「咳咳……」
 
今朝一起身,我就覺得喉嚨嗱住嗱住咁好撚痛,而且兩行鼻水又不受控咁係咁流,我諗我可能係尋日去旅行時冷親啦,好就好在今日係週末,唔洗帶小貞返幼稚園。
 
「咳咳……」
 
「傑哥哥你無事呀嘛?」小貞哄埋黎問。
 
我怕會傳染到俾小貞,所以即刻拎返個口罩黎戴。
 


「呀!傑哥哥病左!老師話,如果有病就要戴口罩!」小貞眼仔碌碌咁指住我道。
 
我點點頭話:「係呀小貞,傑哥哥病左,你唔好哄埋傑哥哥到,我怕會傳染你。」
 
「咁點算呀?傑哥哥係咪好辛苦?老師話如果病左,就要去睇醫生架!」小貞憂心忡忡咁講。
 
「傑哥哥無事呀,我食粒感冒藥,訓陣就會好返。」
 
「咁唔得架!傑哥哥要去睇醫生!我要好似傑哥哥咁,揹住你去睇醫生!」
 


諗唔到小貞竟然仲記得我揹住佢去醫院件事,真係好撚滾動!
 
「咳咳……」
 
唔得啦,我喉嚨愈黎愈痛。
 
「小貞呀,傑哥哥好攰,又怕會傳染俾小貞,不如今日等我老母黎接你好無?」我問。
 
小貞用力咁擰擰頭,「唔制呀!等小貞照顧病左既傑哥哥啦!」
 


聽到小貞咁講,我真係覺得好安慰,但我唔可以咁自私,唔顧小貞既健康架!
 
「小貞乖,聽話啦,我真係唔想傳染俾你。」
 
只見小貞繼續擰頭道:「小貞要照顧傑哥哥!」
 
我都係第一次見小貞咁頑固咁係到扭計。
 
「好啦,傑哥哥都想俾小貞照顧,但萬一連小貞都病左,咁邊個照顧傑哥哥?」
 
小貞靜靜咁垂低頭,似乎終於明白我想講咩啦。
 
「咁傑哥哥點算呀……?」小貞皺哂眉咁講。
 
「傑哥哥訓下就會好,咁傑哥哥而家打俾我老母,等佢黎接小貞好無?」


 
小貞終於都肯點點頭回應啦。
 
「你現在所打既電話暫時未能接通……」
 
屌!唔撚記得老母返左鄉下!次次有事都叫老母,今次真係無老母唔掂啦!
 
「屌!咩事呀?」
 
我唯有死死地氣咁打俾家姐。
 
「我病左呀,你可唔可以幫我睇住小貞?咳咳……」我死氣沈沈咁講。
 
「你有無搞錯呀?你點做人老豆架?咁都可以病倒既?成日都要我湊住小貞,你係咪人地老豆黎架?」
 


「家姐呀……咪鬧住先啦……我真係好辛苦呀……」
 
「唉,咁好啦,我而家過黎!你飲多啲水呀!」
 
家姐收左線之後,無幾耐就過左黎。
 
「搞到我又無得開舖,好心你咁大個人就照顧好自己啦!你仲有個女要養架!」家姐一黎到又係咁話我,媽呀,佢真係好撚煩呀!
 
「咳咳……對唔住呀……」我道。
 
「姐姐,你唔好鬧傑哥哥啦……佢都唔想架……」小貞眼紅紅咁講。
 
嗚哇!都係小貞你最好!
 
「好啦,係我唔啱,我唔應該咁話你,但講明呀,我淨係接走小貞架咋,我唔會買粥俾你,亦唔會買藥俾你,更加唔會照顧你,我唔係老母呀!」


 
唉,老母呀老母,你究竟幾時先返黎呀?有事既時候我就特別掛住你!你個仔我得此家姐,真係人生無憾呀,我諗真係要阿南先治得到佢。
 
「得啦,我都無指意過你會照顧我,我會睇住自己架啦,你幫我睇好小貞就得。」我筋疲力盡咁講。
 
「咁好啦,小貞,同傑哥哥講拜拜啦。」家姐拖住小貞道。
 
小貞依依不捨咁揮揮手,「拜拜傑哥哥……」
 
「傑哥哥要快啲好返!接返小貞返屋企!」臨走前,小貞大嗌道。
 
我點點頭回應,人生得此一女,真係死而無憾!
 
待小貞走左之後,我簡單咁餵過喵喵,就直接攤左係床到訓。
 


我一直訓一直訓,覺得自己愈黎愈熱、愈黎愈慶咁。
 
我半睡半醒咁拎起部手機,想打俾阿南,叫佢幫我買啲藥同粥上黎。
 
「嘟嘟嘟……
 
「喂?」
 
點知電話到轉黎另一把女人聲,更加唔係家姐把聲!
 
死啦!阿南條仆街仔又黎花心啦!
 
「喂?傑哥哥?」
 
咦?叫我傑哥哥?佢識得我既?
 
我拎開部手機一睇,屌!原來我打左俾Yan!
 
「呀……Yan,唔好意思,我打錯電話俾你……」我尷尬地道。
 
「你把聲咁沙既?你係咪病左呀?」Yan溫柔地問。
 
「係呀……」我有氣無力咁答。
 
「咁小貞呢?有無人照顧佢?」
「我交左俾家姐……」
「咁你而家自己一個人係屋企?」
「係呀……」
「咁啦,你講個地址俾我知,我上黎睇下你點啦。」
 
聽到Yan咁講,我有少少受寵若驚。
 
「咁瑜仔呢?咳咳……」
「瑜仔既姨姨黎左,我可以叫佢幫我睇住瑜仔。」
「但係你唔洗返工咩?」
「哈哈,因為尋日去旅行玩到好攰呀,我今日call左Sick Leave。」
 
諗唔到Yan都有咁鬼馬既一臉。
 
「就等我呢個冒牌病人黎照顧你呢個真病人啦!」Yan淘氣地道。
 
「咁好啦,多謝你。」
 
講左個地址俾Yan知道之後,我又係張床到訓死左。
 
「叮噹!」無幾耐,門鐘就響起。
 
我笨笨拙拙咁起身,又笨笨拙拙咁走到門前,點知一個唔小心,隻腳指公撞到落張枱腳到。
 
「呀!!!!!!!!!!!」,屌你老母真係痛撚到仆街!我即刻醒撚哂!
 
我忍住痛、含住淚咁去開門。
 
「你頭先做乜嗌到咁大聲?」一打開門,Yan就皺住眉咁問。
 
「我唔小心撞到枱腳……咳咳……」我含住泡淚水講。
 
Yan笑笑,「陰公豬,我買左啲瘦肉,等陣煲粥俾你,你食完再食啲藥,咁樣應該好快好返。」
 
嗚哇!居然有北川景子煲既愛心粥食!今次病都病得抵呀!
 
「嗚……Yan,點解你對我咁好,連我家姐都唔理我……」我可憐兮兮咁講。
 
Yan又笑笑,「咁係我失戀既時候你陪住我,今次應該輪到我照顧你啦!」
 
嗚哇!我真係好撚滾動!啱先腳指公既痛楚好似全部都消失哂咁!
 
「而家你快啲乖乖地返上床訓教,等我煲既愛心粥啦!」Yan溫柔地道。
 
然後我好乖咁返上床訓教,無幾耐,我就連係睡夢中都聞到陣陣瘦肉粥既香味。
 
「傑哥哥……傑哥哥……」Yan溫柔地叫醒我。
 
我一張開眼,就見到北川景子嗰張嘟下嘟下既小嘴巴,真係病都好返左一半。
 
「Yan……」
 
「啲粥煲好啦,你可以起身食啦。」
 
我點點頭,然後緩緩咁起身。
 
Yan見我有啲吃力,就扶住我話:「不如你訓係床到等我餵你啦,你好似好辛苦咁。」
 
嗚……媽呀,我真係滾動到好撚想喊!
 
然後Yan畢起左一羹粥,用佢既小嘴巴輕輕咁吹下,再遞去我嘴邊,我就好似個細路仔咁張開把口,等佢餵落口。
 
啲粥入口即溶,就算喉嚨痛都唔覺得痛,而且咸度適中,對一個病人黎講真係世間良藥黎。
 
我望住Yan慢慢慢慢咁餵我,我就係個腦到ff,如果佢係我女朋友,佢以後都可以咁樣照顧我,咁你話幾咁好呢。
 
人生得一識煲愛心粥既妻子,夫復何求?
 
我掛住ff,唔小心咁漏左兩、三滴粥係嘴角,然後Yan又好溫柔咁用紙巾幫我抹走佢。
 
從來只有我幫小貞擦嘴巴,諗唔到有人幫你抹嘴真係好撚爽。
 
食都咁上下,我都覺得飽啦,Yan餵埋我食藥同飲水,然後就輕輕咁拍下我膊頭,好似氹細路咁氹我訓教,我諗每一晚瑜仔都係咁樣俾Yan氹到訓教,我忽然真係好撚葡萄瑜仔。
 
食完愛心粥,又有北川景子氹我訓教,我好快又去左搵周公啦。
 
到我醒返既時候,發現天色已經變暗,我走出房間,見到Yan拎住本書係梳化到恰著左。
 
我靜靜咁走去梳化到,又靜靜咁凝視住佢,只見佢訓到個嘴巴嘟下嘟下咁,十足個大細路咁,好鬼得意。
 
諗起之前佢仲因為分手而喊哂口咁,我真係好心痛,而家見到佢訓得咁舒服、訓得咁安祥,我就覺得好欣慰。
 
不過唔知佢到底放低左Alexis未,畢竟佢地由中學開始拍拖,有成幾年感情,真係唔能夠話放低就放低。
 
我凝視住Yan,佢緩緩地張開眼,一見到我望住佢,佢就嚇一嚇,紅都面哂咁講:「傑哥哥!」
 
「我無事啦,多謝你。」我道。
 
然後佢用白皙既手輕輕咁摸一摸我額頭,話:「嗯,真係好左好多,已經唔熱啦。」
 
「係呀,全靠你啲愛心粥!」我笑笑道。
 
「唔洗客氣!最緊要你好返好多!」Yan又笑笑回應我。
 
「係啦,Yan!」我忍唔住要問啦,「其實,你放低左Alexis未?」
 
Yan笑笑答:「話放低左就呃你既,畢竟咁多年感情,不過有你、有瑜仔同小貞陪住我,我真係好左好多啦。」
 
你那麼長情,叫我如何能夠取代他?我內心痛住咁諗。
 
「咁今次我病左,你又咁照顧我,又當打和啦!」我勉強笑笑道。
 
「嗯!」Yan甜甜咁笑一笑,然後用力咁點點頭回應。
 
送走左Yan之後,我見自己真係好返好多啦,於是就叫家姐帶返小貞過黎。
 
「傑哥哥!!!!!!!」一開門,小貞一見到我就即刻衝過黎攬住我。
 
我摸摸小貞個頭仔問:「小貞有無掛住傑哥哥呀?」
 
小貞又用力咁點點頭,面珠墩紅噹噹咁答我:「梗係有啦!小貞超超超超超超超超超超超超超超級掛住傑哥哥!」
 
我都已經數唔到小貞到底講左幾多個超字啦。
 
我甜甜咁笑住話:「我都好掛住小貞呀!」
 
小貞又將個頭哄埋我個胸膛到,然後又突然抬起頭,眼甘甘咁望住我問:「點解傑哥哥好得咁快既?」
 
「因為我知道小貞好擔心傑哥哥,所以想快啲好返,咁就可以快啲見返小貞啦!」
 
小貞點點頭,「一定係小貞既愛心,傳到俾傑哥哥到,所以傑哥哥先咁快好返!」
 
我又學小貞咁用力點點頭回應:「一定係啦!」
 
「登登登」
 
臨訓之前,Yan又whatsapp俾我。
 
「仲有無唔舒服呀??」
「無事啦, 已經好左好多☺」
「咁接返小貞未??」
「接返啦, 佢話好掛住我??」
「哈哈, 我返到去, 瑜仔都話好掛住我呀??」
「係呀, 啲細路仔真係令人覺得好冧☺」
「無錯呀, 病都快d好?」
「btw今日真係好多謝你??」
「傻瓜, 你唔快d好返, 點樣照顧小貞, 瑜仔仲要靠小貞去睇住架?」
「你又啱喎」
「好啦, 你好快d訓啦, 休息多d先會快d好返?」
「咁你都要早d訓啦」
「知道啦, 仲有記得要飲多d水, 著多件衫?」
「多謝你, 你真係好溫柔?」
「傻瓜! 早抖啦!」
「早抖?」
 
然後我放低左部手機,攬住小貞好舒服咁進入夢鄉啦。
已有 0 人追稿