的士佬遠去,我地五個就繼續我地餘下嘅旅程。
去埋九份,平溪,都係不外乎觀光同食嘢,無乜特別。夜晚雖然肥鈞係咁話想再飲多次酒,但我地無聽佢講,變咗玩下三國殺,掘金呢啲集體卡Game。

玩呢啲卡Game最講究嘅就係要隱藏自己最底嗰張底牌,我發現我同Jojo都玩得好叻。
因為我地現實中心入面都一直玩緊呢個遊戲。

去到第五日,今日係我地台灣之旅嘅最後一站,我地去到十分老街。
呢度係放天燈嘅發源地,我地當然要嚟一嚟呢度試下放天燈。
喺天燈上面,我地只要寫上一個又一個嘅願望,然後點火將佢升上天,當天燈升到上天空,我地嘅願望就能夠實現。



「喂,大家有咩願望呀?」Shirley問。
「我要減肥!」Venus逐筆逐筆寫。
「我要搵好多好多錢。」肥鈞啲字好核突。
「咁我要身體健康啦。」Shirley道。
「其實你地係咪唔記得哂,依家緊係要入咗大學先啦。」我道。
「係喎!!」眾人齊道。

我地一人一筆,組合成”我要入大學”呢五個字,佔咗足足一版嘅天燈。

「係呢,Jojo,咁你仲有咩其他願望呀?」Venus問。



Jojo聽到Venus咁問,眼仔碌碌,諗咗一陣。
「我…我要拍拖!!」然後佢就大大隻字咁寫咗喺第二版。


聽到Jojo咁講,大家都呆一呆,無人估到佢會答呢個答案。
「你唔係唔care拍拖架咩,做咩依家無啦啦話要拍拖嘅?」肥鈞問。
「哈哈,以前要考DSE要專心讀書,所以緊係唔可以諗呢啲嘢啦,依家乜都過哂,係咪俾我發下夢都唔得先?」

聽到Jojo話佢好想拍拖,我個心就不停地抖動,呢句說話究竟係咪同緊我講?



「哈哈,仲以為Jojo係尼姑,唔會諗呢樣嘢架添。」肥鈞道。
「你就尼姑!!!本身都係架,但之前睇完求婚大作戰之後,佢真係將我嘅少女情懷揮發哂出嚟呀。」

「喂,我地個個都寫咗一個自己嘅願望,阿楠你呢?」肥鈞轉個頭,問我。
仲喺度沉思緊嘅我,俾肥鈞咁樣嗌一嗌,嚇一嚇。
「我有咩願望?我真係諗唔到喎。」Jojo啱啱嘅說話一直喺我腦海縈繞。

「唔得呀,每人都要寫一個。」Shirley遞支筆俾我。

我拎住支筆,久久不能落筆,個個喺度望住我,我望到Jojo嘅時候,諗起佢個願望。
你要拍拖,好,我都想你拍到拖,但要同我拍拖!!!

「我嘅願望就係,你地個個嘅願望都成真!!」我豪筆一揮,留下剛勁嘅筆跡。
「咩願望嚟架…好hea囉。」肥鈞道。


「我咁樣犧牲自己嘅願望去成全你地,咁都叫hea?多謝我啦你地。」
「好威喎。」Jojo道。
「好啦,依家個個都寫哂,我地放佢上去啦。」Shirley開心地道。
「好!」

我地圍咗個圈,拎住個天燈,肥鈞將佢點上火。
「準備啦,三,二,一,放手啦。」
我地幾個一齊放手,個天燈慢慢咁升上天空,愈嚟愈細粒。

全部人都一齊昂高頭望住個天燈,我偷偷望下各位,都係一副充滿盼望嘅樣子。
我又望下Jojo,佢充滿盼望個樣,好甜。

放完天燈之後,我地留喺呢度影咗好多張團體相。企哂喺度嘅又有,瞓哂喺度嘅又有,各種甫士各種花臣都玩過哂。

影影下,Venus忽然講。


「喂各位…我地係咪呢一世,都會係好好嘅朋友?」
「做咩咁問呀?」Shirley道。
「無呀,旅行就嚟完,有啲感觸姐,再過多一排就放榜,我地就要各散東西啦。」
「放心啦,我地約定好,就算到時我地去到邊都好,都要好似依家咁,得閒就聚埋一齊一次!」Jojo搭一搭Venus膊頭。
「係呀,我地以後都會係好朋友!」Shirley道。

我同肥鈞都一齊點點頭。
「好嘢!」Venus笑道。

跟住,我地幾個都好似痴咗線咁,鏡頭去到邊就撲去邊,享受埋我地旅程最後嘅一分一秒。十分車站上面每一塊嘅石頭都遍佈我地嘅足跡。

喺十分車站,我地十分幸福。