當年一次因為學風水,跟住師傅通山跑,係飛鵝山遇到“佢”。 

話說當年我仲細,考完會考無野做,一心想做風水佬既我,跟住我師傅周圍去尋龍點穴,坦白講,係香港龍真穴的既地方的確有,如果唔係香港都唔會有而家咁繁榮。 

其實所謂既龍脈其實就係一個又一個既山頭,串連起黎既山脈。古時唔記得咩朝有個叫做郭璞既人,曾經出過本書爛時十分之好賣,叫做《葬書》,入面就一段十分容易理解既說話,解釋左究竟咩野叫做風水,佢係咁寫既,睇下大家睇唔睇得明,如果你無根無底都可以睇得明,我強烈建議你打個電話比我留位上堂,有天份就唔好埋沒左佢嘛,哈哈。 

「氣乘風則散,界水則止。古人聚之使不散,行之使有止,故為之風水。」 

如果睇唔明,簡單解釋就係,天下間萬物皆有靈氣,而靈氣既流動係透過山川河脈不斷移動,可以想像為電同電線,電就係靈氣,而山川河脈就係條電線。古時既人利用各種方法將靈氣聚集係某個特定既地點,例如:墓地,村落,咁就係風水啦! 





係香港真正認識風水,真正想學風水既一定要親身去到山上行下,如果唔係你只會係一個書房派鍵盤戰士,拋書包就叻。而當中最多人認識係香港既其中一個墓就一定係孫母墓啦,孫中山媽媽既墓地。
 1910年孫母過身,孫中山因為受到多次起義失敗而困身,未能夠出席孫母葬禮,於是交由革命同志兼老死羅延年處理孫母身後事。 

當時羅延年同一班革命同志籌完旗,帶住孫母既屍體誤打誤撞地下葬於飛鵝山百花林一個即葬速發叫做「鐵樹掛銀燈」或者「鵝鳩穴」既風水寶地,點知個頭葬完,一年後孫中山發動既「武昌起義」就成功推反左滿清政府,建立左民國,你話丫,世界上邊有咁岩架。 

不過都係唔講咁多,入返正題,個次師傅同我地幾師兄弟上到去飛鵝山,師傅就叫我介紹下個桃花蠍子穴,因為當年雖然我仲好細個,但已經係幾個人既師傅仔,為師傅分憂就係我既主要工作。 

師傅就話見累就搵個地方坐下飲下水,我就帶幾個師弟行,話佢地知來龍點來,去脈點去,認識下咩叫藏風聚氣,咩叫做風水。 

其實當時係大約晏奏2點,總之好好太陽,咁我地行行下,有個師弟話尿急,忍唔住啦,我就叫其他人上去會合師傅先,我帶佢去山邊隱蔽處屙尿。 





咁我同佢兩個人一齊行既時候我已經同佢講“記得講唔該借借呀,如果唔係比野搞唔好怪師兄我唔提你!”,我果然係一個細心又體貼既男人。 

我地好順利行到去無乜人見到既位,咁就一齊屙尿啦(當然係另轉身,im not gay),咁拉開褲鍊既時候師弟無啦啦話“屙尿你就咪搞人啦!”我停一停,諗一諗,佢唔係同我講野呀嗎?
 咁我都覺得有d唔對路,就極速屙完想轉身走啦,點知一拉完褲鍊就feel到有人用力一野推埋黎我左臂....... 

講真我完全無估到有呢著,好在阿叔我運動神經當年仲好好,度力一到我就係地下碌左個圈,散咁啲力,如果唔係就真係一命嗚呼啦。 

呀唔記得講,其實屙尿個度有個斷層位,我地就係斷層上面屙尿,下面就係一個keep住斜落既緩坡。(其實個斷層講緊只係一米多少少,但都夠死人了,我覺得) 

咁我仲碌係地下既時候緊係望下邊個推我想我走啦(其實應該只係得一個人姐...),我一望上去見到師弟9秒9跑緊走,心諗:你個小賤人丫!係個個momment我就真係以為佢推我,我就好嬲啦,差d玩出人命。 





正當我企返起身住上返去既時候,我呆左係度,原來頭先屙尿既時候我前面有幾棵樹仔,係我既左後方有個“阿叔”企左係度,我一路唔知,照屙。 

個一刻我終於明白唒,原來拍師弟膊頭個個係“阿叔”,推我個小賤人又係個“阿叔”,原來阿叔本身係棵樹仔下面攤抖緊,見我地想屙尿落佢個竇就拍一拍師弟,諗住嚇佢走,但我已經極速整污糟左佢個竇,於是佢就嬲到動武啦.... 

原來,無講唔該借借個小賤人....係我。 

主角“阿叔”因為比我淨污糟左個竇,心生不忿,一怒之下一野推埋黎,推到我滾地一周半,差啲碌落山,命送飛鵝山,魂斷百花林。 

當我知道唒來龍去脈後,我係褲袋拎左疊溪錢(其實得十張左右),拎包黑冰出黎,拎個火機燒左疊溪錢,點左支煙放係石頭上面,然後用我親切既笑容,誠懇既態度同“阿叔”講左句:對唔住,小小心意,唔好嬲呀下!,之後我就慢慢行返上山。 

其實個刻我好淆底,就好似碧咸係世界杯射十二碼一樣咁緊張,但係班師弟同師傅面前唔可以無面架嘛,上到山,屙尿師弟已經同其他人講見到“阿叔”,佢一比人拍完膊頭就另轉身講個句,轉個身就已經見到“阿叔”怒啤住佢,佢當然即刻嚇傻左,第一時間狗沖返上山頂求救啦。 

師傅知道左我奶野,佢淨係笑笑口對住大家講左句“由得佢啦,佢死唔去既”,好師傅,無你不斷訓練我,我都唔會有今日既高度應變能力,唔會有今時今日咁好既演技,我真係好愛你呀師傅....
 你問我關演技咩事?哈哈,你睇落去就知道演技對於一個撞鬼既人黎講,係幾咁重要,不但可以化干戈為玉帛,仲可能令你逃過一劫大難,所以,繼續睇落去啦!
已有 0 人追稿