自修室，學界既蘭桂坊: 68
放榜前果晚，我地五個約好左，今晚我地一齊唱通宵K。唱完就直接返學校共赴刑場。
開頭唱K既時候，大家都仲好high，點哂D鳩叫歌一齊喺度鳩叫。
之不過，去到三四點既時候，大家都開始叫到無哂力，靜左落黎。
「仲有幾個鐘就放榜啦…」Shirley挨喺我膊頭道。
「我唔知點解依家個心不自覺咁卜卜卜卜咁跳，緊張到暈…」Venus道。
「唔好咁啦你地，個成績一早就定左，都改唔到架啦，平常心啦。」我道。
「呢d野講就易，依家真係殺到埋身啦，我都有d驚…」Jojo道。
「到時呢，大家出左成績，記得即刻互相同大家講，報平安呀。」肥鈞道。
「我驚我差到唔敢講…」Shirley dup低頭。
我望住佢…睇黎佢真係好驚，我掃一掃佢背脊。
「唔好咁啦，你會ok架!到時我同肥鈞拎完成績，我地會即刻過黎搵你地。」
「嗯…」
好快就到朝早，我地五個去到車站等車。
距離放榜既時間就只剩低一個鐘。
見到佢地架車就到，我地圍埋一個圈，互相搭住膊頭，一齊集氣。
「喺呢個時候已經唔可以講加油，大家…祝大家好運啦!!OSH!!」我大叫道。
「OSH!!」眾人齊道。
Shirley佢地上左車，就剩低我同肥鈞兩個。
「阿楠，你好似好輕鬆咁喎。」
「喺d女面前緊係扮輕鬆啦，其實我都好驚，肥鈞你又點?」
「我本身都無乜野，但見佢地咁緊張，搞到我都緊張埋一份…」
「我真係好驚，到時拎到張成績單一望果一刻，見到d我唔想見到既數字呀…」肥鈞無啦啦崩潰。
肥鈞一直都好驚中文，中文2左既話就唔洗旨意入大學，我呢一刻都好明白。
因為一日唔睇張成績單，都唔會知自己考成點…
「唉，要黎既始終要黎，唯有比d勇氣面對佢…一陣返到班房個氣氛應該仲緊張。」
講完，車就到，我地就上車返學校。
返到學校，學校已經放緊暑假，好冷清，死氣沉沉咁，就好似同我地講緊我地全部都準備要死…
見到既人都係同我地同Form既人，個個都面如死灰。
我同肥鈞行到入6B班房，有一半既同學已經到左，有人表面睇落無乜野，有人喺度訓教，有人瞇埋眼喺度唸經。
我見到Bebu，走埋去揸左佢幾野之後，就坐返埋自己個位。
時間愈黎愈近，我唔知點解不自覺咁手震起上黎。
我唯有雙手合十，瞇埋眼，從來都唔信神既我，喺呢一刻竟然祈禱起上黎。
「求下你求下你…比我過關…最多我得左以後都唔打飛機…」我都唔知自己喺度嗡緊乜。
好快，我地6B三十六個學生都到齊，大家自從Last day之後都無見過，大家都互相講d勉勵既說話同埋聚下舊，有人仲喺度派佢去旅行既手信添。
我發現6B班好有愛，好窩心，忽然之間，我好有衝動，我企左起身。
「6B既各位! 無論我地考成點，無論大家日後去到邊度讀書，大家每年都要出黎搞一次班聚呀，好唔好!?」我大叫。
「係，大家到時都要著住我地件班Tee，出黎事但搵個人黎corn!!」肥鈞都企起身大叫。
「好!!!!!!!!!!!!」6B既每一個聽到我地咁講，本身有D沉寂既佢地都精神為之一振，一齊大叫左一聲。
見到大家都精神返，洗脫哂頭先既頹氣，我好開心。
咯咯。
我地既班主任Miss Ho，拎住一個公文袋，企喺班房門口敲一敲門，我地全班人既視線都轉哂過去。
呢一個咯咯，立即打沉哂我地頭先激昂既士氣，大家見到Miss Ho，又再次變得死氣沉沉。
因為大家都知道，死期到了。
「早晨呀咁多位。」Miss Ho道。
「早晨…」眾人都無哂心機。
Miss Ho走到去班主任個位，企喺度望住我地全班。
「今日係香港中學文憑試放榜既日子，咁一陣我就會跟住大家既學號派成績單比大家，我嗌到你地個名你地就出黎拎啦。」
聽到呢句說話，成個班房既空氣都好似靜止左咁，大家連氣都唔敢透一啖。
Miss Ho慢慢咁拆開個公文袋，拎左一疊紙出黎，呢疊紙，就代表哂我地咁多個人既命運。
Miss Ho拎住我地疊成績單道。
「好，開始啦，一號，歐陽傑。」
Miss Ho毫無先兆咁就叫左我地一號既歐陽出去，歐陽慢慢咁行出去，我見到佢隻手喺度震，我地全班個個都替佢擔心。
歐陽行到出去，接過Miss Ho比佢既成績單，佢好有勇氣，一接到張成績單就拎轉黎睇。
當佢拎轉成績單果一刻，我地每個都凝視住佢張臉。
佢由一副拿埋口臉既緊張樣，剎那間眼耳口鼻返番原位，變到無哂表情。
歐陽拎住份成績單，霎時間變到好似隻喪屍咁，行屍走肉咁行返埋自己個位，呆左咁坐左喺度，成個人都無哂靈魂。
我地見到佢咁既樣都知道，佢衰左，所以我地都唔敢去問佢考成點。
「好，二號，陳俊文。」
Miss Ho無理到歐陽，繼續派落去，喺呢一刻我覺得佢好似一個鐵石心腸既判官，喺度宣佈我地既死刑。
阿文佢不嬲成績都唔差，佢自信滿滿咁行出去，接過Miss Ho份成績單，Miss Ho比佢既時候，拍一拍佢個膊頭。
阿文佢一拎到份成績單，又立即拎轉黎睇，睇完佢握緊拳頭，個拳頭一直喺度抖動，然後佢高呼左一下YES!!!!!!!
當佢YES完之後，我地個個望住佢，有D人投以羨慕既眼光，有D就對佢咁大既舉動有D反感，阿文都知道到自己反應大左，就靜靜地咁走返埋位，之不過佢一路咀角都Keep住向上揚，笑笑下咁。同佢側邊既歐陽形成好大既對比。
的確，考得好緊係值得開心，呢一刻我都好明白佢係好難掩飾自己心入面既興奮。
「三號，陳榐楠。」
呼………..要黎既始終要黎。