「姐姐……」
 
當Yan講完嗰句男朋友仔之後,我地就隱約聽到瑜仔把聲,我地即刻好緊張咁望過去瑜仔嗰邊。
 
「我想去wee wee……」只見瑜仔睡眼惺忪咁講。
 
「我帶你去啦瑜仔!」我自告奮勇道。
 
我一邊拖住瑜仔,一邊手心都出哂汗,明明我同Yan就光明正大既,但真係好擔心,唔知瑜仔頭先見唔見到我地錫錫……
 


去到廁所,我地一大一細一齊wee wee。
 
「瑜仔,你啱啱……嗯……有無……」我難以啟齒道。
 
瑜仔對眼依然半開合咁,「有無乜野?」
 
「有無……嗯……有無睇到啲乜野?」
 
「有呀!」
 


有!!!!!!???
 
「我睇到好多好多舊石頭紮住左我……」瑜仔一臉無奈咁講。
 
屌!嚇撚死我!瑜仔你嗰啲係發夢呀!咪撚拎出黎講俾人知啦!會嚇撚死人架!
 
「哦……瑜仔你係發夢啫……」我鬆左一口氣。
 
帶完瑜仔去wee wee之後,我地再次返去間房到,Yan就眼仔碌碌咁望住我,我擰一擰頭,代表瑜仔咩都見唔到,然後我地又繼續好安心咁訓教啦。
 


係日本既第三日,亦係我地留係日本既最後一日,今晚我地就會坐夜機返去香港啦,所以時間都有啲緊迫,而我地最後一日既行程就梗係去做寵物小精靈既訓練員──Pokemon Center啦!
 
一入到去,大大個比卡超模型就呈現眼前,小貞即刻走埋去笑眯眯咁講左句:「比卡超!」
 
然後小貞一擰轉身,又見到大大個喵喵怪既模型,然後小貞又好興奮咁嗌:「喵喵呀!」
 
我忍唔住走上前抱起小貞,Yan就幫我地係比卡超模型前面影相。
 
我地再行入去,只見有好多精靈球同玩具,小貞完全係樂在其中,間中同瑜仔攬下車厘龜,間中又衝過去抱下小火龍,最後我地就幫小貞係成堆比卡超公仔面前影相,小貞笑到見牙唔見眼咁,塊臉又紅卜卜咁,真係好鬼可愛。
 
玩完啦,我地再行埋個商場,又買左啲手信,之後就要返民宿拎行李,準備返香港啦。
 
「在日本玩得開心嗎?」老闆娘臨別依依咁問。
 
我同Yan相視而笑,Yan就回答:「很開心!謝謝你喔老闆娘!」


 
後來我地好順利咁返到香港啦。
 
今日依然係幼稚園假期,小貞唔洗返學,但Yan就已經要返工啦,瑜仔就交左由佢姨姨照顧。
 
之前係日本日日都見到Yan,今日係我地拍拖第一次咁耐無見對方,真係好掛住好掛住佢,結果我都係忍唔住whatsapp佢。
 
「miss u…」
 
「miss u too?」諗唔到今次佢秒回。
 
為左望梅止渴,我一直望住佢個頭像,佢由原本用瑜仔做頭像,而家轉左佢著住件和服做頭像。
 
「係日本日日見你, 今日無得見, 真係有d唔習慣?」Yan續道。
 


諗唔到,佢同我所諗既係一樣,大家都唔習慣見唔到大家,雖然身在唔同既地方,但大家諗既野係一樣,呢種感覺真係好甜。
 
「我都係!?」我覆。
「我要做野先啦! I love u!男朋友仔!?」
 
我見到小貞同緊喵喵玩,我又百無聊賴咁,所以決定將去日本啲相放上fb。
 
幾日無開fb啦,一開就見到Miss Cheung post相,佢係個青青草原到餵緊草泥馬,係相到,每一張佢都笑得同陽光一樣燦爛,露出兩顆虎牙,睇黎佢係嗰邊真係過得好開心,証明佢呢個決定係無錯既,當我loop到最後,發現佢有張相係喺酒吧到影既,有個鬼佬有親暱咁搭住佢個膊頭,我就忍唔住pm佢。
 
「你嗰邊應該係夜晚喎, 做咩仲唔訓係到up相??」
「hi, 好耐無見啦! 我未訓得著, 所以post下相先?」
「最近點嘛? 係咪同左個鬼佬拍拖??」
「haha,係呀 佢好鐘意我, 一黎就追我,, 佢真係好得意架?」
「見到你咁開心, 我就放心啦☺」
「咁你呢? 我見到你都放左d去日本既相喎?」


「係呀, 啱啱個復活節去完黎?」
「我仲見到有yan, haha?」
「係呀…我地拍拖la…?」
 
我都唔知點解自己會講俾佢知,只係好自然咁好想將呢個消息話俾佢知。
 
「haha, 我都估到la, 恭喜你地ar☺」
「你又估到??」
「其實嗰陣時見到你望yan既眼神就知道, 好溫柔, 但又有一種好欣賞佢既感覺?」
「sor…」
「做咩講sor, 我放低左你架la, 我好愛我男朋友??」
「咁…祝我地都幸福啦☺」
 
呢一種咁安定、咁平穩既感覺真係好好,希望大家都搵到自己所愛既人,然後幸運地相愛,彼此好好珍惜大家,一路幸福落去。
 


我繼續睇fb,只見有篇報導大大隻字寫住「『打野戰』理大女生北京返港自首」,下面仲有副圖係有一男一女係街邊扑緊野。
 
哇Hi!乜而家啲大學生咁向左走向右走開放既,無係香港幾日啫,就有單咁爆既新聞,我同Yan同床共枕都只係輕輕咁錫下個嘴仔咋,真係這些機會……
 
「傑哥哥,乜野黎架?」
 
我一個唔為意,原來小貞企左係我身後望住,佢見到……佢見到副圖呀!
 
係啦無錯啦,而家呢個世界有咁向左走向右走多變態佬同戀童癖,係時候要同小貞上一堂性教育課,等小貞學識保護自己先得。
 
但係一時之間應該要點教小貞好呢?我腦海到浮現左「要大聲嗌唔好」嗰個廣告。
 
「嗱,小貞,我而家教你一件好重要既事,你要留心聽住。」我好認真咁講。
 
小貞又好認真咁,眼仔碌碌咁點點頭。
 
「如果有個陌生人走埋你身邊,然後……然後……」
 
「然後點樣?」小貞眼仔碌碌咁問。
 
Hi!死啦!我無理由真係走去摸小貞,做親身示範架嘛!我都話左我唔係鬼父囉!
 
咁點算好呢?
 
最後我靈機一觸,我決定,摸自己!
 
「然後如果佢伸手想咁樣摸你……」我掂一掂自己既胸膛,「你即刻要大聲嗌唔好同埋救命呀!」
 
「點解既?」小貞頭側側咁問。
 
點解!!!!!???竟然問我點解!!!???
 
「因為個身體係小貞你自己既,唔可以俾其他人摸架。」我吃力地解釋。
 
小貞好似明啲唔明啲咁,佢輕輕咁點點頭,但又一臉迷惘咁。
 
「又或者佢想摸你呢到、呢到、或者係呢到。」我又摸下自己隻手、隻腳同個肚等等既位置。
 
係一個咁認真既時候,小貞竟然覺得我既動作好滑稽,然後格格聲咁笑。
 
「喂!小貞!我好認真架!」我紅都臉哂咁講。
 
小貞忍住左笑,「然後呢?」
 
「然後除左大聲嗌之外,仲要將呢件事話俾你信任既人知道!」
 
「信任既人?」
 
「即係傑哥哥呀!」
 
小貞笑眯眯咁答我:「知道啦傑哥哥!」
已有 0 人追稿