入到去考場,Shirley坐喺我我斜對面,我望住佢一直dup低頭喺度埋頭苦幹,喺咁喺度噤cal機。

希望你得啦。

考完卷一,我地喺出面等,我第一時間問Shirley考成點。
「點呀,識唔識做?」

只見Shirley一臉無奈,睇嚟我唔應該問佢呢個問題。
「唔緊要啦,仲有一份卷,努力埋佢,合格到就得架啦。」



Shirley無出聲,繼續默默咁背公式。
我都明白,考得唔好,心情一定係差。

MC都考埋,所有必修科目都已經考完,DSE就只剩返一半。
仲有成半個月先至考下一科,真係好痛苦好漫長。

之後嘅時間,我地幾個都日日落自修室煲geog,日日咁樣溫,開始有啲人都癲。

而第一個頂唔順嘅就係Shirley。
有一次,佢溫溫下突然掉底本書,走咗出去。


我即刻跟出去問佢咩事。

「做咩呀你?」我問。
「我就嚟溫到痴線啦,日日對住本書,望住同一段嘢同一堆definition,我溫到個人好炆呀,我已經唔知道自己邊啲嘢係識邊啲嘢係唔識啦…可唔可以快啲考完佢呀…我好辛苦…」

講完Shirley就攬住我,想喊想喊咁。
我都好明白,因為我都好辛苦,溫咗成年書,望住一堆重覆又重覆嘅課文,一條又一條重覆嘅題目,成日徘徊係熟與唔熟之間,試問有邊個會唔發癲。

「忍耐下啦,好快就會考完,到時一考完,我地燒撚哂啲書佢!!」我一邊掃佢背脊一邊講。



「車厘龜,我對DSE真係又愛又恨…」Shirley道。
「你竟然有愛DSE嘅一刻?我以為你恨不得佢死添。」我笑道。
「唔係呀…考完DSE之後,我地就無得日日喺自修室見…」
「傻啦,要見,度度都可以見,你係我女朋友嚟架嘛,點會剩係會嚟自修室先見到姐,考完DSE,我地仲可以周圍去拍拖,自由自在添。」

俾我氹咗幾嘢嘅Shirley,心情好似緩和返。

「DSE完咗之後,我地做啲咩好?」Shirley問。
「依家唔準諗住,諗壞腦,快啲盡全力溫書先。」

佢聽到我咁講,扁一扁咀。
「你依家唔俾多啲心機溫書,到時我地入唔到同一間U,就真係無得日日見啦,係咪先?」我續道。
「係…」
「快啲唔準偷懶,仲有一個月,努力埋佢!!」
「好啦…」



之不過好老實,我自己都唔係好捱到,去到臨考嗰幾日,成日覺得自己已經溫熟咗,所以成個人HEA咗,周不時聽歌瞓教。結果考完Geog,自我感覺炒炒地。

依家只係剩返Econ同英文oral,英文oral我地都唔當係一回事,當考完econ之後,我就當自己考完DSE。

好快就去到五月二日,今日考DSE Econ,亦都係我地幾個考DSE嘅最後一日。
Econ,係我最有自信嘅一科,我希望自己最少可以拎到5*。
今日,只有我同肥鈞喺同一個考場考,但肥鈞話,考完試,要去返自修室等。
我雖然唔明考完DSE仲返自修室做乜,不過佢地約好哂就是但啦。

八點半,考試開始,今日,我完全進入咗明鏡止水嘅狀態,去到做卷二嘅時候,我早咗十五分鍾就做完兼Check咗兩次卷。

我放低筆,一直望住大堂個鐘,個秒針一下一下咁跳動,仲有十五分鐘,呢一年嘅努力同打拼,一切都要完。

相信在場嘅百令個考生都係咁諗。



「依家係十二點三十分,考試時間到,請各位停筆。」主考官呢一句說話,代表一切都要終結。

在場好多放低筆嘅聲音,同埋好多低聲嘅呻吟聲。
完了吧,如無意外…

等其他監考員收好哂卷之後,主考官道。
「各位依家可以執拾好自己嘅隨身物品,靜靜地咁離開試場。」

靜靜地?睬你都傻啦。
主考官講完呢句,考場入面全部人釋放出一個最真摰嘅笑意,同伸一個最真摰嘅懶腰。

我屌你老味!!!我終於考完DSE啦!!!!!!!!