自修室，學界既蘭桂坊: 10

今朝一瞓醒，已經12點，好彩今日星期六唔洗返學。
星期六，Shirley同Jojo會一齊補Econ。
然後我打開手機，見到Shirley搵我。
「Hey，早晨呀!」今朝九點幾就send嚟。

見到佢個msg，我就喺度諗，點解你琴日一啲消息都無?
係咪同Andy玩得太開心，已經唔記得咗車厘龜?
Shirley呢種若即若離嘅感覺真係搞到我囉囉攣。
但當我一諗返起自己錫佢嗰一刻，我就好掛住佢。
我今日一定要見到佢。





「早晨呀，琴日你地去咗邊呀?」

我嗱嗱林覆完佢，然後就走去搵我呀媽，因為今日我有樣好重要嘅嘢要做。
就係要報補習，然後去搵Shirley!

「老媽子!!!」我一路叫一路跑入廚房。
「呯，呯，呯，做乜鬼嘢呀!?」老媽子神咁早就喺度斬緊雞。
「阿媽…我…我…我想問你拎錢…。」
「呀仔，我每個月都俾成千五蚊你架啦喎，仲唔夠咩，又想買咩嘢呀?」




「唔係呀…我想…」

「肯定係又出咗啲新嘅動畫公仔啦，唉阿仔，買咁多嗰啲嘢無用架，你睇下你個櫃，裝呢啲嘢裝到滿哂啦。買咁多呢啲女仔模型，不如真係去識個女仔仲好啦…唉，當年係我衰，驚你讀男女校讀書專心唔到，要你讀男校，點知你都係讀得咁差，依家兩頭唔到岸，陰公囉…」
 
唉屌，我問你拎錢咪就係想用嚟識女囉。

「阿仔，雖然你入咗和尚寺姐，但你都唔好做和尚呀，你睇下隔離屋個阿俊…仲細過你，已經有女朋友仔啦…」

「阿媽!!!!!」我大喝一聲。
「我問你拎錢，係想用嚟報補習架!!!」






呯…
斬雞聲停咗。
阿媽粒聲唔出急急腳咁洗手，然後走咗入房。
搞乜鬼?
我企喺廚房，呆等咗陣，佢終於走返過嚟。
「去!去!去! 快啲去!」

阿媽手上拎住千五蚊，足足係我一個月嘅零用錢。

「衰仔，你終於生性啦，今次劏雞真係要還神囉。」

我接過千五蚊，心諗洗唔洗俾咁多我呀，報一個月都係四百幾…
「阿仔，夠唔夠呀，唔夠記住問我攞呀，你係去補習嘅話，多多都俾你。」阿媽笑住講。




 我聽到呢句，個心有啲唔好受。
 以前點樣求阿媽俾錢我買嘢，個結果都係唔得。依家我只係講一講我用嚟係報補習，阿媽就即刻係咁塞錢俾我。

 咁又係…
 世間上有邊個阿媽係唔想自己個仔生性讀書架…
 但係我就剩係掛住去溝女…

 不過其實…溝女同補習可以並存架姐，學Angus話齋，溝唔到女嗰陣咪真係溫書囉，同唔到Shirley傾計嗰陣，咪聽下個補習老師講書囉。

 總好過由朝到晚都留喺屋企打機呀…
 我係咁諗…
 老媽子應該都係咁諗…

 
 自我安慰完，個心叫舒服返啲。




 我拎起電話，見到Shirley覆返我。
「琴日我要陪男朋友去唱K呀，佢係都要我去，我都唔想架…Sorry呀留低你一個。」
 
 唉，即係我琴日已經輸哂，乜都做唔到。
 最重要嘅係，我仲未搞清楚當日同Andy打茄輪嘅係咪佢…

「你今日係咪同Jojo一齊去補習呀。」我問。
「咦，叫得出Jojo個名啵。」講完呢句，佢打咗一個奸奸樣嘅emoji。
「哈哈，係呀，傾咗幾句咁啦，係呢，你地補幾點呀。」
「補點九至三點呀，喺銅鑼灣。」

 掂…知道哂啲detail，可以去馬。
 我放低電話，即刻去沖涼換衫。
 今次係我第一次著便服見佢地，有啲人平時著校服都著到成套西裝咁，我地呢啲毒撚就一定唔係呢種架啦。
 所以，今日有得著便服，盡可能都著得型啲啦。




 之不過搵勻成個衣櫃，唯一似樣嘅得件白色Tee，黑色短褲，其他唔係太大件就唔啱著。
 唉，鬼叫我以前剩係識匿喺屋企打機，除咗新年都唔會買新衫咩。
 老媽子教落，著衫最緊要啱身，唔係件衫幾靚都無用。
 著完套衫，入廁所照照鏡，望住自己個樣，我忽發奇想。
 我諗起Andy同Marco。
 著衫就話無得搞姐，個頭，係咪可以搞搞佢呢。

 我望住自己個頭，再諗返起佢地個頭，我啲頭髮呢就都係一律向前飛，但佢地啲頭髮，就向前向後向咗向右無定向咁飛，睇嚟我都要試下學佢地。
 我拎咗我老媽子支mousse，噴咗一舊仔喺手，然後試下搽落自己個頭度。
 
 我憑記憶，將自己個頭搞到好似Andy咁，之不過唔知係咪因為我頭髮短，整極啲頭髮都唔成舊，一支支咁，人地就gel到成隻麒麟咁，我呢，都只係似一粒海膽。

 算，我見自己個look都型型地，又無乜時間，就咁啦。
 嗱嗱林揹好書包著埋鞋，我就準備出門口。
 




 
等陣先，第一次GEL頭，唔係好放心，都係再入去照照自己個樣。
 唔照由自可，一照，仆你個街，說好的海膽呢?
 啲頭髮墮哂落嚟，變返平時咁，但係又有層嘢係上面，油淋淋。最慘係本身我得一汁陰，依家分開哂，變咗有六汁陰…屌你老味!!條條fing呀!!!
 
 唉，唔識就咪學人GEL頭啦，正正常常咪算囉。
 我極速重新洗返個頭，吹返乾，然後衝落樓。
 望一望電話，已經一點搭四。
 唉，唔係要遲到呀話…

正當我絕望之時，一架的士徐徐駛來。