九月開左學之後,小貞同我既生活都一切順利,瑜仔呢個大喊包有聽明而又善良既小貞,同埋充滿霸氣既小海帶住,佢都堅毅左好多。至於我,就同Miss Cheung whatsapp返,不過內容都係閑話家常,而Yan,因為大家日日見面既關係,我地既感情都增進左唔少,除左朝頭早會hi, bye之外,有時Yan都會whatsapp我,問我關於幼稚園既事、揀小學既事,同埋湊仔既事,因為Yan同我一樣,都係一個人湊住個細路,所以好多時我地都會交換心得,可能係Yan同啲師奶唔啱傾,所以佢好多時都會搵我。
 
「傑哥哥!!!」
 
我聽到小貞係廁所到用住比卡超聲線呼叫我。
 
因為小貞已經升讀K3啦,所以家姐要佢學識自己沖涼,所以自從開學之後,小貞都開始自己一個沖涼。
 
聽到小貞叫我,我即刻狗衝去廁所,見到小貞已經沖完涼,換好新既衫褲,我覺得好奇怪,小貞叫我過黎做乜呢?
 


小貞皺住眉,指住個垃圾桶話:「我以為係衫桶⋯⋯」
 
我一望,原來小貞將啲污糟衫順手扔左落去垃圾桶到。
 
呢個情況我都試過,因為諗緊野,以為個垃圾桶係衫桶,就懵下懵下咁將啲污糟衫扔左落去。
 
我忍唔住禁住個肚恥笑小貞做左啲白痴野,小貞就鼓起泡腮,塊面漲卜卜咁。
 
我執返起係垃圾桶到啲衫,簡單咁洗一洗,然後安慰小貞話:「唔緊要啦,傑哥哥都成日將啲污糟衫扔左落去個垃圾桶到。」
 


小貞聽到我咁講,即刻面露歡顏,笑到格格聲咁。
 
氹左小貞訓覺之後,我都hea左陣準備訓啦,呢個時候,阿南打俾我。
 
「仆街快啲開電視呀!」佢咆哮著。
 
「小貞訓著左喎。」我道。
 
「你開左先啦。」阿南道。
 


我開著左部電視,一睇,見到有個瘦蜢蜢既細路係個台到講緊野。
 
我認得佢,早嗰排政府話要搞咩國民教育,佢有份帶頭反對,佢好似係叫黃之鋒。
 
不過嗰陣時我並無去參加,因為對於中左六合彩既我黎講,有無國民教育都唔關事,唔會影響到我夜夜笙歌既生活。
 
「我地而家可以衝入公民廣場啦!」
 
電視新聞到播緊黃之鋒大嗌呢句說話,然後好多人、好多學生衝左入去個廣場到,爬牆既爬牆、鳩衝既鳩衝,有啲就守住後面既人,場面好震撼。
 
然後啲警察開始衝出黎,包圍住佢地,舉起紅旗,甚至開始對住啲學生狂噴胡椒噴霧。
 
「到底發生乜事?」我茫然地問阿南。
 
「屌!我要去幫拖呀!係咁啦!」然後佢就收左線。


 
阿南一向係一個好熱血既人,佢會咁激動我唔出奇,咁我呢?唔知點解,我望住電視上既畫面,望住啲學生狗衝過去個廣場到,望住佢地唔怕胡椒噴霧,啲警察兜口兜面咁噴,但佢地一啲都無迴避,照樣係咁衝係咁衝,我內心竟然都激動起黎。
 
我知道發生緊乜事,因為小貞要揀小學,老母叫我睇多啲報紙,睇下有無選校攻略,所以我知道,佢地係為左爭取真普選而咁做。
 
如果係以前既我,麻甩佬、一支公,有無真普選都唔關我事,但呢一刻既我,望住電視到班細路,我就諗起小貞,諗起小貞大個左,諗起小貞既將來,假如呢一刻我唔去撐班學生、爭取唔到真普選,小貞將來會變成點?就算我幾撚有錢都好,就算我可以送小貞出國讀書都好,呢到始終都係小貞既家,如果我俾唔到一個自由既家俾小貞,我點做人地老豆?
 
我好想出去,好想守護住小貞長大後既家,但同時諗到,呢一刻我要照顧小貞,我內心就好矛盾。
 
「傑哥哥?」
 
可能電視聲浪太大,嘈醒左小貞,小貞搓搓隻眼仔望住我。
 
然後佢見到電視機到播緊啲警察用胡椒噴霧噴啲學生,令到啲學生嗌哂辛苦既畫面,佢攬實左我大脾,好驚咁話:「點解……警察哥哥會咁惡?佢地係咪打緊啲哥哥姐姐?點解啲哥哥姐姐好似好辛苦咁?」
 


我一時哽噎,唔知點答佢好。
 
我熄左部電視,唔想俾佢睇到呢啲畫面,然後踎低同佢解釋:「啲哥哥姐姐好努力咁守護緊小貞你既將來,啲警察哥哥唔明白,佢地誤會左大家,所以先至咁激動。」
 
我盡我能力咁去解釋,我唔希望小貞純真既心會俾班警察、會俾689染污。
 
然後小貞開始眼紅紅咁,「點解啲警察哥哥唔同啲哥哥姐姐傾下偈?以前小海都唔鐘意小貞,但係我地傾左偈之後,我地就做左好朋友。啲哥哥姐姐好辛苦……」
 
雖然兩件事唔比較,但係喺小貞純真既世界到,佢好希望啲警察唔好去傷害啲哥哥姐姐。
 
我摸摸小貞個頭仔講:「啲哥哥姐姐而家好努力咁守護住小貞既將來,而家小貞要做既就係,快啲去訓,唔好俾啲哥哥姐姐擔心你。」
 
小貞擦擦眼睛,然後好用力咁點點頭話:「多謝哥哥姐姐!」
 
其實小貞已經好眼訓,我氹左佢唔夠十秒,佢就又訓著左。


 
呢個時候,我部手機係咁震,一望,今次係家姐。
 
我怕嘈到小貞,所以走出廳聽電話。
 
「你知唔知阿南去左金鐘?」家姐語氣好激動。
 
「我知。」
 
「點算呀?佢會唔會有事架?」
 
係呢個時候,家姐竟然會關心阿南。
 
「我都唔知道……我都好想去,但係我要睇住小貞。」
 


「我都好想去,但係老母唔俾我去!我真係好擔心阿南呀……」講講下,家姐居然喊左出黎。
 
我唯有安慰家姐話:「佢咁大個人唔會有咩事既……」
 
「希望啦……我打俾佢問下佢點先,你記住睇住小貞,唔好出去呀。」
 
「知道啦。」
 
今次,家姐居然無主動cut我線。
 
但係而家既重點已經唔係呢到,我返上床到,望住小貞熟睡既樣,我就諗起嗰班為住小貞將來而奮鬥緊既細路,我就訓唔著,最後我都係起返身,成晚睇住個電視機,跟進最新既消息。
 
由佢地手撓住手圍住個廣場坐低左,到班警察開始包圍住佢地,戴哂防暴頭盔、拎哂啲長盾出黎,我都一一睇在眼內。我望住班學生,佢地眼神好堅定,好似一啲都唔驚咁,佢地或者只係大小貞十年甚至幾年,但係點解佢地可以有咁大勇氣?
 
到左朝頭早,小貞醒左,阿南亦打左俾我。
 
「喂你嗰邊點?」我問。
 
「而家啲警察圍住班學生,好似話會拉走佢地……」阿南未講完,背後就已經傳黎好嘈吵既聲音,「屌!唔講住啦!佢地又噴胡椒!」
 
「喂你小心啲……」我未講完,阿南已經收左線。
 
小貞擦擦眼睛問我:「啲哥哥姐姐而家點?佢地好返未呀?」
 
我擰擰頭,「似乎啲啲警察哥哥未係好了解啲哥哥姐姐既心意。」
 
小貞皺住眉,扁住嘴咁話:「哥哥姐姐要無事呀!」
 
我摸摸佢個頭仔,「嗯!有小貞打氣,啲哥哥姐姐一定會無事!」
 
然後我就同小貞梳洗。
 
刷完牙之後,小貞眼仔碌碌咁望住我話:「傑哥哥尋晚唔乖!」
 
「點解話我唔乖?」
 
「無訓教!」
 
「你點知我無訓教?」
 
然後佢揮一揮手要我踎低,再擢一擢我個黑眼圈。
 
原來小貞知道,小貞會細心留意人,我忽然覺得呢個舉動好窩心,我靜靜地攬實左小貞。
 
我簡單咁煮左啲飯餸,全日就同小貞留左係屋企,因為我擔心班學生、擔心阿南,所以我想留係屋企跟進消息,而小貞就全日陪住喵喵玩。
 
到左晏晝,啲警察開始清場,佢地幾個人一齊合力咁將坐係廣場到啲學生一個一個咁抬起,然後將佢地押上警車,直到第三個、第二個、最後一個,班學生既眼神都依然好堅定。
 
小貞又走左過黎,坐左係我身邊,我抱起佢,將佢放落我大脾到,攬住佢。
 
「啲警察哥哥做緊乜?」小貞用住天真既眼神問。
 
「佢地要拉走啲哥哥姐姐。」
 
「點解要拉走啲哥哥姐姐?」
 
不知不覺間,原來小貞已經到左「每事問」既年紀,但係佢問既問題,我真係已經唔識點答,唯有默默咁望住佢,尋求安慰。
 
可能小貞察覺到我既失落,佢就摸摸我個頭話:「傑哥哥唔洗擔心,啲哥哥姐姐係好人,一定會無事既!」
 
後來阿南再次打黎問平安,佢話佢而家係近住演藝學院到,而且愈黎愈多人,朝頭早嗰陣時佢中左少少胡椒,係好撚嗱,不過有人幫佢清洗左,而家已經無事,然後後面班人係咁遞啲遮俾佢地擋住啲胡椒,多到佢地都拎唔切,橋上啲人又打開把遮,啲遮一把一把慢慢咁飄到落黎佢地手上,成個場面好美麗、好感人,亦好振奮。
 
我同佢講,小貞話你地一定會無事。
 
然後阿南答:「係,我應承小貞,我一定會無事咁樣返黎!」
 
「另外家姐都好擔心你。」
 
「我知道,我已經同佢聯絡左,其實佢都好想黎,但係你老母唔俾佢出門口。」
 
「我明白既,總之你小心啲。」
 
「知道啦,再講啦,拜。」
 
到左第二日,九月二十八號晚,網上面開始流傳好多說話,話今晚會清場,話政府已經封鎖左金鐘既網絡,話今晚將會有好多人受傷,醫院已經留左好多床位等等……
 
我擔心阿南會有事,所以係咁打俾阿南,但可能實在係太多人塞住係金鐘用緊網絡,我完全打唔通佢電話,小貞見到我係咁搵阿南,就走過黎問我做乜。
 
我話:「南哥哥都去左支持啲哥哥姐姐。」
 
「南哥哥好叻叻!」小貞豎起手指公講。
 
後來,我聽到網上放左一段錄音,係一位女老師講既:「我而家係金鐘呢到好混亂呀,佢地開始放啲催淚彈,見人就放、見人就打,場面好混亂……」然後個老師亦開始哽咽:「我唔明白……唔明白點解佢地要咁對我地,我地手上咩都無,得把遮,啲催淚彈真係好勁,好辛苦……走呀,你地快啲走呀,唔好過黎,你地仲細,呢啲事應該由我地大人黎承擔,老師好擔心你地,你地唔好過黎呀,你地快啲走……」
 
段錄音大至上係咁,背景非常嘈吵。
 
我再次開著部電視機,原來第一枚既催淚彈已經發射左,成個金鐘都煙霧彌漫,啲人禁住個鼻係咁走,有好多人都流哂眼淚,好辛苦咁。電視字幕到話金鐘地鐵已經不停站,然後我見到,有個防暴警察用支AR-15自動步槍指住左個人。
 
「你老母打黎你老母打黎!」
 
「喂!阿仔!你係屋企嘛?」我都係第一次聽到老母咁激動既聲音。
 
「係呀……」
 
「你千其唔好過去呀!今晚分分鐘好似六四咁開槍呀!」
 
然後我聽到家姐係後面喊住咁嗌阿南,應該係因為聯絡唔到阿南而擔心佢。
 
「登登登」
 
我收左線之後,又收到Miss Cheung既whatsapp。
 
「你係邊?」佢問。
「係屋企」
「唔好過去金鐘呀, 好危險」
「我好想去, 但我要睇住小貞」
「去黎無用, 真係唔好去」
 
望到「去黎無用」呢四個字,唔知點解我變得好激動。
 
「點會係無用?」
「sor, 可能我比較負面, 我真係覺得無用」
 
然後,我放低左部手機,無再覆佢。
 
小貞走左過黎,見到電視到咁混亂既畫面,佢竟然流左眼淚。
 
我攬小貞問:「你做咩喊呀小貞?」
 
然後小貞指住部電視話:「啲哥哥姐姐喊……佢地係咪好辛苦?」
 
我咩都做唔到,唯有攬住小貞安慰佢:「無事既,一定無事既。」
 
 
後來阿南終於都打到俾我同家姐。
 
「我無事,係中左少少催淚彈,係咁標眼水。」阿南道。
 
「而家情況點?」我問。
 
「佢地淨係放催淚彈,我聽唔到有槍聲,但係都有好多人受左傷,我而家係急救站到幫緊手。」
 
小貞知道我同緊阿南講緊電話,於是走左過黎,我將部手機遞俾小貞,小貞小心翼翼咁接住然後放係耳邊。
 
「南哥哥……」小貞輕輕道:「南哥哥加油!小貞會陪住你!」
 
其後,中環、銅鑼灣同旺角都俾人佔領左,大家既情緒都好激動、好氣憤。
 
阿南後來就旺角同金鐘兩邊走,然後教育局就話,灣仔區同中西區既幼稚園停課,因為我地住既地區正正係呢到,所以呢一日,我唔洗帶小貞返學。
 
阿南whatsapp我,話佢而家係旺角,話呢到氣氛幾好、幾和平,有好多人係到,話如果我地過黎既話,就帶啲退熱貼過黎,因為好撚熱。
 
最後我約埋家姐,帶埋小貞三個人過去旺角。
 
黎到朗豪坊十字路口位,我地擺左啲毛巾同退熱貼俾物資站之後,就過去搵阿南。
 
阿南坐左係近住朗豪坊嗰邊街口位,有人係正中間搭左個帳篷,嗰到有咪、有水、有食物、有人係到講野,而物資站嗰邊都不停有人大嗌,話愈黎愈多人,希望大家可以褪過去太子嗰邊,但係好奇怪地,唔見有警察。
 
因為人多,所以我拖實左小貞,雖然已經九月尾、十月啦,但係天氣仲係好熱,我見係坐係十字路口既人都出哂汗,面紅耳熱咁,額頭都貼住塊退熱貼,而我亦不停咁幫小貞抹汗。
 
家姐見到阿南,佢即刻衝埋去攬住阿南,唔知係因為天氣熱定點,阿南塊面都好紅,佢甜甜咁笑同家姐講:「好多汗呀,好黐立立,唔好攬住我啦。」
 
家姐仲係唔肯放手,阿南再講:「你唔覺得臭咩?」
 
終於家姐都係放開手,打左阿南一下話:「好臭呀!」
 
小貞見到佢地咁,就笑到格格聲。
 
阿南走埋去小貞身邊,搓搓小貞塊面珠墩話:「小貞,南哥哥應承過你,而家無事返黎啦。」
 
小貞笑眯眯咁答:「嗯!南哥哥好叻叻!」
 
「呢到都幾多人。」我道。
 
「係呀,而且物資異常地咁多,我呢到有好多餅乾,你地要唔要食?」
 
家姐同我都擰擰頭,「留返俾你食啦,你係咪會留守?」
 
「係呀,等陣返屋企沖個涼就會再出返黎。」
 
係呢個時候,有個學生妹拎住一大袋M記既麵包走左過黎,然後係裡面摷左兩舊豬柳強俾家姐同阿南,之後佢見到小貞,即刻笑逐顏開。
 
「小妹妹,你黎支持我地?」佢踎低問小貞。
 
小貞雖然流住汗,但都好開心咁甜甜笑一笑,「姐姐你要加油呀!」
 
聽到小貞咁溫暖既鼓勵說話,個學生妹都即時好似充滿力量咁,舉高雙手話:「我地一定會成功架!」
 
然後,佢遞左塊豬柳強俾小貞,小貞將塊豬柳強俾返個學生妹,「小貞唔洗食,姐姐加油要食!唔好餓餓!」
 
之後佢笑笑口咁將塊豬柳強遞俾我,我都揮揮手咁話:「唔洗啦,細路仔唔留得耐,我地就走啦。」
 
「嗯,天氣好熱呀,唔好病親小朋友,呢到就交俾我地啦!」
 
「嗯,多謝你地為我既細路既將來咁努力!」我衷心咁講。
 
佢笑左笑,就繼續將塊包遞向坐係到既人。
 
家姐將塊包塞左俾阿南,話:「我都要走啦,老母唔俾我留得耐。」
 
「嗯,我轉頭都會返一返去。」阿南道。
 
家姐依依不捨咁望住阿南,「我真係好想留係到,同你地一齊作戰。」
 
「唔好啦,伯母會擔心。」
 
「我都咁大個人囉,仲有咩好擔心?」
 
阿南好似氹細路仔咁摸摸家姐個頭話:「乖啦,你要係後面支持我架嘛!如果你留係到熱到病左,咁到時邊個照顧我?」
 
然後家姐就好怕羞咁甜笑住。
 
哇屌……佢地之間發生乜撚野事?搞到我毛管都豎起哂。
 
見到暫時既環境咁安全,我同小貞都好安心咁返去啦。
 
 
第二日,阿南繼續留守旺角,家姐都時不時走去探佢,我見到facebook到話金鐘有集會,會有教授係到演說,同何韻詩會係到唱歌,我覺得安全,所以決定帶埋小貞過去。
 
小貞揹住個背囊仔一邊行一邊好興奮咁講:「我要去同哥哥姐姐打氣!」
 
我見小貞出哂汗,我又幫佢抹一抹汗,「小貞係咪好熱呀?洗唔洗返屋企休息下?」
 
小貞頭擰擰,「哥哥姐姐仲熱呀!小貞唔熱!」
 
「你老母打黎你老母打黎!」
 
「喂。」
 
「阿仔呀,我唔記得同你講,今日係小貞生日呀!」
 
「吓?」你唔好再遲啲先講?點解老母每一次都總係要俾啲驚喜我?
 
「你今晚帶小貞過黎食飯啦,我地一齊慶祝生日!」
 
「哦,咁好啦。」
 
「你係街呀?去邊呀?」
 
我知道如果我話去金鐘,仲要帶埋小貞,老母一定會反對,但我又唔想呃我老母,我唯有唔出聲。
 
「係咪去金鐘呀衰仔?」可惜聰明既老母已經洞悉一切。
 
「唉,唔好去啦,你同你家姐都係咁,講極都唔聽,成日都要人擔心……」
 
面對老母既嘮嘮叨叨,我忍唔住爆發左。
 
「我就話中左六合彩唔憂做啫,但係我真係唔想小貞將來生活係一個無自由既地方呀!連一個自己揀特首既權利都無,如果我唔去支持下、爭取下,我覺得我無資格做小貞老豆!如果小貞將來大個問起我,點解無真普選既時候,我要答佢,無呀,老豆當年無為你爭取過,我會覺得好對唔住小貞!你叫我點面對小貞?如果我唔係中左六合彩,我會同班後生仔一樣,打成世工都買唔起層樓既一塊磚頭呀!莫講話買樓收租?老母你諗下啦,而家啲大學生,出到黎搵到幾多錢人工?得嗰萬幾蚊,仲要還錢俾政府,人地都要食飯架,啲飯又愈黎愈貴,而家出街食飯,你問下啲靚仔有幾多個係有錢淨?唔通真係餐餐食麵包?到時有樓都無命住啦!仲有呀,我好日都唔去一次旺角,尋日一去,都唔洗隔條街口位啦,隔離就已經連住十幾廿間藥房同周乜乜,乜香港人唔係有病就係有錢架啦?要成日買藥買金架咩?我唔覺囉,四周圍都係大陸人,唔講唔知以為自己返左大陸,呢到係香港黎架咩?我細個嗰陣時既香港唔係咁架!老母你到底明唔明呀?」
 
我一口氣講左多說話,老母都好無奈,「阿仔我唔係咁既意思……我係支持你地既,不過擔心你地啫……」
 
「唉,如果香港真係咁國泰民安,大家都睇到有將來、有前途、有飯開,班細路就唔洗走出黎啦……」
 
「知啦仔……總之你小心啲啦,記得同小貞今晚返黎食飯……」
已有 0 人追稿