我即刻打俾Jojo。
「喂?做咩呀?」
「睇咗Jupas未?」
「一早睇咗啦,你依家先睇?」
「係呀,你入到咩呀?」
「Hehe,A1呀,好開心。」

我屌!!!!!
唔通就係我差Jojo嗰少少grade,搞到我入唔到?
我好唔忿氣,對住個keyboard係咁啪,噤到個F5都爆撚埋,個網頁都係Show CU ECON俾我睇。


我徹底咁絕望…
Shirley又要走,又同唔到Jojo讀同一間大學…

「喂,做咩呀你,你入咗邊間呀?」Jojo見我無講嘢,就問。
「CU ECON…」
「噢,幾好吖,我本身A2都放呢個架,我地差啲做同學呀。」

嗚呀!!!!!我就係想同你做同學呀…
「喂,不如你唔好要個A1,嚟同我做同學啦…」我道。
「你都痴線嘅,入KONG U係我嘅夢想,亦都係我阿爸嘅要求嚟架,我入到不知幾開心,我先唔會同你癲。」



我呢一刻真係眼淚在心裡流,我拎住部電話,無出聲。

「唔同你講啦,都唔知你做乜,唔鬼講嘢,我煲劇先啦,拜拜。」講完,Jojo就收咗線。

收咗線之後,我醒起仲有肥鈞,就打俾佢。
「喂,你Jupas入咗咩?」我直入正題。
「嗚呀!!!我入咗City呀!!!Venus都係呀,我地以後可以一齊返學啦!!!」肥鈞把聲仲興奮過當年佢拎到penta kill嗰陣。

「我一定要住Hall,最好同Venus住埋同一棟添,咁就可以日日見啦!!」


「…..」

肥鈞見我無出聲,就問。
「阿楠咁你入咗乜嘢呀?」
「CU econ…」
「咁咪好囉,CU多女呀,又夠淫亂,我呀哥成日講咩”聯合組媽最盡責,含吹奶啜有方法”呀,到時Ocamp整返件囉。」

聽到肥鈞講得咁開心,我無名火起。
「屌你啦…last day嗰陣又話咩讀埋同一間U,住埋同一間Hall,啲承諾去哂邊呀,邊個先真正有異性無人性呀,仆街啦你。」我破口大罵。

「…你考得咁好...你都知我啲成績架,我邊入到CU喎,就算真係入到,我地呢啲兄弟,講心嘅,想幾時見都得啦,你當係體諒下我同Venus,我咁辛苦先追到佢,萬一到時佢俾人溝咗去,我又要做返毒撚,話唔定一做做四年,你個心過意得去咩?」

我緊係明,其實我都係借啲意屌下佢,發洩下我同唔到Jojo做同學嘅怒火姐。

我扮嬲cut佢線。望住部電腦好灰,我即刻爬返落床。


唉,Shirley又走,Jojo又去HKU,肥鈞Venus就去City,我地幾個日後就要分開香港九龍新界同…英國…。

今次真係各散東西。

Jupas都過埋,搞掂哂入學嘅嘢之後,一切都已成定局,好好享受埋餘下嘅暑假,我地嘅人生就正式踏入一個新嘅階段,由一個中學生變成一個大學生。

呢一個八月裡面,每日都同Shirley行街食飯睇戲,呢期嘅戲都俾我地睇過哂,雖然話就話珍惜最後同佢相處嘅一分一秒,但係日日咁樣出法,你唔悶我都悶。

八月二十五日。今日,Shirley就要飛去英國。
琴晚我同佢傾咗個通宵電話,其實我地要講嘅嘢都講哂,但只係大家都唔願瞓,唔願收線。

今日,佢爸爸媽媽都會一齊送佢機,我就只好同Jojo佢地,用一個朋友嘅身分去送佢。

去到機場,今次我地幾個唔係一齊去旅行,大家都無哂嗰種興奮嘅心情,今日嘅是重聚,亦係離別。



Shirley撇甩咗佢嗲哋媽咪,我地去咗機場嘅一個角落到見。
見到嘅時候,佢地三個女仔攬埋一舊喺度喊。
六年姊妹,今日之後就要分隔兩地,我都非常明白佢地嘅心情。今次反而Jojo同Venus喊得仲犀利過Shirley。

「你地唔好喊啦,放心啦,我好快就會返嚟架啦…最多到時帶幾個One direction仔仔俾你地,唔好再喊啦。」Shirley道。
「嗚…我地由中一開始就一直同班到依家,日日一齊食Lunch…估唔到依家就要分開…」Venus一邊喊一邊道。
「唔好講到我好似就死咁啦…」Shirley苦笑。

佢地一路喊一路喊,女仔一喊起上嚟真係停唔到,好快,Shirley就夠鐘上機。
今日我同佢好似都未講過啲咩離別嘅說話,佢就要走。

我地陪住佢行返去登機閘口,佢嗲哋媽咪一直企喺度等佢。
見到佢咁堅強個樣,我知道佢係裝出嚟,作為佢男朋友,我好想搞喊佢…
Shirley一步一步咁行去登機閘口,過多幾秒,我就要起碼再隔四五個月先至可以再見到佢。



Shirley,我會等你架!!!!
呢句說話我好想嗌出嚟,但一直都壓住喺我心底。

「我走啦。」Shirley向我地揮住手,道。

Venus佢地幾個都揮住手,但我就一碌木咁企喺度。
Shirley向住登機閘口行咗幾步,又再拎轉頭。
「我走啦。」好明顯,呢句說話係同緊我講。

呢一刻,令我諗起當日Shirley拎走我初吻嗰陣時,佢都係咁樣,講咗兩次「我走啦」。
我知道佢好想我做啲嘢,但係,佢嗲哋媽咪都喺度,我唔敢,我只係望住佢,揮揮手。
結果,Shirley就拎轉頭,慢慢咁走入去,佢嘅側面慢慢消失…
我始終都無講到嗰句說話。
我同Shirley,正正式式咁踏入Long d呢個嘅個戀愛階段。