大學可以幹的事很多，但不包括走堂: 還是不走堂好了

「我地可以用微分法去確定反應既速率方程，首先對一般式左右邊一齊求對數，然後......」

我們進入了一間「課室」，它不是一般大學見到的課室，只是裝扮著課室的擺設 - 排了七零八落的數張椅子，前方是一個大屏幕，播放著Professor King的講課情形。

冼龍沒有跟進來，這表示他非常有信心即使我們不在他的視線範圍內，亦無法逃離這裡。

冼龍的離去，加上來到貌似熟悉的地方，我選擇不去胡思亂想，將無盡的恐懼暫時趕出身體，繃緊的心情終於放鬆了一點點。

「隨便坐啦，我諗你地都坐過一次，唔會陌生。」我和Hazel形影不離，選擇坐在對方的旁邊。





大屏幕內的Professor King吸引著我的視線，我觀察到他的服飾正正就是剛剛Professor King所穿的。這時候我終於明瞭箇中的原因：黑子每堂都用著微形攝錄機，拍攝著每堂的情況，然後在這裡轉播給我們看。

當然，黑子選擇坐最後排，是為了不讓人發現她正在偷拍。〈好像九十年代在電影院偷拍電影的方法〉

「你..........大學生..........會..................任？」卷髮教授的聲音很小，又與背景的聲音重疊，變得怪異極了。

「下？聽唔到。可唔可以講多次？」

卷髮教授也看出了問題的原因，轉眼間將周圍的擴音器關閉，Professor King變成默劇內的主角。





「你地覺得大學生點解要有社會責任？」這次聽得清楚了。

萬萬也想不到卷髮教授有這突如其來的一問，我沒有多想，就發表了自己的看法：「大學生有知識，有社會地位，關心既不應只限於自身利益同埋前途，仲應該要用自己既專業知識去為社會帶來更多正面既影響。」

Hazel也點頭同意，不過教授對我的答案沒有作任何回應或評論，就繼續問道：「咁大學生可唔可以走堂？」

我首先答：「當然可以，大學課堂冇take attendance，學生就有自由去選擇上定唔上。有時寧願坐定定兩粒鐘，聽又聽唔明，不如用呢兩粒鐘去圖書館溫書仲有效率。」

Hazel補充：「咁大學既生活又唔淨係讀書既，仲有好多好多野可以做。可惜時間始終有限，若果太專注係爆GPA的話，根本就同考公開試根本冇分別，反而享受唔到真正既大學生活。大學生有時走一兩堂我覺得可以接受。」





「不過你地有冇諗過走堂帶黎既損失有幾大？」我們稍稍搖頭。「第一，教授的課沒有人上。」這個我反而感受最深，尤其看到現在屏幕上Professor King頹透的樣子。「第二，納稅人啲錢係會供你地讀書的。你地每年要交總共廿萬蚊既學費，納稅人幫你地交左十幾萬。簡單計一計，每走一堂兩粒鐘既Lecture，納稅人就損失幾百蚊係你地身上。」

卷髮教授繼續發表他的見解：「所以我認為，上堂都係大學生應有既社會責任之一，上足堂先係回饋社會對你地期望既最佳方法。但好可惜，新一代既大學生似乎唔係好明白呢個道理。入左大學就以為自己上左岸，走堂變左家常便飯。所以對我黎講，呢個實驗對動物未免太過殘忍，但對大學生不會。」這句話果然是卷髮博士的口頭禪，他對大學生的印象也真不好。「好，我諗你地大致上都明白我地做緊乜。仲有冇咩問題想問？」

「藍鳥計劃既最終目的係想對大學生進行知識植入，我有冇講錯？」Hazel問道。

聽到這裡，那份無止境的絕望又再次從腳下竄出來，它飢渴極了，渴望侵襲我的身體，我竭力保持鎮定，與之抗衡。

卷髮教授面露笑容，拍掌道：「果然係搵到實驗漏洞既人，推理能力不同凡響。大致上同你所講既一樣，或者我可以再解釋一下：感官隔絕過後的腦袋是最脆弱的，由於經過長期的空白所折磨，任何外來的刺激都會深深刻在每個腦細胞內。你地每個走堂既人第一次都會首先被特工『邀請』來到這裡：社會科學學院六樓，戴左護目鏡同埋其他器具之後就扔入『隔離房』進行整整時五小時既感官隔絕，確保腦袋喪失控制的機能後，最後再帶佢地黎呢度睇番錄影帶，每次既流程都係咁。」

「咁之後點解逢星期一、四佢地定時定後就會過黎？有可能嗎？」Hazel問了我剛想問的問題。

「暗示。『走堂而又獲得知識』在腦內造成了強烈既暗示。雖然你表面上唔會察覺到，但內心卻非常渴求這種狀況，而《綠袖子》就係因為呢個原因而出現係實驗裡面。《綠袖子》作為洗腦既媒介，將係呢間房以外獲得既不愉快經歷都壓抑同隔離，最後只剩下我地預先設下既暗示。走堂又可以有好成績，唔使問每個人都會再走堂，對路線既記憶自然就將佢地帶番黎呢度。不過人腦真係好奇妙，《綠袖子》是一把雙面刃，竟然都可以透過喚醒記憶來解除暗示，呢層係我之前從未諗過既。」

「咁點解係我地？」在我心中，這個問題才是最重要的。





「你應該問點解係Professor King既學生。不瞞你地，我係睇住Professor King入職的，都算係佢前輩。我起初揀讀化學既理由好簡單，因為一直以黎我都以為下藥係最有效的洗腦方法，吐真藥、催眠藥、迷幻藥......研究它們在身體內產生的反應令我好興奮。所以三十歲我就攞左博士學位，係呢間大學做教授。不過一路愈研究下去，就愈發現用藥的限制太多，對身體的損害也太大。即使成功『欺騙』大腦，也會對大腦造成無可挽救的損害，令我幾乎想放棄。個陣工作上仲要唔愉快，自問我講書都已經唔係照書讀，學生都係照走我既堂。我個陣係度諗：『唔通我既人生一直行左一條錯既路，三十年青春就此白過？』幸好研究藥物的同時，機緣巧合咁發現感官隔絕這種另類的洗腦方法。再者，中情局的消息靈通，對我的研究亦加以支持，幫我搵左個咁理想既地方，咁我自然就搵番母校取資源同學生。」

世界那麼大，卻幸運地選中我們。除了硬吃，還能幹甚麼呢？

「而走堂既學生剛好最不引人注目，我地見唔到曠課既人，就無法知道佢地們在個半至兩小時的Lecture之間做緊咩，除非連你自己也一起走堂，形影不離地陪著佢地。最後形成骨牌效應，所有人都黎晒呢一邊，係咪咁？」

我就像答對困難問題的學生，換來教授滿意的點頭讚許：「一啲都冇錯。」

「我地係第一批大學生？」

「唔係，你地已經係第二批，而家幫你地錄影緊既係你地上屆既同學伍凱利，佢上年完成晒整個實驗，已經學晒所有野，要攞滿分當然完全冇難度。我地放佢黎同你地一齊上堂有兩個目的，一來想監控著邊個走堂，一來都想睇下第一批人既完成度如何，算係後期調整既一種，睇下時間會唔會沖淡洗腦既效果。」

螢幕上Professor King的獨腳戲，我再看不下去了。現在才十一月頭，學生們都走光了，這麼大的講堂就只剩下黑子一個，教授的內心肯定沮喪極了。





「即係話伍凱利係開學先出現？」

「都唔係，佢係你地好開心咁玩緊O-Camp個陣伍凱利都已經係度。作為你地既未來同學，佢都好應該有玩O-Camp的權利，你地竟然冇印象，伍凱利一定好失望。」

「第一堂我冇番學點解冇事既？」

「重要嗎？」

「重要。」

然後整間房就陷入一段長時間的沉默，教授久久都不肯說出原因。反而轉話題說：「我諗中情局仲想利用我既研究去做更大的事，例如控制人既意想之類，但呢啲已經係後話。我地互相幫助，但互不干涉，我只係想專注完成今次既實驗。頭先都講到《綠袖子》可以作為洗腦既媒介，不過就係有個不能解決既缺點。好好彩，我地已經諗到解決既辦法，兩位亦都有幸成為先鋒。」

「先鋒你個頭啊！混蛋！」我按耐不住，衝向教授，拳頭同時往教授的臉頰揮去。

起初我還以為冼龍會衝進來護駕，或者卷髮教授會有方法避開突然發難的我。





可惜現實卻與想像相差甚遠，教授顯然來不及防衛，右邊臉頰吃拳頭吃過正著，倒在地上。

教授掩著受傷的臉，神情表現得很痛苦，他躺在地上，用著變了少少調聲音說：「講到底我都做左件好事丫，你地學生冇上堂既責任，我都有幫手承擔。雖然唔可以好似中小學既老師咁教你待人處事，不過作為教授，至少我可以做既，就係將知識，換個方式，傳授晒比你地。今次你地應該唔會再記得起痛苦，希望你地既人生從今以後幸福快樂。」

這就是自我有意識以來，聽到的最後一句說話。

當雙眼前方漆黑一片的同時，那份無盡的恐懼再次湧進來，我再也抵擋不住，被它迅間佔據我整個身體。

我不害怕死亡。若果就此死掉的話，我只會歎息天妒英才。
因為至今我活了十九年，無論是開心、頹廢與否，至少我都是照著自己所期盼的，一路走至現在。

可是，從今以後我作的事，會是我自己想作的嗎？還是我只是一副被控制著的軀殼？

我會活著，卻絲毫沒有活著的感覺，可能連我是否活著這樣簡單的問題也不能依照我的意志思考。





這樣的話，我，還再是我嗎？