自修室，學界既蘭桂坊: 31

第二日返到學校，我一直都無心情聽書，心入面剩係得兩樣嘢。
Shirely…Jojo…Shirley…Jojo。
上Geog堂嘅時候，Miss無啦啦突撃測驗做MC。
我一路做，做到有幻覺…
A.Shirley B.Jojo C.Shirley D.Jojo
救命呀，我就嚟思覺失調啦!!!

「嗰兩個女仔，邊個你一見到就會笑，邊個你同佢講嘢嗰陣唔洗咗諗右諗，有嗰句講嗰句嘅，你就揀嗰個啦。」老媽子嘅說話浮現於我嘅腦海。

收皮啦你…食屎啦你…收檔啦你…拜拜啦你…妖…




其實每次俾佢叫我收皮，叫我食屎嘅時候，我都好想笑…
其實每次我搣佢塊面珠墩時，我都好爽…
我不自覺咁拎起支筆，圈咗落Jojo度…

放學，落到自修室，今日Jojo都有嚟，之不過，佢無坐喺我側邊，坐咗係Venus側邊。
算啦，佢可能係想避開個小豬頭姐，唔關我事嘅。

去到食飯嘅時候，我都仲未同過Jojo講過一句說話。所以我想聊下佢。
「喂，Jojo。」
Jojo無啦啦俾我叫咗一叫，嚇咗嚇。




「做咩呀?」
「無呀，成日都無同你講過嘢，嗌下你咋。」
「車，無聊。」
個個都以為我仲有嘢繼續同Jojo講，點知我無。
無啦啦俾我咁樣搞一搞，個場dead咗。

「係呢，你地兩個琴日無嚟，你知唔知我地見到邊個呀。」肥鈞見我同Jojo dead air，就加把口埋嚟。
「見到邊個?」我同Jojo異口同聲。
「我地見到Andy同Marco嗰兩條仆街呀，拖住新女嚟添呀，佢地仲要成日喺度出出入入，擺明向我地示威啦。」





我聽到咁樣，我望望Shirley，佢點點頭。
「對唔住呀，我琴日應該要喺度陪住你。」我道。
「唔緊要啦，我飛佢嘅，佢樣衰啲，嘻嘻。」



到自修室收館，正當我諗住同Shirley一齊走嘅時候，我醒起，我地要送Jojo返屋企，廢事個小豬頭又跟住佢。

「係呀，Shirley，我地要送Jojo返屋企先。」我道。
「點解嘅?」

然後我就將Jojo嘅事話俾佢知。
「估唔到個小豬頭靚靚仔仔，原來咁鬼MK。」
「咦，點解佢剩係話俾你知嘅?」Shirley突然問我，搞到我唔知點答。





「err…可能佢覺得你地女仔幫唔到佢嘛，你又話我可能係佢唯一一個男仔frd嚟嘅，所以佢咪剩係同我講囉，應該無其他原因嘅，哈哈哈。」

落到樓下，同肥鈞Venus講拜拜之後，我同Shirley就陪住Jojo行。
「唔洗啦，你睇下，佢都無跟住嚟啦。你地走先啦，我ok架啦。」
「唔得，應承咗你架嘛。」我道。

Jojo聽到我咁講，就無再出過聲。

送完Jojo返屋企之後，我就同Shirley一齊搭車。
「Jojo有啲嘢。」Shirley無啦啦咁講，搞到我好不安。
「吓，有咩嘢?」
「呢排佢心情成日都反反覆覆咁，以前佢成日笑，成日都好開心，依家佢成日都木口木面，好似諗緊好多嘢咁，好奇怪。」
「可能係個小豬頭搞到佢咁啦…」我答。

「我覺得唔係，個小豬頭同佢根本都唔識，Jojo唔會因為一個唔識嘅人搞到咁。」




「咁…可能係佢屋企掛…」
「唉…唔知，睇嚟我地要多啲關心下佢。」Shirley講完就挨落我膊頭，恰著咗。

睇嚟…搞到佢咁嘅人…係我。

正當Shirley瞓喺我身邊嘅時候，電話震一震，係麥兜。

「車厘龜，我鍾意你，由我第一眼喺自修室見到你嘅時候，我已經鍾意你，我認。
好好彩我地真係識到，雖然你去識我只係因為我係Shirley個frd，但我無所謂。只要同你做到朋友，我就已經好滿足。」

「直到當你同Shirley表白嘅時候，我係側邊望住你，你知唔知我有幾想你係對住我講呀，琴日喺粥鋪嗰陣時，你話我係你女朋友，嗰陣時我真係…真係好開心，但兩秒之後我就喺度諗，你仲有大大個Shirley係你側邊架你知唔知，你有可能拋低佢唔要咩? 無可能。然後我就知道你呢句說話係幾咁不負責任，你講出嚟時當係一個玩笑，但你知唔知聽嗰個唔係咁諗架，點解你要玩我?」

「琴日我之所以無啦啦拖住你，錫你，係因為你話嗰一刻我係你女朋友，我只係想兌現你講嘅嘢，可能你會覺得我好變態，但嗰十分鍾我真係好開心，因為我覺得自己真係你女朋友。我永遠都會記得呢十分鍾…但之後，我就知道我已經打回原形。」

「今日，我以為我可以當乜事都無發生過，做返一個成日笑，開開心心嘅人，同你做返普通朋友，但當我見到你嘅時候，我發覺自己唔得，因為你已經知道我鍾意你，以前我都仲可以扮，但依家無可能。我覺得…我同你已經去唔返以前嘅溝通…」





「打完呢篇說話之後，我覺得我已經無面目見你…我覺得自己需要消失一下…」