面對一啲猶豫不決既事既時候,最好既解決方法,就係逃避現實。
 
今日係第四日既農曆新年假,尋晚小貞睇電視既時候,見到啲人行山令佢覺得好有趣,啲山景好靚,所以今日計劃左既行程就係同阿南、小貞、小海同瑜仔去行山,因為家姐同Yan都要返工,所以今次就由阿南同我兩條麻甩佬去湊細路啦。
 
我地行山既地點係大埔滘自然護理區,因為上網查過,嗰到既山路比較易行,而且有條自然教育徑,小貞佢地接觸大自然之餘又可以學到野。
 
今朝一早,同小貞一齊執好啲水呀、麵包呀、毛巾等等就準備出發啦,但唔知點解,今日既喵喵好似特別嗲咁,佢圍住小貞氹氹轉,好似好唔想小貞走咁,可能係呢幾日我地出得太多街啦,搞到喵喵一隻貓係屋企好悶。
 
小貞抱起左喵喵,可憐兮兮咁望住我講:「傑哥哥,可唔可以帶埋喵喵呀?」
 


我摸摸小貞個頭仔話:「唔得架,喵喵唔識路,佢會走失,到時喵喵就返唔到屋企架啦。」
 
小貞唯有放返低喵喵,依依不捨咁講:「喵喵唔可以無屋企架。」
 
我再安慰佢道:「喵喵其實有個責任架,就係要留係屋企看門口。」
 
喵喵聽完我鳩up之後,就fing一fing條尾好酷咁走開左啦。
 
因為阿南架車拎左去整,所以今日我地首先搭地鐵去大埔,然後坐紅van去松仔園,我地一行人已經到左大埔等緊紅van,Julia同yan送左小海同瑜仔過黎之後就走左啦。
 


「大家有無帶齊野呀?」我問。
「水帶左!」小海舉手道。
「麵包帶左!」小貞舉手道。
「毛巾帶左!」瑜仔緩緩地舉手道。
「阿南帶左!」阿南低b地舉手道。
 
聽到阿南咁講,成班細路又格格聲咁笑。
 
話咁快,架紅van到左啦,我地就豪豪蕩蕩咁上左車。我地五個人啱啱好坐左係最後嗰排既坐位到,小貞坐係中間,隔離左右係小海同瑜仔,阿南同我就夾住佢地。
 


「哇!小朋友!咁開心去行山呀?」有對公公婆婆都上左車,一見到成班細路係到,佢地就展開笑顏咁問。
 
小貞點點頭回應,而小海就搶住答:「係呀!去行大嶼山!」
 
小貞聽到之後即刻輕輕咁拍一拍小海隻手仔話:「係大埔滘先啱呀!」
 
小海紅都面哂咁係到傻笑,想掩飾自己柒左。
 
「哈哈,我地都係去大埔滘!」公公婆婆笑住回應,然後坐係佢地前面既一大堆阿叔阿嬸都點點頭,似乎係同一隊人黎既。
 
最後小貞同小海同佢地有講有笑,而瑜仔就挨住我訓到成隻豬咁。
 
好快地,終於到左落車既地方啦,佢地成隊人係到影團體相,我幫佢地影左一張之後,就同小貞佢地出發啦。
 
「嗱,大家都食左早餐先過黎既,如果我地一陣行行下覺得肚餓,我地再停低食野啦。」阿南道。


 
「知道!」三個細路齊聲道。
 
「如果覺得攰記得要出聲,同埋要飲多啲水呀。」我道。
 
「知道!」三個細路再次齊聲道。
 
「哇!蝴蝶呀!」小海見到有隻細小既蝴蝶飛過,又好興奮咁大嗌。
 
「傑哥哥!啲花花好靚呀!」小貞笑眯眯咁講。
 
「舊石好大……」瑜仔既興趣竟然係啲山石。
 
行都咁上下,阿南同我都有啲攰啦,可能真係太耐無行咁遠路啦,但係班細路仲係好精力旺盛咁,真係唔認老都唔得啦。
 


「點解蝴蝶識飛既?」小海問。
「因為佢地有翼囉!」小貞答。
「點解佢地有翼既?」小海又問。
「因為我地無翼囉!」瑜仔無厘頭咁答。
「其實南哥哥都有翼,識得飛架!」阿南又加入埋一份。
「南哥哥呃人!」小貞指住阿南話。
 
「我真係識飛架,唔信你睇下!」然後阿南好戇鳩咁兩隻手fing下fing下咁係到扮飛,仲哄埋去啲細路到,好似玩緊麻鷹捉雞仔咁,啲細路嘻嘻哈哈咁樣周圍跑。
 
「危險呀!唔好跑咁快!」我叫住佢地道。
 
行到一半,我見大家都開始喘氣啦,我就話:「我地休息下,食啲野啦!」
 
「好呀!」大伙兒異口同聲說。
 


係我地一邊食麵包,一邊飲水既時候,小貞見到隔離長枱有個阿叔餵緊佢地隻狗飲水,嗰隻係隻深啡色既唐狗黎,不過體型唔大,可能係得一歲大啫。
 
小貞走左過去,好好奇咁眼甘甘望住佢地,最後小海同瑜仔都走埋過去。
 
個阿叔見到突然有三個細路眼甘甘咁望住佢,搞到佢好尷尬咁。
 
「狗狗都行山!」小海道。
 
「係呀!小朋友你地都行山啦!」阿叔笑笑回應。
 
「我叫小貞!」
「我叫小海!」
「我叫瑜仔!」
 
然後佢地又無啦啦自我介紹。


 
「咁狗狗叫咩名呀?」小貞問。
 
「哈哈,我叫coffee呀!各位哥哥、姐姐你地好呀!」阿叔用住把低能聲線扮隻狗講。
 
「拖飛?」小海道。
「唔係拖飛,係call飛!」瑜仔道。
「乜唔係拖肥咩?」小貞道。
「係coffee呀。」我都走埋去道。
「Coffee。」然後佢地三個又慢慢咁跟我讀。
 
大家都食飽去埋廁所之後,因為Coffee同佢主人都係行呢條山路,所以我地就一齊起行啦。
 
「呀!Coffee痾『嗯嗯』!」小海指住coffee道。
 
然後阿叔就好熟手咁用報紙處理左。
 
「好似喵喵咁痾『嗯嗯』!」小貞笑笑道。
 
Coffee比較肥,所以佢每行一步個屎忽都會彈下彈下咁,好鬼得意,班細路又會追住coffee個屎忽黎行,雖然好變態但都好趣緻。
 
「Coffee伸哂脷咁,係咪好口渴呀?」小貞又問。
 
「好啦,咁餵coffee飲下水啦,小貞想唔想試下餵呀?」Coffee主人問。
 
小貞用力咁點點頭。
 
然後小貞小心翼翼咁接過個水樽,倒左啲水落個蓋到,coffee未等小貞倒完就已經狗衝過去飲,睇黎真係好口渴。
 
三個細路圍住coffee飲水,個情景真係幾搞笑。
 
「Coffee唔好急,慢慢飲。」小貞道。
 
飲完之後,Coffe好滿足咁fing下條尾,然後我地又繼續行啦。
 
小貞見到沿路都有一、兩隻狗仔行過,但係佢地主人無拖住狗帶,而coffee主人就有拖住狗帶黎帶coffee行,所以又好好奇地問:「點解佢地無帶,coffee又有既?」
 
「你係指狗帶?」coffee主人問。
 
小貞點點頭。
 
「因為coffee仲細,唔拖狗帶佢會走失。」coffee主人答。
 
小貞眼仔碌碌咁,好似唔係好明。
 
阿南再解釋道:「因為coffee好似你地咁細個,佢精心充沛,一個唔小心就會走左去,所以要條狗帶黎保護佢。」
 
三個細路都恍然大悟咁點點頭。
 
「小貞好乖,唔洗狗帶都唔會走開!」小貞道。
 
「小海都好乖!」、「瑜仔都好乖!」小海同瑜仔又搶住講。
 
「小貞想唔想試下帶coffee?」coffee主人問。
 
小貞用力咁點點頭,coffee又fing下條尾咁等待小貞。
 
小貞一拎起條狗帶,coffee就充滿活力咁跑,小貞好吃力咁捉住條狗帶,連小海同瑜仔都幫手一齊捉住,最後要三個細路合力先捉得住coffee,佢地三個都喘哂氣、紅都面哂咁係到傻笑。
 
行多一陣,大家都覺得好攰啦,所以我地決定同埋coffee一齊落返山去食晏。最後我地一行人又多左個阿叔同一隻狗。
 
我地搭紅van出返去大埔市中心,coffee全程好乖咁喱係個狗袋到,係間唔中伸個頭出黎望下,小海同小貞見到,又會伸手幫coffee塞返個頭仔入去。
 
因為有coffee係到,所以我地揀左間可以係出面食既日式拉麵店,coffee主人將條狗帶綁住係張枱既枱腳到,coffee好乖咁攤左係地下。
 
熱騰騰既拉麵送到,霧氣係空氣中揮發,為呢個冬天帶黎溫暖,我都係第一次係冬天既戶外食拉麵,感覺有另一番風味。
 
我幫小貞吹一吹涼左啲拉麵,餵左佢食幾啖,然後再自己食,我學日本人咁,大啖大啖咁食啲拉麵,食到「雪雪」聲,然後又擢一擢塊半熟既溫泉蛋,蛋香味濃郁地包圍住口腔,嗰種溫暖既感覺真係一大享受。
 
「汪汪!」coffee可能碗拉麵實在太香啦,佢好想撲過去小貞到食左小貞碗拉麵。
 
「Coffee!我等陣再餵你食野,唔准咁無禮貌架!」Coffee主人道。
 
「隻狗肥嘟嘟咁好得意喎!」有個拖住隻黑色唐狗既女人行過,見到Coffee之後停低左道。
 
「係呀,佢叫Coffee。」Coffee主人道。
 
「你地係一家人?」個女人望住我地三個麻甩佬帶住三個細路,佢皺哂眉,充滿疑惑咁問。
 
「哦,唔係,我地係行山時識到Coffee,然後先一齊黎食晏,呢位先係Coffee既主人。」我指住Coffee主人道。
 
「你地好呀,我隻狗叫細蚊呀。」個女人介紹道。
 
「我叫小貞!」
「我叫小海!」
「我叫瑜仔!」
 
佢地三個又一站式咁介紹自己。
 
三個細路見到細蚊好興奮咁fing下條尾,又同Coffee互相碰鼻,佢地覺得好得意,然後就走左過去輪住摸細蚊。
 
細蚊好乖咁攤係地下任佢地摸。
 
「真係難得呀,細蚊平時好怕人架,但竟然唔怕你地。」細蚊主人道。
 
「點解佢怕人既?」小貞問。
 
「因為細蚊係我領養返黎架。」細蚊主人答。
 
「你係邊到領養架?Coffee都係喺網上領養返黎架。」Coffee主人道。
 
「我同我老公係狗場到做義工,有一日細蚊黎到狗場,佢成身都傷哂咁,而且好怕人,縮埋一舊,所以我地叫佢做細蚊,啲義工朋友話細蚊係係街邊執到既,遇見佢既時候俾其他流浪狗蝦緊,見佢成身傷哂又好生面口咁,就帶左佢過黎啦,後來我地查到,原來細蚊係有晶片既,即係可能佢俾主人虐待,然後佢主人又唔要佢,將佢扔左落街。」
 
佢地三個聽到細蚊既身世之後,就更加俾心機咁撫摸細蚊,細蚊條尾fing下fing下咁,好似好享受咁。
 
細蚊主人續道:「我地照顧好細蚊,醫好佢身上啲傷之後,再等人黎領養,後來有個鬼妹黎左領養佢,但無幾耐之後,我地又見到細蚊係街到流浪。」
 
三個細路都好愕然咁望住細蚊同細蚊主人。
 
「我地帶返細蚊去狗場,然後聯絡個鬼妹,個鬼妹話係帶細蚊去散步時同佢走跌左,我地叫佢接返細蚊走,點知佢又唔肯,最後我同我老公就決定收養細蚊啦。」
 
小貞摸摸細蚊既頭仔,溫柔地道:「細蚊唔洗驚,細蚊而家有屋企人啦,會好似小貞咁好開心咁成長!」
 
忽然間,細蚊好似聽得明小貞講乜咁,佢好開心咁舐一舐小貞隻手仔,搞到小貞格格聲咁笑。
 
「咁Coffee呢?你係點樣係網上領養架?」細蚊主人問。
 
「我係喺啲討論區到領養Coffee既,Coffee生左幾隻,我就收養左一隻。」Coffee主人道。
 
「嗯,領養點都好過買,唔好益啲無良商人。」細蚊主人道。
 
諗唔到,一個行山之旅都會遇到咁多事,或者係因為有細路仔係身邊,用佢地既小眼睛去睇呢個大世界,先發掘到我地平時唔會發現既野。
 
辛苦左成日,送走左小海佢地之後,小貞同我都終於都返到屋企,小貞即刻涼都唔沖就走左去攬實喵喵,喵喵俾小貞突如其來既熱情嚇親,佢通屋逃跑,小貞又跟住佢跑,搞到喘哂氣、紅都面哂咁。
 
我攬住左小貞,希望佢唔好再跑,然後佢就眼紅紅咁話:「點解呢個世界有咁多小貞、喵喵同細蚊……?」
 
我緊抱住小貞,錫左佢額頭仔一啖再講:「但係呢個世界仲有好多傑哥哥、細蚊既爸爸媽媽……」
 
小貞聽到之後,佢就甜甜咁笑一笑,再輕輕咁係我塊臉到錫左一啖當係回應左我。
 
小貞今日好攰啦,所以好快就訓著左,因為天氣凍,喵喵都痴埋我地一齊訓,佢捐係被到,我就輕輕咁掃下佢啲毛,可能佢覺得舒服啦,佢擰轉身露左成個肚臍仔出黎,我再禁下佢兩球肉枕,軟淋淋咁好鬼得意。
 
曾經只係一個人訓,或者係同個無感情既女人訓既我,不知不覺間,呢兩位小可愛慢慢咁溶入我既生活當中,令我唔再覺得孤單同寂寞,其實並唔係我收養左佢地,而係佢地拯救左我。
已有 0 人追稿