自修室，學界既蘭桂坊: 33

食完粥，我就送Shirley返屋企，喺車上面，我又諗起Jojo。
「係呢，你話Jojo有啲嘢，咁你地喺學校嗰陣時佢點呀?」
「咁我又唔覺得有咩特別，之不過比起平時靜咗啲囉，問佢點解，佢就話依家開始要專心學業，之不過我就覺得係籍口嚟，佢不嬲都好專注學業架啦。」

「哦…」
「喂，你好似好關心佢咁喎。」
「係咩，哈哈，咁我同佢都算係好朋友嚟嘛，佢話以後唔嚟，我咪無咗個好朋友，我都唔想見到佢有心事…」
「嘻嘻，想知道佢咩事聽日補習你咪會見到佢囉。」

係喎屌，真係一言驚醒洛克人，聽日星期六，我同佢地一齊會補Econ，咁聽日咪可以見到Jojo囉。





「係喎!!」突然之間，我好鬼興奮。
「洗唔洗咁興奮呀你?」
「唔係唔係，只係突然醒起反應大咗姐。」
「哼，今日你成日開口埋口都係Jojo呀，知唔知啲人話，時常係你身邊嗰個人先係最珍貴呀，你望住我。」

Shirley用雙手摸住我個頭，令我望住佢。

「你就當我係吃醋，你依家只可以望住我，嘻嘻。」Shirley望住我道，然後佢就咀咗過嚟啦。






星期六，今日我會見到Jojo，所以我特登提早十五分鍾就出發去補習社。
如果…Jojo都早到嘅話，話唔到會有幾分鐘可以同佢獨處，可以同佢傾幾句。

搭車嘅時候，我再次打開我同Jojo嘅Facebook inbox，望住入面一句一句嘅對話，我好懷念。
記得有一次補完習，大家都好攰，各自返屋企，當我返到屋企開電腦時，就見到麥兜。
「一返屋企即on9。」
「個9唔係架…」麥兜續道。
「頂你爆粗。」
「online*…哈哈，一睇就知你對號入座啦。」




「好難唔入囉呢個座，你咁mean!」
「我唔mean囉，我嘅on9係online呀，毒男。」
「on9…」
「你!」
「on9!!!on9!!!你依家唔係on9咩!」
「要是我on9…你都on9!」
「你見到我就on9，哈。」
「你收皮啦…哈哈，做乜…」
「你見到我就on9，哈。」
「做乜變咗聊交嗌xdddd」
「因為你on9，聊我。」
「你食屎啦…聊下你吹水姐，緣盡啦我地。」
「我依家諗住覆習返頭先呀RAY講嘅嘢，一齊吖。」
「唔理你。」
「…on咗9又唔理我…」





每次睇返都覺得好好笑，之但係…你依家係咪真係唔會再理我啦…


去到補習社，早咗十分鍾到，我就企喺度等，期待Jojo嘅出現。
上堂時間到，成班學生一班又一班咁由部lift度湧出嚟，之但係，我都係見唔到佢。
第一架lift，無。
第二架lift，無。
第三架lift，我剩見到Shirley。

「咦，今日咁早嘅你。」
「係呀，早咗出門口。」
「我地入去啦。」
「吓?唔洗等埋Jojo咩?」
「佢琴晚同我講，佢報咗個中文補習，同今日撞咗時間，所以佢調咗堂，佢以後都唔會同我地一齊補Econ架啦。」





「洗唔洗咁…」我一時激動，講咗出口。
「咩洗唔洗咁?」
「無嘢。」

補習嘅時候，我完全提唔起勁聽書，心入面只係喺度諗，點解。
點解要避我避到咁…
睇嚟Jojo呢個人，會喺我生命中永遠消失。


我望住我身邊嘅Shirley，忽然之間我好似對佢無哂感覺，但諗真啲，其實只係依家嘅我太掛住Jojo啫。
我突然覺得依家嘅自己好危險。
係咪要到有一日連Shirley都離開我嗰時我先識得學識珍惜?

人總係要試過失去之後先識得珍惜。




但係有啲嘢失去咗就係失去咗，追唔返。
事到如今，我只能夠喺Jojo身上學會珍惜，珍惜我身邊嘅Shirley…