突然做左人地老豆，多左個女: 23
又到左第二日，我好心急同好期待個親子勞作展，放左學之後，我早早就去到幼稚園。
可能今次係親子勞作既關係，所以多左好多家長係到，再唔係淨係得啲菲傭係到啦。
小貞見到我，就好興奮咁拖住我去我地既作品面前，正確啲黎講係阿南、家姐、小貞同我四個人既作品。
我地既作品拎左優異獎，小貞好開心咁樣拉住我隻手係到跳舞，無諗過當中有兩個藝術細胞係零既人都會拎到優異獎。
不過我望一望周圍，原來好多細路都拎左優異獎。
「呵呵，你地過黎睇下我既作品啦！」呢個時候，小傲嬌小海出現左。
小海既作品真係好誇張，雖然佢都係設計城堡，但係成個城堡就貼滿住閃粉同閃珠，成個城堡都閃令令咁，睇黎係私伙野黎，咁重本唔怪得知有亞軍。
「小海好叻！」小貞豎起手指公讚小海。
「叫我Yvonne！」小海又鼓起泡腮，漲卜卜咁話。
不過我左望右望，都淨係見到小海個印傭，見唔到小海個老豆老母。
「小海，你老豆老母呢？」我問。
只見小海垂低頭，好不情願咁講：「佢地唔得閒……」
連黎個展覽都唔得閒，我諗呢個作品都唔會係佢地親子合作整既，似乎係小海同個印傭一齊整既。
我忽然覺得小海好可憐，同時亦明白點解小海同小貞可以咁快做到好朋友。
佢地兩個既情況好相似，不過唔同既係，小貞既處理方法係用善良既方式禮待他人，收埋自己；而小海所用既方法就係對他人兇惡，保護自己。
睇完個展覽之後，我就拖住小貞返屋企，不過小貞好似悶悶不樂咁，全程都無出過聲，行行下，個天忽然有啲雨毛仔跌左落黎，但係我無帶遮，唯有拖住小貞快啲走。
「喵喵……」轉角位突然傳黎幾下貓叫聲。
小貞好好奇咁走過去望，見到有隻全身都係黑色毛既貓仔坐左係紙箱到叫。
雨愈落愈大，我唯有走埋去用雙手遮住小貞個頭仔，小貞就小心翼翼咁抱住隻貓仔。
我未養過貓，唔知呢隻貓幾多歲，不過佢睇落去真係好瘦好細隻，忌廉哥已經唔知係佢既幾多倍。
我估係因為佢係全黑色，所以啲人唔要佢，就咁將佢放係到，等其他人去接收佢。
小貞抱實左隻貓，好似好怕佢會俾啲雨水淋濕咁。
「小貞呀，返去啦，唔係會感冒架啦。」我道。
「佢都會感冒。」小貞摸摸隻貓既頭仔道，隻貓「喵喵」叫左幾聲，好似係到回應緊小貞咁。
係咁既情況下，我無辦法，唯有同小貞講帶埋隻貓返左屋企先。
一返到屋企，我即刻用條乾毛巾抹勻小貞全身，幫小貞換左套屋企衫，不過小貞完全無放開過隻貓，就算換衫嗰陣子，佢都單手捉住隻貓。
隻貓可能已經嚇呆左，就算小貞點抱佢，佢都好乖咁唔掙扎。
「小貞，你俾隻貓我，我幫佢抹下身啦。」我道。
小貞靜靜咁、好溫柔咁將隻貓遞向我。
我抱住左隻貓，換過條毛巾開始幫佢抹身，我未試過幫貓抹身，不過我估應該係由對眼開始既，而小貞就係旁邊好緊張咁望住我地。
我凝視住隻貓對眼，有好多眼屎，多到佢其實唔係好點張開到對眼，我拎塊毛巾沾濕左少少水，然後開始幫佢抹，抹走左啲眼屎之後，佢對亮晶晶、圓碌碌既淡褐色瞳孔出左黎。
然後我再幫佢抹一抹個身，佢唔多唔少都俾雨水淋濕左啲毛，但我唔敢用風筒吹佢，怕會嚇親佢，所以唯有落力啲幫佢抹多幾次身。
「喵喵……」係抹既時候佢間中會叫幾下俾你聽。
「做乜事呀？」聽到隻貓係到叫，小貞又會哄埋黎問隻貓，不過隻貓唔應佢，佢又會縮返埋旁邊。
抹完之後，我發現條毛巾有幾粒黑色一點點既物體，我估應該係貓蚤黎。
好彩既係喺抹身既過程觀察過，隻貓身上無其他傷，不過佢真係好瘦，一摸落去就好似摸到骨既感覺，令人好心痛。
我將隻貓遞返俾小貞，然後打俾家姐。
「喂，我執左隻貓返黎。」
「吓？？？」對面既家姐咆哮著。
我都估到佢會咆哮架啦，所以已經拎開左部手機。
「你養小貞唔夠，仲要養埋隻貓？」家姐繼續問。
「我都唔想架，但小貞攬實左佢，而且又落緊雨……」我解釋道。
「咁你而家點？你真係諗住養佢架？」
我望一望小貞，再講：「小貞好似好想養咁……」
「唉，我有個朋友養貓既，我問下佢點做再whatsapp你啦。」講完家姐就收左線。
後來佢send左一連串whatsapp俾我。
「唔好餵人飲嗰啲牛奶俾佢飲, 落去寵物店買個籠或者準備個紙箱將佢放入去, 等佢適應下個環境先。」
「去寵物店買埋貓糧貓沙同貓沙盤, 仲有貓既飲水器。」
「安置好佢之後要將佢隔離, 因為唔知佢身上有無其他菌, 之後再book獸醫做檢查。」
「啲糧唔洗一次過餵咁多, 佢可能會唔適應會嘔返出黎。」
「佢飲啲水唔好係熱水, 要係正常室溫既水。」
無論家姐口裡面話幾咁唔願意都好，佢最後都係好認真咁send哂啲資料俾我睇。
「你睇哂啲資料啦嘛？」仲要打黎向我確認多次，明明whatsapp兩個剔係已經睇哂。
「睇哂啦。」
「咁你仲唔去買野？？？」家姐咆哮完又收左線。
我將隻貓暫時放係廁所先，費事佢會周圍跑，於是拖埋小貞一齊落去買野。
買完野，將隻貓放入籠安置好佢之後，隻貓好似好攰咁，無乜點食野，又無乜點飲水，淨係伏左係條毛巾到訓教，而小貞就係旁邊眼甘甘咁望住隻貓，可能隻貓感受到小貞熾熱既眼神，有時都會開一開眼望住小貞，不過望左兩眼之後又會合返埋，貓真係一種好高竇既動物。
「好啦，小貞，好啲去沖涼訓教啦。」
小貞點點頭，先依依不捨咁走開。