《曾經懵懂的日子》（真人真事）: 感受、男人的初戀情意結
寫到呢到暫時唔寫主線。
反而想寫下我大個左之後，點睇我同小江之間發生的事。
上回寫到事件1: 2006年10月小江係我面前攬第二個成功地激走左我。
同埋事件2: 2007年10月左右小江好似想同我係番一齊。
事件1, 諗番我覺得自己係好Hi Hi，因為我一向同自己講，做一個冷靜處事，淡定有錢淨，唔好俾理性蓋過感情的人。所以，會俾某d同學形容為cool/喜怒不形於色。
但係無考慮過，對於一個女仔而言，成熟姐姐型可能鍾意，但一般普通女仔同我一齊會有一種壓力。
咩壓力？就係唔知到底我緊唔緊張佢。
至於點解我面對住佢攬第二個我都無上前問的原因係咩，我前面已經提過。
因為我同佢一齊個幾日，消息迅速傳開。
身邊出現唔少同學向我灌輸一個訊息：佢同你一齊只係貪你cool, 佢玩你！
面對自己條女去攬第二個，中學雞思想係 一兩個咁講就可能講下，5-6個人咁講就"一定"有原因。
因為咁，我認為既然佢都係玩我，做人何必要抓爛自己塊面呢。
但係，因為小江攬完第一次之後，佢同佢老死見我不為所動。
小江無露出一副失望表情，反而繼續攬。之後臨上pe堂甚至再攬多獲。
腦中天使：自己瀟灑離場好過自己Seven多獲。被女玩一次，仲想俾人玩第二次。
魔鬼：你上前可能有得追番。
縱使我當時個腦海諗緊點樣上前問會無咁Seven。
得出兩個結論
1) 霸氣地拉小江隻手走：我有野同你講。
2) 靜觀其變，睇埋小江之後會唔會露出一副失望表情。（因為我見到小江個老死米子坐係我對面，正面向住我，對眼監視我咁款，猶如g4要睇實老闆咁。所以我就特登唔表露任何表情，決定留意下小江攬條友個時係好enjoy定有少少失望/對我的期望。）
點知，小息攬完一獲，臨上pe堂係男女更衣室門口你仲攬第二獲。
咁多地方你唔選，你選女更衣室，洗唔洗跟埋佢入去？
理性天使：叫左你唔好Seven多獲，睇定d先啦。
好彩你聽我講，唔係你呢獲Seven到無朋友呀。
企係對面籃球架下的我，單手插袋望住。
心諗：Hi Hi天使，呢獲唔洗你講，我自己都feel到Seven，feel到佢由始至終都係玩我。
於是我扮無野地轉身走。同學問我去邊，我話：去交部數碼相機俾miss
對住個同學，我唯有扮無野。
其實只係我面對攬第二次的場面，無眼睇落去。
氣氛差到自己感受到火藥味由心而發。
攬一次可以視為外國禮儀，外國人耐無見到舊朋友會give a hug.
但係佢個種唔係hug, 兩次攬都係男女朋友個種，女方雙手攬住男方左手手臂唉落去。
所以我都無得呃自己係激我。
不過第一次攬個男又無手多多，第二次我印象中離遠好似見到男有放隻手去小江膊頭定唔知背部。
呢part原諒我，我真係唔記得呢個detail
諗番覺得自己咁武斷係好Hi Hi。
本身已經第一次攬已經feel到自己Seven左，只係做男人，Seven左都要死撐，唔好擺上面俾人恥笑。
第二次攬直頭點著左我心入面的炸藥，將我個心炸到穿左個窿，心都散開唔知幾多塊。
大個問番個老死小江同高佬黃個時到底有無一齊過，點解問老死，因為Seven野只能夠同老死/能夠交心的朋友傾。
老死鍾："好似"無
我：暗戀你咩，有就有，無就無。咩叫"好似"
姐係唔知啦
上星期我問過另一個舊同學，答案都係：唔知
如果答案係無，其實係我欠佢一聲"對唔住"
佢無對我唔住，無欠我
因為大個我諗番，當時攬完之後，佢地係學校又好似無男女朋友咁成日一齊，又無聽到佢地一齊的說話。我唔知係身邊朋友顧我感受定佢地都唔知。
佢地邊有咁好死
依加我反而覺得，我根本無資格怪佢。
佢kiss完我之後，我無搵佢兩日。
佢難免會覺得係佢女方溝我在先，令我唔緊張佢。
所以搵d野激我，試探我緊唔緊張佢。
如果我唔緊張佢，我就唔會同佢一齊時，放學明明無野做留係度等埋佢。
其實係我自私，又無諗過佢感受，無真正溫柔地了解過佢。
係我無去了解女人心理感受先會導致件事，由簡單的拍拖變成複雜的分手。
複雜到連對住朋友的詢問，我都只會搬出"無疾而終"/"大家玩玩下"敷衍了事，其實係自己唔想傾，轉換話題。
世界上無"無疾而終"呢回事，講得出呢4個字的人，其實只係佢地唔想講件事/唔想面對件事/唔想面對個"疾"其實出係自己身上。
而我個case, 就係both
一來唔想同朋友傾，覺得好Seven。
二來"疾"係自己身上，如果我當時肯緊張d, 上前捉佢走問清楚，講清楚，都好過唔清唔楚。
依加大個左我估個答案其實係佢激我，不過我無從得知真正答案，因為我fb inbox過佢好多次，ig都係，電話唔見左，問舊同學都係唔知佢現時電話。
問高佬黃？更加咪搞，因為不嬲睇佢唔順眼，仲反埋面。
你話我仲係同中4一樣要面怕Seven？
我會答你："現時的我，恩怨分明。但感情無恩怨之分，只有 有feel定無feel"
好多野唔洗太認真，太認真只會令自己諗得更複雜，易鑽牛角尖。
以前成日俾d miss 讚我心思細密，呢個係優點，同時係我缺點，缺點係咩？"簡單複雜化"
依加反而學識反其道而行之"keep it simple stupid"
何年希金句
唔係剩係應用到係飛機，應該係人際/感情絕對受用。
學高登仔話齊："船到橋頭自然直，鳩到痕時自然硬。"
現時，就算佢答我，佢當年真係玩我都好。
我都唔會怨佢。
因為，我好感謝佢曾經出現係我人生之中，如果無佢出現，佢唔係我初戀的話，可能我都唔會去思考以上呢堆野，唔會有一番感受，唔會可以好似現時咁，咁坦誠咁同人講感情野/內心感受。
引用一句別人的話"There are those who would barge into your life just to give you a lesson, and then they would turn around and walk away."
情況就好似《那些年》的柯振東咁
男人對自己的初戀的看法係"初戀總是難忘的"
你可能會話：你當時連上前問清楚的勇氣都無，你憑咩話你曾經真心鍾意過佢？
咁我會咁你：如果我無真心鍾意過佢，當時佢攬完高佬黃之後，我就唔會番學無心情聽書，自己係度睇書死撐扮無野，唔會幾日都諗同一個問題"佢到底有無真心鍾意過我", 唔會有一日放學屋企無人自己攤係床上面諗起佢，唔會不期然地眼濕濕。
個次應該係我呢世人第二次因為人眼濕濕，第一次好似係因為親人（當然唔計睇感人戲的時候啦）
或者呢d就係d人所講的"初戀情意結"。
男人大多數都係愛面子同自尊的生物，我諗唔係好多男人會好似我現時咁"毫無保留地面對自己感受"
（中4個時的我更係無諗到呢方面，個時剩係諗kiss完唔好咁快搞住，欲擒故縱，應該感受下戀愛係咩，相處幾日太快搞野好似唔係咁好）
大個左更係覺得唔洗理相處幾多日啦，啱feel就得。
當我打完呢篇之後，我發覺呢篇比較似"兩性愛情專欄"
所以陣間應該會開另一個post, 搬過去感情台，同巴打們再作討論
不過，"過去"呢樣野，間中看看就好，不要停留太久。