自修室，學界既蘭桂坊: 12

拎咗本notes，入到去課室，成班學生個個都狗衝上前排，我就無乜所謂，只要  坐到喺Shirley側邊就ok。
 
 我地喺中排搵到三個位，Jojo就同Shirley坐，我就坐喺Shirley側邊。
 開始上堂，仲諗住會見到個肥仔Ray真人，原來俾四舊幾水上堂剩係俾片我睇，有冇搞錯。
 
 個肥仔一輪咀咁講書，講得鬼死咁快，我完全追唔上，我見Shirley同Jojo佢兩個起勢咁喺份notes上面寫寫寫，佢地係咁寫，我唔寫，咪顯得我完全唔識?
 
 我唯有係份notes上面鳩畫下，畫咗一陣，就落堂。

「各位今日係咁多，記得下個星期六，我地會講Money supply，大家有時間嘅記得備下課先好嚟啵。」





 屌，終於落堂。
「Jojo，你明唔明呀，我唔係好跟到呀。」Shirley道。
「我勉強跟到啦，可能因為補之前我備咗少少課，但係佢真係講得好快呀。」
「車厘龜呢，你明唔明呀。」

 仆街，我應該點答好呢，我完全無聽書，唯有鳩吹下啦。
「個肥仔雖然講唔出啲咩大道理，但係佢同我學校個Econ阿sir一樣，都係個大肥佬，對於我嚟講好有親切感，所以，我叫做聽得明咁啦。」
 「哦…」Shirley聽到一頭霧水。





 「呀係呢，依家先三點，你地有咩做呀?」我即刻扯開話題。
 「我同Jojo會喺銅行街呀，你有冇興趣呀?」

嘿嘿，就係等你咁講喳。
「好呀!!」
就係咁，我就跟住Shirley同Jojo佢地去行街。

好老實，銅鑼灣我去得最多嘅地方就係喺Sogo對面間Ione，其他地方我都未去過咁濟，我跟住佢地行，咩東角，金百利，銅鑼灣地帶都行過哂，雖然間間商場個格局都唔同，但對我嚟講其實都係差唔多。

佢地一行街，啲少女情懷就出哂嚟，佢地拖住手，係鋪頭都走入去，乜都睇一餐，




雖然佢地行嗰啲我完全無嘢啱睇，但剩係睇住佢地兩個不停拎住件不同嘅衫對住塊鏡咗拎右拎，都已經值回票價。

點解我咁好彩，可以遇到呢兩個女仔?

「做男人最緊要係專一呀!!!!!」
正當我有呢個諗法嘅時候，含春的士佬嘅咆哮又再一次徘徊於我嘅腦海。

仆街，我突然周身唔聚財。
銅鑼灣同灣仔咁近，我依家同一時間同緊兩個女仔行街，會唔會俾的士佬發現?

啪一聲，有人拍拍我膊頭，係Shirley。
「喂Jojo，我地都行咗咁耐，不如我地幫車厘龜打扮下啦。」
正喺度睇緊衫嘅Jojo拎轉頭，望住我，諗咗陣，笑咗一笑。
「要啦，佢著成咁，一定無女仔吼佢。」






我俾佢地帶咗去一間賣男裝嘅時裝店，同佢地之前行開嘅唔同，呢間嘢入面黑蚊蚊又有吊燈咁，個感覺好高級。

一入到去，Shirley同Jojo就係咁四圍睇衫。
我對Fashion嘅嘢毫無認知，唯有求其鳩行，我望住啲衫，唔識睇，唯有睇下張價錢牌。

嘩，一件Tee都成三舊水，你唔好再狼啲!?
再望望，一條褲，成五六百蚊。
我開始有啲不安，雖然老母啱啱俾咗千五蚊我，但我已經拎咗四舊幾出嚟報補習，依家呢度啲衫平均成四五百蚊，買三件我已經唔夠俾。

今晚又應該要食飯…
如果一陣間我買完啲衫，食飯嗰陣無錢俾，我咪好柒?
正當我喺度盤算緊如果我一陣唔夠錢時點算好嘅時候，Shirley同Jojo都各自拎咗一套衫過嚟我度。

「喂，車厘龜，拎去試下吖，睇下邊套好睇啲?」Shirley捉住我講。




「其實點解你叫佢做車厘龜嘅?」Jojo問。
「哈哈，呢個係我地嘅秘密。」Shirley笑道。

我望住Shirley同Jojo拎住嗰套衫。
Shirley就係一件淺藍色嘅Polo tee加卡其色短褲。
Jojo就係一件白色恤衫加灰色七分褲。

「我覺得著短褲唔啱佢囉，你睇下佢，咁鬼多腳毛。長褲又斯文啲。」Jojo道。

屌你，男人有腳毛好正常姐，咪喺Shirley面前踩我好喎。

「但我覺得有腳毛都幾Man呀，依家又咁熱，著短褲好啲。」
「你快啲拎入去試身室試下啦，睇下我地邊個眼光好啲嘛。」Shirley續道。

其實我自己就無咩所謂，都係咁著，走到入試身室，望住啲衫。




係喎，我應該睇睇價錢牌先。
Shirley嗰套加埋就700蚊，Jojo嗰套加埋就成900蚊。
同埋我諗諗下，呢個都係討好Shirley嘅一個好機會。
我無試過就拎住啲衫行返出去，佢地兩個都好似好期待我嘅答案咁。

「我鍾意呢套多啲。」我指住Shirley揀嗰套衫。
「好嘢，不如你直接著住走啦，我想睇你著住佢呀。」
「好呀!」我笑住回應Shirley。
掂!好感度提升!!