肥鈞二話不說就走咗,剩返我同Shirley Jojo,慢慢咁啲酒氣發上嚟,佢地都好似暈陀陀咁,各自瞓喺自己張床上面。

嗚呀!!!!望住此情此景,忽然之間嗰啲咩泥醉呀,誘惑呀,濃密呀嗰啲AV詞浮現哂喺我腦海。

我搖一搖佢地兩個,睇下佢地仲有冇反應,Shirley睇嚟已經進入咗深層睡眠,Jojo都仲叫仲有啲反應。

雖然我頭先個腦的確係有一絲淫念,之不過一個係我女朋友,一個係我嘅好朋友,唔通真係拍av咁,3P,或者妻目前犯咩。

之不過,望住佢地灘屍咁嘅樣,覺得好好笑,我就拎部手機出嚟,打算拍低佢地個爛醉樣,聽日拎返出嚟恥笑下都好。



我熄哂酒店房嘅燈,然後拎住部電話,成個AV攝影師咁,用啲浮下浮下嘅鏡頭喺佢地身邊遊嚟遊去,但佢地郁都唔郁,無咩好睇。

我伸隻手指去督下Shirley,佢已經瞓到好冧,見佢咁樣我就廢事搞佢,我淨係拍咗佢幾個睡相就算。

幫Shirley蓋好被,我就慢慢遊到去Jojo度,佢仲喺度典下典下,睇嚟仲未瞓著。

我望住瞓喺度嘅佢,著住件白色背心,肉騰騰咁,屈曲嘅身體夾住深深嘅乳溝,本身想影下,但諗諗下咁樣實在太變態。

我督下佢手臂,又搣下佢塊面,諗住搞醒佢,睇下會唔會有咩搞笑嘢睇。俾我搞咗幾嘢,佢終於醒返少少。
「做咩呀!?」Jojo醉醺醺咁,講嘢好慢。



佢坐返起身,呆呆滯滯咁,以前佢嘅形象一向都係好聰明伶俐,依家第一次見到佢咁傻咁蠢嘅樣,一定要拍低佢。

我拎住部電話繼續拍,360度咁圍住佢拍,佢好似都意識到我影緊佢,避嚟避去。

「影咩呀你…喂。」
「影你個低能樣囉,聽日你就知死。」我笑道。
「唔準影呀!」Jojo舉起佢對手四圍撥,之不過醉咗嘅佢睇嚟連距離感都掌握唔到,剩係喺度撥空氣,好似喺度開無雙咁。

成個畫面太好笑,我決定走上張床,哄埋啲整個close up,點知一哄埋去,就俾佢捉住咗我隻手。


醉咗嘅佢好大力,我掙脫咗幾下都甩唔開佢隻手。
佢捉住我,矇豬眼咁望住我。

「你係車厘龜…」
噢,佢好耐無叫我做車厘龜。
「係呀,做咩呀,放開我啦。」
「車厘龜…」
Jojo捉住我,反壓咗我喺床上面。
嘩,搞咩玩女上男下?
我繼續拎住部電話影住佢,然後問。
「喂,你想點呀?」
「我控制唔到自己呀!!!!」Jojo無啦啦大叫一聲,不停用雙手揼我,好大力,好鬼痛,痛到我要放低部電話去制止佢。

我捉住佢隻手同佢鬥力,但係醉咗嘅佢嘅無情力好勁,我竟然唔夠佢大力,佢將我大字形咁壓喺床,哄埋個頭落嚟,好埋…好埋…我好不安…咁樣俾個女仔壓住,你話有咩可能唔扯…



望住面紅耳赤嘅佢,佢每一下吸氣呼氣都好感受到,仲不停噴氣落我塊面,慢慢我同佢嘅呼吸都同步起上嚟…

我同佢個咀嘅距離就只有10cm…
望住佢面紅紅,眼瞇瞇個樣,喺呢一刻,小小楠係咁慫恿我咀過去,但係理智叫我唔好咁做,因為一咀埋去,一定一發不可收拾。

我同佢四目交投,我呆哂咁望住佢…醉咗嘅Jojo真係好迷人…

「車厘龜,我仲係好鍾意你呀…」
咩話…?

講完呢句說話,Jojo就真係頂唔順,趺咗落我身上。

佢趺喺我身上,我感受到佢嗰陣酒氣,佢個肚腩仔,同埋佢胸前嗰雙軟肉…

之不過,令我感受最深嘅,都係佢啱啱嗰句說話…



俾佢壓住咗一陣,我好辛苦先可以嘅唔整醒佢又翻到身,我拎返部手機,返返自己張床,深呼吸咗幾下。

重溫咗幾次啱啱拍低嘅片段,前段嘅佢真係好膠…
之不過我最期待嘅,都係後面嗰堆黑畫面,嗰一句說話。
車厘龜,我仲係好鍾意你呀…
呢一句說話,我足足loop咗三十次…