我衝左過去啱先小貞同林文龍玩緊既位置,然後望下左邊,只見一堆細路係到玩緊瀡滑梯,但唔見小貞同林文龍既蹤影;再望一望右邊,只見一堆細路係到玩盪韆鞦,都唔見小貞!!!
 
「小貞!小貞!小貞!」我好似一隻唔見左媽媽既貓仔咁,不停係到叫喊。
 
我好慌張,我唔知點做好,都係我既錯,我應該好好睇住小貞!
 
聽到我叫喊,北川景子、林太,同其他師奶都走哂過黎。
 
「小貞……小貞同林文龍唔見左……」我一邊講,一邊啲眼淚好似決堤咁係咁湧出黎。
 


呢兩個星期我所流既眼淚既份量,就好似呢世仔儲埋儲埋既份量,一次爆發出黎。
 
林太聽到自己個仔唔見左,佢都好慌張,「咩話?龍仔唔見左?」
 
「無事既,細路仔唔會去得邊。」
「係囉,應該係附近玩緊架姐。」
「呢頭啲治安都好好,唔會有事既。」
「洗唔洗報警呀咁?」
 
啲師奶七嘴八舌咁安慰我地,北川景子就話:「咁啦,我地一齊係附近搵下先,搵唔到就報警!」


 
「好呀……好呀……」於是乎,啲師奶就開始四散,拖埋自己啲仔仔女女去搵小貞同林文龍。
 
「小貞……你唔好有事呀……」我崩潰地道,雙腳係咁震緊。
 
北川景子拖住瑜仔,走過黎同我講:「我唔認識小貞,唔知佢咩樣,我跟埋你去搵啦!」
 
我呆左咁望住佢。
 
「行啦!」佢喝一喝我,就拉住我走左。


 
我失左理性,就算女廁有人,我都照衝入去搵,不停橫衝直撞,連撞到途人我都唔理,而北川景子就係咁係段面幫我同途人道歉。
 
最後佢忍唔住,拉住我講:「你冷靜啲好唔好!」
 
「你叫我點冷靜呀!」我咆哮著。
 
「你咁唔冷靜係唔會搵到你個女架!」
 
「對唔住……」
 
「快啲細心啲望下啦,你形容下你個女咩樣,今日著咩衫俾我知啦……」
 
我將小貞今日既衣著講俾佢知之後,我地繼續搵。
 


搵左無耐,北川景子突然大嗌:「喂!係咪嗰個呀?白色鴨仔T同紫色泡泡短褲喎。」
 
我望一望北川景子指住既位置,係呀!!!係小貞黎!!!佢身邊拖住左家姐同阿南,阿南左手邊再拖住左林文龍!!!
 
我即刻衝左過去,我諗住要鬧小貞,鬧佢做乜無同我講聲就自己走左去,鬧佢知唔知佢令我好擔心,無左半條命咁濟,但係衝到埋去,啲責罵既說話去到嘴邊就講唔出黎,唯一想做既,就係好好攬實小貞。
 
「小貞呀……小貞呀……」我喊到豬頭咁既樣,跪低攬實左小貞。
 
「傑哥哥……嗚……」小貞見我喊得咁犀利,佢又喊埋一份。
 
我係第一次見小貞喊,佢喊到塊臉紅過番茄,對眼眯埋左一齊,啲眼淚水係咁流出黎。
 
細路仔喊係會傳染既,林文龍見小貞喊,佢又喊埋一份,瑜仔見佢兩個喊,佢都喊埋一份。
 
聽到我地既喊聲,所有人都走哂過黎,林太都發現左自己個仔,又走過黎攬住自己個仔,一邊喊一邊鬧:「衰仔你走左去邊呀?」


 
家姐見我地喊成咁,就好無奈咁話:「其實……我地係公園門口見到佢地玩緊吹泡泡,當我地走埋去時,小貞就唔小心跌親……」
 
我望一望小貞對腳,係喎!左腳膝頭哥擦傷左,有少少血!
 
「我有消毒藥水同膠布,等我黎啦。」北川景子講完之後係佢個背囊到拎左支黃藥水同一包膠布出黎,我讓開左位置,俾佢幫小貞消毒。
 
北川景子好細心咁樣幫小貞清洗傷口,而林太就拉埋林文龍一邊去話佢,其他師奶就講左句:「好囉好囉!搵返就好囉!」,於是就四散左。
 
「小貞好堅強,跌親都無喊,但一見到你喊佢就喊。」家姐講。
 
我點頭回應,我仲未冷靜落黎。
 
「喂你乜事喊得咁勁?」仆街南就淨係掛住揶揄我。
 


「我以為小貞唔見左……」我擦乾啲鼻水再講。
 
點知阿南就笑勁我。
 
「好啦,咪再笑佢啦,佢嚇到面都青哂啦。」家姐幫口道。
 
「好啦,搞掂哂!」北川景子幫小貞貼埋膠布就企左起身講。
 
小貞膝頭哥到多左塊黃色鴨仔膠布,雖然佢已經無再喊,不過仲係眼紅紅咁,於是我就踎低幫小貞擦乾啲眼淚同鼻水。
 
「Hi, 你係?」阿南問北川景子。
 
「哦,你地好,我係將會搬黎呢區既新鄰居,我叫Yan,佢係我細佬,叫李哲瑜瑜仔。」北川景子正式自我介紹道。
 
「我叫阿南。」


「叫我Katie。」家姐道。
「我叫阿傑。」
 
「阿傑,你個女好可愛。」Yan笑笑道。
 
「多謝,其實佢係我收養返黎既,不過我已經當左佢係我親生女。」我解釋道。
 
「哦,原來係咁。」然後佢踎低對小貞講:「小貞,你有一個好錫你既爸爸呢。」
 
「嗯!」小貞點一點頭,再講:「我最愛傑哥哥!」
 
嗚哇!小貞一咁講,我啲眼淚水又係咁標出黎,攬住小貞喊。
 
搞到家姐同阿南都係到笑勁我。
 
我同Yan交換左電話號碼之後,因為搞完一輪而家夜已深,家姐同阿南都返屋企啦,我就拖住小貞慢慢行返去。
 
行行下,小貞停低左。
 
「做咩事呀小貞?」我踎低問小貞。
 
「對唔住呀傑哥哥……」小貞皺埋眉講。
 
「做咩同我講對唔住……」
 
「令你唔開心……」小貞睇落去好似好內疚咁,佢耷低左個頭講。
 
「傻女……下次唔好啦……」然後我攬住左小貞,再摸摸佢個頭。
 
經過今次咁有驚無險既經歷,我必定要更加好好珍惜小貞。
已有 0 人追稿