自修室，學界既蘭桂坊: 5

9月4日，一返到學校，我就同肥鈞講返哂琴日既事。
「屌，佢擺明lum你啦。」肥鈞笑住講。
「咁你個Venus呢?」
「我覺得..自己好似都有D機，同佢傾得好開心。」
 
  真係萬萬都估唔到，我地呢兩個初哥，去左自修室兩日就已經識到女，仲要好似撻得著果隻。
 
  上堂我地都完全提唔起勁，心入面只係想快D放學落自修室見女。
  今日自修室比起前兩日多人左，可能開左學一排，大家都意識到要開始溫書。



  慶幸既係，Venus佢地對面既位無人坐。
  肥鈞又買左盒朱古力放喺Venus檯面，Venus對住佢笑一笑，又拎起張MEMO紙準備寫，為今日既曖昧戰打開序幕。

  之但係，係Venus側邊，我剩係見到麻美，見唔到麻倉優。
  張檯上面，咩都無，係一個空位。
  做咩今日唔黎?
  屌，我好失落，打開佢個facebook，無update過。
  琴日同佢進展神速，但今日就唔見左人，搞到我好心急，我忍唔住問肥鈞借左張memo紙，打算問麻美。
 
  「點解Shirley今日無黎既?」



   等左足足成十分鍾，麻美先至應我。
  我一睇張memo紙，呆左一呆。
 
  「你黎溫書定溝女?」
 

 嘩屌你，咁撚串既。平時打開LOL都慣左咀炮架啦，依家就同你開拖。
  「無人溝你，嬲呀?」一定係見自己側邊兩個FD都有仔埋身而自己無嬲嬲豬，我串返佢。
 


「慳d啦，我先唔會喺度搞男女關係，你地咁樣，睇死你地入唔到U。」
  我心諗我入唔入到U又關你春事咩，我依家剩係想知Shirley喺邊。
 
  之不過，我諗諗下，同佢搞到咁彊都無謂，正所謂要溝一條女，必須要溝埋佢既姐妹，如果唔係佢日日係Shirley身邊講我壞話我就衰鳩緊。
 
  「黎啦jojo姐，你話我知啦，你講完我知我就會乖乖地溫書架啦。」
  「你點知我叫jojo架?」
  「我留意你嘛，你咁靚女。」
  
   我都唔知點解自己可以咁大膽講得出呢d咁狗公既說話，可能因為我真係好急想知Shirley喺邊。
 
  「妖，收嗲啦，你請我食盒Melty Kiss我就話你知啦!」睇黎佢見Venus係咁收朱古力，自己都想收下。
  我挑，原來個麻美係傲嬌格，早D講我就唔洗哂咁多時間啦。
 
  我即刻起身，走落去最近既7仔，買左盒士多啤梨味既Melty Kiss。


  一番到上去，咁啱麻美去完廁所，我地喺lift口度撞到。
  可能我之前剩係掛住望Shirley既關係，無咩點留意jojo呢個女仔，今次先係真真正正咁望佢全身。
 
  岩岩去到膊頭內彎既中短髮，小小包包地既臉，肥肥地既豐滿身材。
  除左條校服裙長左D之外。
  其實，都幾好J。

  「喂，你盒朱古力。」
  「多謝喎。」Jojo伸手想接。
  我即刻縮手，唔比佢拎盒朱古力。
  「你都未答我問題，Shirley去左邊?」
  「你真係咁想知? 你會後悔架喎。」
  我屌，呢條女真係好撚煩，但我忍住道氣。
  「你講啦，我唔會怪你架。」你再唔講信唔信我拎盒朱古力大大力啪落你塊肥面呀拿。



  「佢依家…應該同緊佢男朋友拍緊拖…」