早會完咗,各班慢慢返自己課室,我被罰企喺學校門口,當時肥鈞經過見到我,我FEEL到佢眼入面有一絲絲嘅不捨,但當佢同我四目交投之後,又即刻拎轉面避。
 
  嗰種痛深深咁打入咗我嘅心扉,我DUP低頭喊咗,停唔到嗰隻。
 
 「喂,遲到姐,洗唔洗喊呀? 」一把老牛聲出現。
 
  佢係我地嘅訓導主任老嚴。平時佢好撚惡,可能見到我無啦啦流馬尿,嚇咗嚇。


 
 「好心你啦,喊咩呀,中六啦,成熟啲,咪咁幼稚啦。」
 
  我屌,因咩事個個都話我幼稚,幼稚唔好咩,我十七歲咋,仲未成年呀,咁撚成熟托春呀?
 
  我無理老嚴,一返到去課室就大覺瞓,明明我好撚眼瞓,但係我就點都瞓唔著,因為當我一合埋對眼,肥鈞同老嚴嗰啲 ”幼稚幼稚幼稚幼稚”就係咁喺我腦海度彈出嚟。
  打機就係幼稚?
 
  依家要去自修室先係成熟?
 
  究竟自修室有咩神奇魔力,連打機都比唔上?
  我望唔透。
 
  但肥鈞同我咁多年兄弟,我覺得佢一定有特別原因先會有咁大決心,我想跟佢去試下。
 


  登…登…登…登…登…登…登…登
  放學鐘聲又聲起。
 
  我一早就pack好哂個書包,一個箭步追上肥鈞。
 
  「我都想試下去自修室,帶埋我去吖。」我索哂氣咁捉住肥鈞講。

肥鈞此時輕輕一笑。
 「睇嚟你終於諗通咗啦喎。」
 「係掛…但我其實仲未知自修室有咩咁大吸引力…」
 「等我帶你去啦。」

   喺車上面。
  「喂,呀楠,有冇諗過溝女? 」係,我叫呀楠。
 


  呢個問題真係考起我,唔記得講,我係讀男校,除咗打J同埋老母之外都無咩接觸過女性。雖然我學校附近有兩間女校,但只限於放飯時間有機會撞到昅下,基本上都唔會有任何接觸。
 
  面對肥鈞咁尖銳嘅問題,我選擇沉默。

「老實講,我去自修室,唔係去溫書,係去溝女。」肥鈞好坦白。
「溝女…?」
「呀楠,中學時代唔溝女,你呢一世都會後悔,呢樣嘢係我呀哥話我知嘅。」

我識肥鈞呀哥,師兄嚟,佢依家讀緊大學,好似仲未拍過拖。
「我唔想當我第日大個諗返起自己中學嘅日子時,剩係得打機,我想轟轟烈烈咁溝一次女。」
 
  我聽撚到打咗個冷震,估唔到平時唔多講嘢嘅肥鈞今日竟然會講呢啲咁嘅溝女宣言。睇嚟肥鈞真係大個仔,青春期。

 「而且,我已經搵到鍾意嘅人,所以我先咁決斷戒打機,去自修室。」
肥鈞眼望住車窗外面,十足十鐵窗邊緣嗰啲剖白咁。



 「好,我支持你。」嘅然佢已經心意已決,做兄弟嘅一定支持。
 「呀楠,你都要。」肥鈞拍拍我膊頭,幽怨嘅眼神令到我唔敢直視佢。
 「乜自修室真係咁多女溝咩?」
 「你去到就明。」

話口未完,車就到站,肥鈞帶我嚟到一間灣仔嘅自修室。
 
  我開始有啲緊張,肥鈞講到咁誇張,唔通呢度真係咁多女?
 
  如果係嘅我仲驚,對於我呢個剩係識打機嘅小毒撚,女呢樣嘢對我嚟講真係非常陌生。
 
  不過算啦,我今次只係嚟陪太子讀書,況且話唔定我過一陣就頂唔順走去ione打機。
 
  唔識路嘅我一直跟住肥鈞行,去到一間市政大樓,由於大堂嗰架LIFT有好多老人家同細路排隊,間自修室又喺三樓,肥鈞就帶我行後樓梯上去。

  點知,一行到上三樓,我就睇到一樣我剩係會喺AV度先會見到嘅情節…

有一對男女坐咗喺樓梯度。
嚴格上嚟講只係個男仔坐,因為條女係坐喺個男仔上面,用雙腳夾住個男仔條腰…
由於條女擥大對腳,校服裙承受唔住,白滑靚腳表露無遺。
上面唔洗講,打緊茄輪。
個男嘅一隻手抱住條女,另一隻手嘅手形暴露於校章嘅四周,係咪講得好隱侮?
屌,揸緊波呀,係揸緊波呀!!!

  如果唔係肥鈞扯走我嘅話,我諗我真係企係原地,扯咗。

「你傻架? 企喺度眼甘甘喺度望,成個傻仔咁。」
「痴撚線架…喺呢啲地方做埋啲咁嘅嘢,俾人見到點算?仲成世界嘅?」

  雖然呢啲我睇AV睇得多,但當親眼見到,我真係接受唔到,好核突。
 
 「你夠係人,你依家咪見到,有冇事先? 啱先嗰啲小兒科啦。」肥鈞好似已經見慣世面咁。
 「呀楠,知唔知咩係蘭桂坊?」
 「我聽過,係啲大人去蒲溝女嘅地方嘛。」當然我只係知少少。
 「我話你知,自修室,就係學界嘅蘭桂坊。」